قورعانىس مينيسترلىگى: تۇركيادا جاسالعان دروندارمەن جابدىقتاۋ قاراستىرىلۋدا

2245
Adyrna.kz Telegram

قازاقستان رەسپۋبليكاسىنىڭ قورعانىس مينيسترلىگىنە ارنايى ساۋالدارىمىزدى جولداپ، وعان ءتيىستى جاۋاپتار الدىق. سۇراقتار مەن جاۋاپتار رەتتىلىگىن وزگەرتپەستەن بەرىپ وتىرمىز. 

قازاقستان رەزەرۆتىك اسكەري جۇيەنى ەنگىزۋدى جوسپارلاۋدا. 2024 جىلى العاشقى رەزەرۆيستەر شاقىرتىلماق. اتالمىش جۇيە قالاي جۇمىس ىستەيدى؟ جىلىنا قانشا رەزەرۆتەگى اسكەردى شاقىرۋ جوسپاردا بار؟ جوباعا جىلىنا قانشا قارجى بولىنەدى؟

رەزەرۆتەگى قىزمەت اۋماقتىق ءپرينتسيپى بويىنشا (تۇرعىلىقتى جەرى بويىنشا) كەلىسىم شارت بويىنشا اسكەري قىزمەتتى، ازاماتتىڭ نەگىزگى جۇمىسىن جانە قارۋلى كۇشتەردەگى قىزمەتىن قوسا اتقارۋ، ەڭبەك جالاقىسىن ساقتاۋىن، قوسىمشا اقشالاي تولەمدەرىن جانە جەڭىلدىكتەردى بەرۋدى بىلدىرەدى.
رەزەرۆشىلەر وقۋدا جانە اسكەري جيىنداردا بولعان مەرزىمدە اسكەري قىزمەتشى مارتەبەسىنە يە بولادى.
ايتىلعان ازاماتتار ساناتىن دايارلاۋ، جاۋىنگەرلىك دايارلىق باعدارلاماسى بويىنشا ايىنا ءبىر-ەكى ساباق جانە وقىتۋ باعدارلاماسىنا سايكەس بولىمشەلەردى ۇيلەستىرۋ ءۇشىن جيىن (وقۋ-جاتتىعۋ) (جىلىنا ءبىر رەت 30 كۇنگە) شارالارىن وتكىزۋ ەسەپكە الا وتىرىپ، جىلىنا 60 (الپىس) كۇن شاماسىندا وتكىزۋگە ۇسىنىلادى.
اي سايىن، جيىندار ءوتۋ مەرزىمىن الماعاندا، رەزەرۆشىگە قازاقستان رەسپۋبليكاسى بويىنشا ەڭ تومەن ەڭبەك جالاقى (42 500 تەڭگە) تولەنەدى.
ال جيىندار وتكىزۋ مەرزىمىندە اقشالاي قاراجاتتار رەزەۆشىنىڭ ورتا ايلىق ەڭبەك جالاقىسى مولشەرىندە تولەنەدى.
ودان باسقا، رەزەرۆشىلەر مىناداي جەڭىلدىكتەرمەن قامتاماسىز ەتىلەدى:
1) ساباقتار مەن جيىندارعا قاتىسۋ ۋاقىتىندا جۇمىس ورنىنىڭ ساقتالۋى;
2) نورمالارعا سايكەس، كيىم-كەشەك مۇلىكتەرىمەن قامتاماسىز ەتىلۋى;
3) ساباقتار مەن جيىندارعا قاتىسۋ ۋاقىتىندا تاماقپەن، مەديتسينالىق قامسىزداندىرۋ;
4) رەزەرۆتەگى قىزمەتتەن الاتىن كىرىستەردى سالىقتان بوساتۋ;
5) قازا بولعان، مۇگەدەكتىكتى انىقتاعان، زاقىمدانعان جاعدايدا، جەرلەۋ شىعىندارىنا وتەماقىسىمەن.
رەزەرۆتەگى قىزمەتتى كەزەڭ-كەزەڭىمەن ەنگىزۋ جوسپارلانۋدا. باستاپقى كەزەڭدە (2024-2025 جىلدارى) قر-نىڭ ەكى-ءۇش وبلىستارىندا 5000-نان استام ازاماتپەن كەلىسىمشارت جاساۋ جوسپارلانۋدا. ءارى-قاراي، رەزەرۆتەگى قىزمەتتىڭ كوپشىلىككە تارالۋىنا، سونىمەن بىرگە اقشالاي قاراجاتتىڭ بولىنۋىنە قاراي، تۇراقتى نەگىزدە وتكىزىلەدى.

قازاقستان əسكەرى كوروناۆيرۋسپەن كۇرەسۋ بارىسىندا قانداي قىزمەتتەر اتقارۋدا؟

2020 جىلدىڭ ناۋرىز ايىندا، ەلدە توتەنشە جاعداي ەنگىزىلگەننەن باستاپ، قارۋلى كۇشتەردىڭ اسكەري قىزمەتشىلەرى كوروناۆيرۋستىق ينفەكتسيامەن كۇرەسۋگە، قالا كوشەلەرى مەن الەۋمەتتىك ماڭىزى بار وبەكتىلەردى دەزينفەكتسيالاۋعا، پاترۋلدەۋ مەن سانيتارلىق بلوكپوستتاردى ۇيىمداستىرۋعا بىردەن تارتىلدى.

نۇر-سۇلتان، الماتى، تالدىقورعان، ءۇشارال قالالارىندا ءتورت اسكەري-ەمدەۋ مەكەمەسى كوروناۆيرۋستىق پاندەميامەن كۇرەس بويىنشا ينفەكتسيالىق ستاتسيونارلار رەتىندە قايتا جابدىقتالدى. ولار ينفەكتسيالىق جانە پروۆيزورلىق ستاتسيونارلار رەتىندە پايدالانىلدى.

سونداي-اق، الماتى وبلىسىندا قىسقا مەرزىمدە، 72 ساعات ىشىندە تارازدان كوشىرىلگەن شاتىرلى لاگەرى بار جىلجىمالى گوسپيتال ورنالاستىرىلدى. ول 100 توسەك-ورىنعا ەسەپتەلگەن جانە رەنتگەن جابدىقتارىمەن، وكپەنى جاساندى جەلدەتۋ اپپاراتتارىمەن، وتتەگى باللوندارىمەن جابدىقتالعان.
سونىمەن قاتار، اقتوبەدە مەديتسينالىق كەشەن، اسكەري لازارەتتەردە ەكى ءموبيلدى بولىمشە جانە 23 دارىگەرلىك-مەيىربيكەلىك بريگادا قۇرىلدى.

پاندەميانىڭ باسىنان بەرى بيۋدجەت قاراجاتىنسىز نۇر-سۇلتان جانە الماتى قالالارىندا ەكى پتر-زەرتحاناسى ىسكە قوسىلدى، پتر جانە يفت-دياگنوستيكاسىن جۇرگىزۋ مۇمكىندىگى بار ەكى ءموبيلدى زەرتحانا ساتىپ الىندى، ولار اقتاۋ جانە سەمەي قالالارىندا جۇمىس جاساۋدا. مەديتسينالىق مەكەمەلەردىڭ شتاتى ينفەكتسيونيست-دارىگەرلەرمەن، ەپيدەميولوگتارمەن جانە ۆيرۋسولوگتارمەن تولىقتىرىلدى.

تالدىقورعان، اياگوز، سەمەي جانە سارىوزەك اسكەري لازارەتتەرىندە ءتورت ينفەكتسيالىق يزولياتور قۇرىلىپ، جۇمىس ىستەۋدە. دەنساۋلىق ساقتاۋدىڭ ازاماتتىق سەكتورى مۇددەسىندە كوروناۆيرۋس ينفەكتسياسى بار ناۋقاستاردى قابىلداۋ جانە ەمدەۋ ءۇشىن اعىمداعى جىلدىڭ ءساۋىر ايىنان باستاپ جالپى سىيىمدىلىعى 300 توسەك-ورىن بولاتىن نۇر-سۇلتان جانە الماتى قالالارىنداعى اسكەري گوسپيتالدار ىسكە قوسىلدى.
قازىرگى ۋاقىتتا، قاجەت بولعان جاعدايدا زاڭنامادا بەلگىلەنگەن تارتىپپەن قارۋلى كۇشتەردى قولدانۋدى مەديتسينالىق قامتاماسىز ەتۋ ءۇشىن 2 300-دەن استام اسكەري قىزمەتشىنى، بلوكپوستار مەن پاترۋلدەۋ ءۇشىن – 4 500 ادامدى جانە دەزينفەكتسيالاۋ ءىس-شارالارى ءۇشىن 1 000-نان استام ادامدى جۇمىلدىرۋعا بولادى.

قورعانىس سالاسىندا جاڭا قارۋ تۇرلەرىن الۋ بويىنشا جاسالىپ جاتقان كەلىسىمدەر تۋرالى ايتساڭىز. قوعامدا كەڭىنەن تالقىلانىپ جۇرگەن سوققى جاساۋشى تۇركيا دروندارىن الۋ بويىنشا انكارامەن كەلىسىم بار ما؟

قورعانىس مينيسترلىگى قىزمەتىنىڭ باسىم باعىتتارىنىڭ ءبىرى قارۋلى كۇشتەردى سوڭعى ۇلگىدەگى قارۋ-جاراقپەن جانە اسكەري تەحنيكامەن جاراقتاندىرۋ بولىپ تابىلادى.
بۇل باعىتتاعى جۇمىس ۇدايى جۇرگىزىلەدى. قارۋلى كۇشتەردىڭ الدىندا تۇرعان باسىم مىندەتتەرگە سايكەس اسكەرلەردى قازىرگى زامانعى، جوعارى تەحنولوگيالىق قارۋ-جاراقپەن جانە اسكەري تەحنيكامەن جاراقتاندىرۋ جوسپارلانۋدا.

قارۋلى كۇشتەردى جاراقتاندىرۋدى جوسپارلاۋ كەزىندە نەگىزگى كۇش-جىگەر اۆياتسيالىق تەحنيكا پاركىن، ونىڭ ىشىندە اسكەري-كولىك اۆياتسياسىن، ۇۇا، اشقق، رەب، بارلاۋ، بايلانىس، رحبز جانە روبوتوتەحنيكا قۇرالدارىن جاڭارتۋعا باعىتتالعان.

بۇل رەتتە قارۋلى كۇشتەردى قازىرگى زامانعى قارۋ-جاراقپەن جانە اسكەري تەحنيكامەن جاراقتاندىرۋ جاڭا ۇلگىلەردى ساتىپ الۋ جولىمەن دە، سول سياقتى جاراقتاندىرۋدا تۇرعان جانە پايدالانۋ رەسۋرسىن ۇزارتۋعا مۇمكىندىك بەرەتىن بەلگىلى ءبىر تەحنولوگيالىق قورى بار تەحنيكاعا كۇردەلى جوندەۋ جۇرگىزۋ جانە جاڭعىرتۋ ارقىلى دا جۇزەگە اسىرىلادى.

سونىمەن قاتار، جەتكىزۋشىلەرمەن جانە وندىرۋشىلەرمەن شارتتاردى ۋاكىلەتتى مەملەكەتتىك ورگان اتىنان يندۋستريا جانە ينفراقۇرىلىمدىق دامۋ مينيسترلىگى جاساسادى.
قر قم قارۋلى كۇشتەردى ءارتۇرلى ماقساتتاعى ۇشقىشسىز ۇشۋ اپپاراتتارىمەن، ونىڭ ىشىندە تۇركيادا جاسالعاندارىمەن جابدىقتاۋ قاراستىرىلۋدا. وسىعان بايلانىستى جان-جاقتى زەردەلەۋ ماقساتىندا قويىلاتىن تالاپتاردى قاناعاتتاندىراتىن وڭتايلى ۇلگىنى تاڭداۋ ءۇشىن قارۋ-جاراق نارىعىنىڭ مونيتورينگى ۇيىمداستىرىلدى.

قارۋلى كۇشتەردى جاراقتاندىرۋ ءۇشىن بارلاۋ-سوققى بەشسىز ۇشۋ قۇرىلعىلارىنىڭ ۇلگىلەرىن تاڭداۋ جونىندەگى شەشىم: قارۋ-جاراق نارىعىنىڭ مونيتورينگى، ءتيىستى مامانداردى ساراپتامالىق تالداۋ جانە ۆەدومستۆوىشىلىك كەڭەسشى ورگاننىڭ قاراۋى راسىمدەرى اياقتالعاننان كەيىن قابىلداناتىن بولادى.

قازاقستان əسكەرىن بىتىمگەرلىك ميسسيامەن اۋعانستانداعى جاعدايدىڭ كۇرت ناشارلاۋىنا بايلانىستى تəجىك-اۋعان، تۇركىمەن-اۋعان، وزبەك-اۋعان شەكاراسىنا جىبەرۋدى ۇقشۇ (ودكب) نەمەسە مەملەكەتارالىق كەلىسىمدەر جاساۋ ويلاستىرىلا ما؟

ۇقشۇ-عا مۇشە مەملەكەتتەرمەن راتيفيكاتسيالانعان ءنورماتيۆتى قۇجاتتارعا سايكەس ۇجىمدىق قاۋىپسىزدىك جۇيەسىنىڭ قۇرالدارى مەن كۇشتەرى ەگەمەندىگىنە، تۇراقتىلىعىنا جانە اۋماقتىق تۇتاستىعىنا قاۋىپ ءتونىپ تۇرعان ءبىر نەمەسە بىرنەشە مۇشە مەملەكەتتىڭ رەسمي سۇرانىسى نەگىزىندە ۇجىمدىق قاۋىپسىزدىك كەڭەسىنىڭ شەشىمىمەن قولدانىلادى.

بۇل رەتتە قازاقستان ۇلتتىق زاڭناماعا سايكەس ءوزىنىڭ اسكەري كونتينگەنتىن ۇقشۇ-نىڭ ۇجىمدىق كۇشتەرىنىڭ قۇرامىندا، سونداي-اق بۇۇ (وون) باعىتى بويىنشا (بۇۇ قك مانداتى بولعان جاعدايدا) قر پارلامەنتىنىڭ شەشىمىمەن عانا جىبەرەدى.

"ادىرنا" ۇلتتىق پورتالى

پىكىرلەر