توعىز بالاسى مەن ەكى نەمەرەسى بار گاۋھار ءابدىرايىموۆا «اقجار» ىقشاماۋدانىنداعى ۋاقىتشا كىشكەنتاي ءۇيدى جالداپ تۇرادى. قاتتى جاۋعان جاڭبىر مەن سوققان داۋىل ونىڭ جالعىز ءۇيىن شايىپ كەتتى. ءۇيدىڭ قابىرعالارى داۋىل سوققىسىنا توتەپ بەرە الماي وپىرىلىپ ءتۇستى، دەپ حابارلايدى "ادىرنا" ۇلتتىق پورتالى.
جەكە ۇيدە بەس بولمە بار، ونىڭ ۇشەۋى قيراعان، دەيدى ايەل. گاۋھاردىڭ ايتۋىنشا، ول مۇنداي ۇيدە تۇرۋعا قورقادى، قالعان بولمەلەرى دە قيراپ وتباسى مۇشەلەرىن مايىپ قىلا ما، دەپ ۋايىمدايدى.
«بەس كۇن بويى قاتتى جاڭبىر جاۋدى، كەشە تۇنگى ساعات ەكىلەر شاماسىندا ءۇيىمىزدىڭ شاتىرى وپىرىلىپ ءتۇستى، ءۇيدى جىلىتاتىن وتىن بار ەدى، قازىر جارامسىز، ءۇي دەۋگە كەلمەيتىن قابىرعالار عانا قالدى. سونداي-اق ءبارى سۋ استىندا قالدى. سوسىن تاعى ەكى بولمەنىڭ شاتىرى قۇلادى، مەنىڭ ۋاقىتشا ءۇيىم قىش كىرپىشتەن تۇرعىزىلعاندىقتان، قاتتى جاڭبىرعا شىداي المادى»، - دەدى ايەل.
گاۋھاردىڭ ايتۋىنشا، قازىر ء"ۇي" دەۋگە كەلمەيتىن جەردىڭ ەسىگى دە جابىلمايدى. ءۇي سالقىن، وتباسى پەشتىڭ جىلۋىمەن جىلىنۋى كەرەك. ءۇش بالا قازىردىڭ وزىندە سۋىقتان اۋىرىپ جاتىر. ايەلدىڭ ءوزى كۇيەۋىمەن اجىراسقان، جۇمىس ىستەمەيدى. وتباسى ااك جانە كوپ بالالى وتباسى جاردەماقىسىمەن تۇرادى. ولاردىڭ بارار جەرى جوق، تۋىستارى دا كومەكتەسپەي جاتىر، دەيدى جابىرلەنۋشى.
«ۇلكەن قىزىم دا كۇيەۋىمەن اجىراسقان، ەكى بالاسى بار، ولار وتە كىشكەنتاي، سوندىقتان جۇمىس ىستەمەيدى. بالالارىما قارايتىندىقتان جۇمىس ىستەي المايمىن. ءبىر جىل بۇرىن كۇيەۋىممەن اجىراسقانمىن، ونىڭ تۋىستارى دا، ءوزىمنىڭ تۋىستارىم دا بىزگە كومەكتەسپەدى. اكىمدىك تە كومەكتەسپەدى، دەمەۋشىلەر بولسا كومەكتەسەمىز دەدى. مەنىڭ ۇيىمە گاز قۇبىرلارى تارتىلعان، ماماندار قۇبىرلارىن جوندەپ، كەتىپ قالدى. بىراق ءبىزدىڭ ءۇي سول كۇيىندە جىلۋسىز قالدى»،- دەپ تۇيىندەدى ءسوزىن گاۋھار ءابدىرايىموۆا.
"ادىرنا" ۇلتتىق پورتالى
