كەشە عانا وتكەن اۋىل اكىمى سايلاۋىندا بىرقاتار زاڭ بۇزۋشىلىقتار تىركەلگەنى بەلگىلى بولدى. پارتيالىق ەمەس بايقاۋ ورتالىعىنىڭ مالىمەتىنشە، كەيبىر پىسىقايلار قۇجاتسىز كەلسە، وزگەسى داۋىس بەرۋ كابيناسىنا ەكى ادام بولىپ كىرۋگە ارەكەتتەنگەن. سونداي-اق وز تۋىسقانىنا داۋىس بەرۋگە اسىققاندار دا بار. ال ساراپشىلار سايلاۋعا وڭ باعا بەرىپ وتىر. اۋىل تۇرعىندارى ءۇشىن اسا ماڭىزدى سايلاۋ جايلى "ادىرنا" ۇلتتىق پورتالى «ەۋرازيا» ءبىرىنشى ارناسىنا سىلتەپ حابارلايدى.
730 ەلدى مەكەندە وتكەن اۋىل اكىمى سايلاۋى ءوز مارەسىنە جەتتى. تىركەۋدەن وتكەن 2 297 كانديدات باق سىنادى. ەندى الداعى كۇندە جەڭىسكە جەتكەن كانديداتتار بەلگىلى بولادى.
ال سايلاۋ بارىسىندا 1 419 ادام ءوزىن-ءوزى ۇسىنسا، 878 كانديدات ساياسي پارتيالاردان قاتىسقان. حالىقتىڭ داۋىسى ارقىلى اكىم بولۋدان ءۇمىتتى 2 297 ازاماتتىڭ 1 839-ى ەر ادام، 458-ءى ايەل. ءاربىر كانديداتقا رەسپۋبليكالىق بيۋدجەتتەن ۇگىت-ناسيحات جۇمىسىنا 220 000 تەڭگە بولىنگەن بولاتىن.
Cايلاۋدى پارتيالىق ەمەس بايقاۋ ورتالىعىنىڭ توراعاسى تولەگەن كۇنادىلوۆتىڭ ايتۋىنشا، كەشەگى وتكەن ساياسي دودادا شىعىس قازاقستان مەن جامبىل وبلىسىنىڭ اۋىل تۇرعىندارى بەلسەندىلىك تانىتقان.
جالپى قازاقستان بويىنشا 6 322 اۋىل بار، وندا 7 ميلليوننان اسا ادام تۇرادى. جەرگىلىكتى سايلاۋ كوميسسيالارى جاساقتاعان دەرەككە سايكەس، وڭىردەگى اكىمى سايلاناتىن اۋىل، اۋىلدىق وكرۋگ، اۋداندىق ماڭىزى بار قالا مەن كەنت تۇرعىندارىنىڭ 90 پايىزى ءوز تاڭداۋىن جاساعان.
جالپى 1845 سايلاۋ ۋچاسكەلەرىندە پارتيالىق ەمەس بايقاۋ ورتالىعىنىڭ 2000-عا جۋىق بايقاۋشىلارى سايلاۋدى باس-اياعى باقىلاپتى. جالپى ەلىمىز بويىنشا 12 زاڭبۇزۋشىلىق تىركەلگەن. ولاردىڭ ىشىندە سانيتارلىق تالاپتاردىڭ ورىندالماۋ، اراقاشىقتىق ساقتالماۋ، بيۋلەتەن تولتىرۋ كابينكالارىنا ەكى ادامنىڭ كىرىپ كەتۋى جانە دە ءوز وتباسى مۇشەسىنە داۋىس بەرۋ ارەكەتتەرى تىركەلگەن. دەسە دە ولار سايلاۋ پروتسەسىنىڭ زاڭدىلىعى مەن اشىقتىعىنا اسەر ەتپەدى، دەيدى ماماندار.
تولىعىراق ۆيدەودا:
"ادىرنا" ۇلتتىق پورتالى
