تاشكەنتتەگى Glamour بۋتيگىنىڭ اكىمشىلىگى ينستاگرامداعى پاراقشاسىندا يتالياندىق ديزاينەر ستەفانو ءريچچيدىڭ كوللەكتسياسىنا بايلانىستى كەشىرىم سۇرادى. بۇعان دەيىن بۋتيك اكىمشىلىگى وزبەكستاننىڭ گەربى بەينەلەنگەن اياق كيىمنىڭ جاڭا كوللەكتسياسى تۋرالى حابارلاندىرۋ جاساعان بولاتىن دەپ حابارلايدى "ادىرنا" ۇلتتىق پورتالى "centralasia.media-عا" سىلتەمە جاساپ.
يتالياندىق ديزاينەر ستەفانو ريچچي بۇعان دەيىن وزبەكستانعا ارنالعان كوللەكتسياسىن جاريالاعان بولاتىن. جانجال يتالياندىق ديزاينەردىڭ اياق كيىمگە وزبەكستاننىڭ مەملەكەتتىك ءرامىزىن ورنالاستىرۋىنا بايلانىستى تۋىندادى. بۇل الەۋمەتتىك جەلىلەردە نارازىلىق تۋدىردى. وزبەكستان ادىلەت مينيسترلىگى رەسپۋبليكانىڭ مەملەكەتتىك رامىزدەرىن قورلاۋعا جول بەرىلمەيتىنى تۋرالى مالىمدەمە تاراتتى.
ال Glamour بۋتيگىنىڭ اكىمشىلىگى: «ءبىز بۇل جاعدايعا شىن جۇرەكتەن وكىنەمىز جانە ەلىمىزدىڭ رامىزدەرى بەينەلەنگەن ەلەمەنتتەرى بار كروسسوۆكالاردىڭ كەز كەلگەن مودەلىنە تاپسىرىس بەرۋدەن باس تارتامىز»،-دەپ جازدى.
ساتۋشىلار بۇل كوللەكتسيا ەشقاشان بولشەك ساۋداعا ارنالماعانىن، ونى تەك الدىن الا تاپسىرىس بويىنشا الۋعا بولاتىنىن ايتتى. سونداي-اق ولار بولاشاقتا مۇنداي دۇنيەلەردى ەسكەرۋگە ۋادە بەردى.
«بارلىقتارىڭىزدىڭ رەاكتسيالارىڭىزعا راقمەت! بۇل ءبىز ءۇشىن وتە قۇندى »، - دەپ جازدى تاشكەنت بۋتيگىنىڭ اكىمشىلىگى.
"ادىرنا" ۇلتتىق پورتالى.
