قىتايدان قازاقستانعا سالەمدەمە جەتكىزۋ مەرزىمى ۇزارۋى مۇمكىن

قىتايدان قازاقستانعا سالەمدەمە جەتكىزۋ مەرزىمى ۇزارۋى مۇمكىن. بۇل تۋرالى Cargo 092, Jana Post جانە Luna Cargo تاسىمالداۋ قىزمەتتەرى ەسكەرتتى، دەپ حابارلايدى «ادىرنا» ءتىلشىسى.

11 قازاندا Cargo 092 كومپانياسى قازاقستان مەن قىتاي شەكاراسىندا جۇك كولىكتەرىنىڭ ۇزىن-سونار كەزەگى پايدا بولعانىن جەتكىزدى. وتكىزۋ بەكەتتەرىنىڭ شامادان تىس جۇكتەلۋىنە بايلانىستى جەتكىزۋ مەرزىمى ۇزارۋى مۇمكىن.

«قىتاي تاراپىنداعى جاعدايعا ىقپال ەتىپ، شەكارادان ءوتۋ ۋاقىتىن جەدەلدەتە المايمىز»، – دەپ مالىمدەدى كومپانيا.

تاسىمالداۋشى بارلىق جۇكتىڭ باقىلاۋدا ەكەنىن ايتىپ، كليەنتتەردەن تاۋار جەتكىزۋدى جوسپارلاۋ كەزىندە ىقتيمال كىدىرىستەردى ەسكەرۋدى سۇرادى.

Jana Post كومپانياسى جەتكىزىلىمدەردىڭ كەشىگۋىن قىتايداعى مەرەكەلەرگە بايلانىستى شەكارانىڭ ۋاقىتشا جابىلۋىمەن ءتۇسىندىردى. 7 قازاندا جاريالانعان حابارلامادا شەكارانىڭ قايتا اشىلعانى جانە جينالىپ قالعان سالەمدەمەلەرى بار جۇك كولىكتەرى كەزەكپەن وتكىزىلىپ جاتقانى ايتىلعان.

كومپانيانىڭ سايتىنداعى اقپاراتقا سايكەس، Jana Post Temu, Pinduoduo جانە Taobao پلاتفورمالارىنان تاپسىرىس جەتكىزۋمەن دە اينالىسادى.

قازاقستانداعى تاسىمالداۋشىنىڭ سۇرىپتاۋ ورتالىعى تاۋلىك بويى جۇمىس ىستەيدى. ال بولىمشەلەرى كۇن سايىن ساعات 10:00-دەن 20:00-گە دەيىن ءۇزىلىسسىز قىزمەت كورسەتەدى.

Luna Cargo دا شەكارا اشىلعاننان كەيىن جۇك كولىكتەرى كەلە باستاعانىن حابارلادى. ادەتتە الماتىعا جۇك جەتكىزۋگە 6–8 كۇن قاجەت. الايدا مەرەكە كۇندەرى جينالىپ قالعان جۇكتەردى تاسىمالداۋعا قوسىمشا ۋاقىت كەرەك بولادى.

كومپانيا كليەنتتەردەن قويمادا ورىن بوساتۋ جانە جاڭا جۇكتەردى قابىلداۋعا مۇمكىندىك جاساۋ ءۇشىن كەلگەن سالەمدەمەلەرىن تەزىرەك الىپ كەتۋدى سۇرادى. كەلەسى جۇكتىڭ ناقتى قاشان كەلەتىنىن تاسىمالداۋشى الدىن الا بىلمەيدى. جۇكتەر ترانزيتتىك قويماعا تۇسكەن بويدا جونەلتىپ الىنادى.

جەتكىزۋ مەرزىمدەرى قاشان قالىپتى جاعدايعا ورالاتىنى كومپانيالاردىڭ جاريالاعان حابارلامالارىندا ناقتىلانباعان.

بۇعان دەيىن مەملەكەتتىك كىرىستەر كوميتەتى قىتاي حالىق رەسپۋبليكاسىنىڭ قۇرىلعان كۇنىنە بايلانىستى 1–3 قازان ارالىعىندا قىتايمەن شەكاراداعى اۆتوموبيل وتكىزۋ بەكەتتەرى جابىلاتىنىن ەسكەرتكەن ەدى. كوميتەتتىڭ مالىمەتىنشە، بۇل شەكتەۋلەر تەمىرجول وتكىزۋ بەكەتتەرىنە قاتىستى بولماعان.