جۇماتايدىڭ ء"لايلاسى" ومىردەن وزدى

17421
Adyrna.kz Telegram

وسى اپتادا "سىرقات جۇرەكتى ساۋىقتىراتىن جىرلار" (ي.يساەۆ) جازىپ كەتكەن بەلگىلى اقىن جۇماتاي جاقىپباەۆتىڭ سىرلى دا جاۋھار جىرلارىنا ارقاۋ بولعان، اقىننىڭ مۋزاسى اتانعان ءلايلا دوسمۇحامبەتوۆا دۇنيەدەن وزدى.

كوپشىلىك ءلايلا بەيىسبەكقىزىنىڭ شىنايى بولمىسى قانداي ەكەنىن بىلمەسە دە، جۇماتاي اقىننىڭ جىرلارىنان بۇل كىسىنىڭ سونداي سۇلۋ، نازىك تە بيازى ادام ەكەنىن جاقسى بىلەدى.

شىن ومىردە بۇل كىسىلەردىڭ قوسىلۋىنا تاعدىر جازباعان، دەگەنمەن اقىن ءلايلا بەيىسبەكقىزىنىڭ بەينەسىن، جان دۇنيەسىن، سۇلۋلىعىن ءوز جىرىندا كەرەمەت سۋرەتتەپ شىققان. ءتىپتى اقىن ءوز مۋزاسىنا ارناپ 1981 جىلى «ءلايلا» اتتى جىر جيناعىن دا شىعارعان ەكەن.

"ايامايتىن كۇن بولىپ كەل – ءبارىبىر،

ايالايتىن ءتۇن بولىپ كەل – ءبارىبىر.

سەنى، ءلايلا، قارا كوزدى كيەلىم،

قايىسپاستان قارا جەرشە سۇيەمىن، - دەپ جىرلاعان اقىن لايلاعا ەسسىز عاشىق بولىپتى.

اقىن ءوز مۋزاسىن قالاي كەزىكتىردى دەگەن ساۋالعا كەلسەك، جۇماتاي اقىن العاش ءلايلانى بي كەشىندە كورىپ قالعان. ەسىكتەن كىرىپ كەلگەن سۇلۋعا بىردەن كوزى تۇسكەن. ءلايلا دا كەلبەتتى اقىنعا كەت ءارى ەمەس ەكەنىن ءبىلدىرىپ، ونى بيگە شاقىرعان. بيگە شىقپاي قويعان اقىنعا ءلايلا ورامالىن ۇسىنىپ، شىعىپ كەتكەن. بۇل جۇماتايدىڭ ءلايلانى العاش كورۋى ەدى.

"ويلاماي ءجۇرىپ جان بار دەپ جالعاندا كەرىم،

الەمنەن مىناۋ كوڭىلىم قالعاندا مەنىڭ.

ءوزىڭدى كورىپ ءوسپىرىم، كوزىڭدى كورىپ،

"اقىن بولسام، - دەپ - اتاقتى", ارمانداپ ەدىم", — دەپ، سودان باستاپ اقىن عاشىقتىق جىرلارىن بۇرقىراتىپ جازا باستاعان ەكەن.

بۇدان كەيىن ولەڭدەگى مۋزاسىن تاپقان اقىن سۇيىكتىسىن ەكىنشى رەت قازمۋ قالاشىعىنان سىرتتاي كورىپ قالعان. ول كەزدە ءلايلانىڭ جانىندا بوتەن جىگىت تۇرعان سوڭ، اقىن جاقىنداۋعا باتا الماعان. ءۇشىنشى رەت اۋىلدا كورگەن. ماسكەۋگە وقۋعا كەتكەن ءلايلا ەلگە ورالعاندا سىرتىنان عانا كورىپ، كوز قۋانىشىنا سىرتتاي ءتانتى بولعان. بۇل تۋرالى ءوز اڭگىمەلەرىندە جۇماتايدىڭ جارى زايدا ەلعوندينوۆا ايتىپ بەرگەن ەكەن.

وسىلايشا اقىننىڭ الىپ جىرلارىنا ارقاۋ بولعان ءلايلا سۇلۋ قازاق پوەزياسىندا تالاي جاندى ءتانتى قىلعان، جۇمباق تا بولمىسى بولەك كەيىپكەر بولدى.

ەندى ءلايلا  بەيىسبەكقىزى تۋرالى ايتساق، ول 1946 جىلى 4 قازاندا دۇنيەگە كەلگەن. باسىندا قازمۋ-عا وقۋعا تۇسكەن ارۋ كەيىن ۇزدىك وقىپ، كوزگە تۇسكەن سوڭ ماسكەۋ ۋنيۆەرسيتەتىنە اۋىسقان. بۇل وقۋ ورنىنىڭ تاريح-ارحيۆتانۋ فاكۋلتەتىن بىتىرگەن.  ودان سوڭ پراكتيكادا بولىپ، كەيىن سول قالادا ءبىرجولا قالىپ قويعان. ماسكەۋدە وزگە ۇلت وكىلىنە تۇرمىسقا شىعىپ، بالالى-شاعالى بولعان. وسىدان ءبىراز جىل بۇرىن زەينەتكە شىققان. وسىدان بىرەر كۇن بۇرىن ءلايلا بەيىسبەكقىزى ومىردەن ءوتتى.

"ادىرنا" ۇلتتىق پورتالىنىڭ ۇجىمى  ءلايلا بەيىسبەكقىزىنىڭ وتباسىنا، جاقىن-جۋىقتارىنا قايعىلارىنا ورتاقتاسىپ، كوڭىل ايتادى. 

 

"ادىرنا" ۇلتتىق پورتالى.

پىكىرلەر