ۇلىتاۋ وبلىسىندا «قازاقستاننىڭ ۇزدىك تاۋارى»، «التىن ساپا» رەسپۋبليكالىق بايقاۋلارى مەن اۋىل كاسىپكەرلىگىن دامىتۋعا باعىتتالعان ء«بىر اۋىل – ءبىر ءونىم» مەملەكەتتىك باعدارلاماسىنىڭ وڭىرلىك كەزەڭى ءوتتى.
كورمە-بايقاۋ – وتاندىق تاۋار وندىرۋشىلەردىڭ جەتىستىكتەرىن كورسەتىپ، جەرگىلىكتى كاسىپكەرلىكتى قولداۋعا ارنالعان ماڭىزدى الاڭ. ءىس-شاراعا ءوڭىردىڭ ونەركاسىپ، ازىق-تۇلىك ءوندىرىسى، بىلعارى، كيىز جانە كۇمىستەن جاسالعان قولونەر بۇيىمدارى، ۇلتتىق كيىمدەر مەن تۇتىنۋ تاۋارلارىن وندىرۋشىلەر قاتىستى. ناتيجەسىندە 9 كاسىپورىن باعالى سىيلىقتارمەن ماراپاتتالىپ، رەسپۋبليكالىق بايقاۋعا جولداما الدى.
«بۇگىنگى ءىس-شارانىڭ ۇلىتاۋ وبلىسى ءۇشىن ورنى ەرەكشە. جاس ءوڭىر رەتىندە ءبىز دامۋدىڭ جاڭا كەزەڭىنە قادام باسىپ، كاسىپكەرلىكتى قولداۋعا، جەرگىلىكتى ءوندىرىستى دامىتۋعا باسىمدىق بەرىپ كەلەمىز. بۇل بايقاۋ – وڭىرىمىزدەگى ىسكەر جانداردىڭ كاسىبي دەڭگەيىن پاش ەتۋگە بەرىلگەن زور مۇمكىندىك»-دەدى ءىس-شاراعا ارنايى قاتىسقان ۇلىتاۋ وبلىسىنىڭ اكىمى داستان رىسپەكوۆ.
بايقاۋ اياسىندا ء«بىر اۋىل – ءبىر ءونىم» باعدارلاماسى بويىنشا جەرگىلىكتى فەرمەرلىك شارۋاشىلىقتار ۇسىنعان بىرەگەي ونىمدەرگە ەرەكشە كوڭىل ءبولىندى. كورمە كاسىپكەرلەرگە ءوز ونىمدەرىن تانىستىرىپ قانا قويماي، تاجىريبە الماسۋعا، ىسكەرلىك بايلانىستار ورناتۋعا جانە بيزنەستى دامىتۋعا قاتىستى وزەكتى ماسەلەلەردى تالقىلاۋعا مۇمكىندىك بەردى.
كورمە-بايقاۋعا كەلگەن تۇرعىندار مەن قوناقتار وتاندىق تاۋار وندىرۋشىلەردىڭ ونىمدەرىمەن تانىسىپ، وزدەرىنە ۇناعان تاۋارلاردى ساتىپ الدى.
