تالعار قالاسىنىڭ اكىمى بولىپ سايلانعان قايرات يساباەۆ قىزمەتىنەن كەتتى، - دەپ حابارلايدى "ادىرنا" ءتىلشىسى.
شەنەۋنىكتىڭ كەتكەنى تۋرالى اقپارات الەۋمەتتىك جەلىلەردە پايدا بولدى. رەسمي جاۋاپ الۋ ءۇشىن حابارلاسقان تىلشىلەرگە:
"اۋدان اكىمدىگىنىڭ بۇل ىسكە قاتىستى پىكىر بىلدىرۋگە قۇقىعى جوق، ويتكەنى قايرات يساباەۆ حالىق داۋىسى ارقىلى سايلانعان. سوندىقتان تالعار اۋدانىنىڭ اۋماقتىق سايلاۋ كوميسسياسىنا ءوتىنىشىڭىزدى جولداۋىڭىزدى سۇرايمىز", - دەپ جاۋاپ بەردى اكىمدىكتەگىلەر.
ال، سايلاۋ كوميسسياسىنىڭ توراعاسى مۇحيت ديۋسەباەۆ بۇل اقپاراتقا قاتىستى پىكىر ءبىلدىردى.
"كەشە، 5 ساۋىردە قايرات يساباەۆ ءوز ءوتىنىشى بويىنشا قىزمەتىنەن كەتۋ تۋرالى ارىز جازدى. ول دەنساۋلىق جاعدايىنا بايلانىستى ورنىنان كەتۋگە ءماجبۇر بولدى. ونىڭ وكىلەتتىگىن توقتاتۋ تۋرالى شەشىم بۇگىن، 6 ساۋىردە شىعادى", - دەدى ديۋسەباەۆ Talgarnewskz تىلشىسىنە.
ەسكە سالايىق، وتكەن جىلدىڭ قاراشاسىندا وتكەن قالا اكىمىن سايلاۋدا قايرات يساباەۆ جەڭىسكە جەتكەن بولاتىن. ول كەزدە سايلاۋشىلاردىڭ 58 پايىزى داۋىس بەردى، ونىڭ ىشىندە يساباەۆ 53,5 پايىز داۋىسقا يە بولدى. اكىم لاۋازىمىنا بارلىعى ءۇش ادام ۇمىتكەر بولدى. باسقا كانديداتتار - ابزال ساعىمبەكۇلى مەن ۇلان قىزايبەك سايكەسىنشە 35,3 جانە 7,7 پايىز داۋىس جينادى. سايلاۋشىلاردىڭ 1,6 پايىزى بارلىعىنا قارسى داۋىس بەردى.
قايرات يساباەۆ – حيرۋرگ. اكىم سايلاۋىندا جەڭىسكە جەتكەنگە دەيىن قىزىلقايرات اۋىلىنداعى دارىگەرلىك امبۋلاتوريانىڭ مەڭگەرۋشىسى، تالعار ورتالىق اۋداندىق اۋرۋحاناسى ديرەكتورىنىڭ ەمدەۋ ءبولىمى جونىندەگى ورىنباسارى قىزمەتتەرىن اتقارعان.
"ادىرنا" ۇلتتىق پورتالى
