Jańaózendik 15 otbasy memlekettik turǵyn úı qorynan berilgen páterlerin jekeshelendire almaı júr.Olar sheneýnikterdiń bul qylyǵyna túsinbeıdi. Óıtkeni, atqaminerler buǵan qulyqsyz. Amaly taýsylǵan olar máselege aımaq basshysynyń aralasýyn ótindi. Osydan 10 jyl buryn kópbalaly jáne az qamtylǵan otbasylar, múgedek balasy bar januıalar baspanany ákimdik tarapynan alǵan. Alaıda kóp jyl ótse de áli kúnge deıin jeke atyna ótkize almaı júrgenge uqsaıdy. Al jańaózendik ákimdik bolsa, naryqtaǵy páter qunynyń qalǵan qaldyq aqysyn tóleseń, aýdarýǵa bolady depti. Bul týraly «Adyrna» ulttyq portaly «Eýrazııa» birinshi arnasyna silteme jasap habarlaıdy.
«Kópbalaly ana Natasha júr shyryldap. Mynda 1-toptaǵy múgedek balanyń anasy tur. Ol kisige áli aýdaryp bergen joq».
Áý basta baspana jaldamaly páter esebinde berilgen. Biraq sol kezdegi qala ákimi 3 jyldan sońjekeshelendirý quqyǵymen aýdaryp alasyńdar degen eken. Jeme- jemge kelgende qazirgi ákimdik ókilderi aınyp qalǵan. Kelisim-shart boıynsha Natalıa Volosatova 3 bólmeli úıin 7 mln teńgege alýy tıisti. Biraq jýyrda oǵan 11 mln teńge tóleýiń kerek depti.
«Men kópbalaly anamyn. Ári bıýdjet salasynyń qyzmetkeremin. 2012 jyly baspanaǵa ázer degende qol jetkizdim. Jańaózen qalasynyń ákimdigi ol úıdi 3 jyldan keıin jekeshelendirip alasyz degen. Qolymda kelisim-shartym bar. Páter quny - 7 mln teńge. Endi jekeshelendirýge barsam, maǵan 11 mln teńge tóleısiz deıdi. Men buǵan múlde kelispeımin. Ýájimdi qalalyq ákimdik ókilderi tyńdaǵysy kelmeıdi. Sol sebepti oblystyq ákimdikke kelýge májbúrmin», - deıdi Jańaózen qalasynyń turǵyny Natalıa Volosatova.
Al Aqtúzel apanyń jaǵdaıy múlde basqa. Onyń 1 toptaǵy múgedek balasy bar. Ózi jumyssyz. Negizinde tegin berilýi tıis páterdi oǵan 10 mln teńgege baǵalap otyr. Al qatelik bastapqy kezde ketken. Anasynyń paıymynsha, ákimdik úıdi jarymjan balasynyń atyna rásimdemegen. Sol sebepti bar jeńildikterden qaǵylyp otyr.
«Bir-eki jerge bardym, ıýrıstke bardym. Olar apa sizge dokýmentterińizdi durys bermegen dedi. Negizi ınvalıd balanyń atynda bolý kerek edi. Qaldyq qunynyn sol úshin shyǵaryp berip otyr. Al meniń oǵan tóleýge jaǵdaıym joq», - deıdi qala turǵyny Aqtúzel Serikova.
Oblystyń atqaminerleri árqaısynyń máselelerimen tanysyp, jeke-jeke qaraımyz dep ýádelerin úıip-tókti. Alaıda bári zań sheńberinde bolýy tıis dedi.
«Jeekleı másele bolsa, osyndaı suraqtar týyndaıtyn bolsa, bizge ótinish retinde shyǵyńyz. Biz ótinishke sáıkes, aıtqan máselenin qaraýǵa daıynbyz. jekeshelendirýge shyǵady», - deıdi oblystyq energetıka jáne turǵyn úı sharýashylyǵy basqarmasynyń basshysy Berdibek Qartbaev.
Eger bul másele sheshilmese, shaǵymdanýshylar oblys ákiminiń jeke qabyldaýyna barýǵa májbúrmiz deıdi.
«Adyrna» ulttyq portaly
(foto ernur.kz saıtynan)
