تيمۋر قۇلىباەۆتىڭ Halyk قورى ساپالى ادەبيەتتىڭ ءورىسىن كەڭەيتۋگە، ۇلتتىق مۇرانى دارىپتەۋگە، الەمدىك ادەبيەت پەن تانىمدىق باسىلىمداردى وقىرمانعا قولجەتىمدى ەتۋگە جانە كىتاپ وقۋ مادەنيەتىن قالىپتاستىرۋعا باعىتتالعان جوبالاردى جۇيەلى تۇردە قولداپ كەلەدى.
مەملەكەت باسشىسى قاسىم-جومارت توقاەۆ: «وزىق ويلى ۇلت بولۋدىڭ ەڭ توتە جولى – كىتاپ وقۋ. سوندىقتان كىتاپ وقۋ مادەنيەتىن قوعامدا بارىنشا ورنىقتىرۋىمىز كەرەك»، – دەگەن ەدى.
وسى ستراتەگيالىق ۇستانىمنىڭ جالعاسى رەتىندە پرەزيدەنت «كىتاپ وقۋ مادەنيەتىن دامىتۋ جانە زەردەلى ۇلت قالىپتاستىرۋ جونىندەگى شارالار تۋرالى» جارلىققا قول قويدى. قۇجات اياسىندا كىتاپ وقۋ مادەنيەتى مەن كىتاپ ءىسىن كەڭىنەن ناسيحاتتاۋعا باعىتتالعان «زەردەلى ۇلت» تۇجىرىمداماسىن ازىرلەۋ كوزدەلگەن.
وسى ۇلتتىق مۇراتپەن ۇندەس Halyk قورى مەملەكەتتىك باستاما قابىلدانباي تۇرىپ-اق باسپا ىسىنە، ادەبي مۇرانى ناسيحاتتاۋعا جانە مازمۇندى كىتاپتاردى جارىققا شىعارۋعا بەلسەندى اتسالىسىپ كەلەدى.
ماسەلەن بىلتىر اباي قۇنانبايۇلىنىڭ تۋعانىنا 180 جىل تولۋىنا وراي قور گۇلميرا اماندىقوۆانىڭ حاكىمنىڭ «قارا سوزدەرى» نەگىزىندە ازىرلەنگەن «ۇرپاققا ۇلاعات» كىتاپتار توپتاماسىن شىعارۋعا قولداۋ كورسەتتى.
جوبا اياسىندا قازاقشا-ورىسشا جانە قازاق ءتىلىنىڭ لاتىن گرافيكاسىنداعى ءماتىنى اعىلشىن تىلىندەگى اۋدارمامەن ۇسىنىلعان 50 جيىنتىق، جالپى سانى 100 دانا كىتاپ جارىق كوردى. بۇل باستاما ابايدىڭ تاعىلىمى مەن تەرەڭ ويلارىن جاڭا بۋىنعا جانە شەتەلدىك وقىرمانعا جەتكىزۋگە مۇمكىندىك بەردى.
بيىل بالاباقشالار مەن مەكتەپتەردەن تۇسكەن سۇرانىستاردى ەسكەرە وتىرىپ، بالالار مەن جاسوسپىرىمدەرگە، اتا-انالار مەن پەداگوگتەرگە ارنالعان ءتۇرلى باعىتتاعى كىتاپتار مەن تانىمدىق جيناقتاردى جارىققا شىعارۋعا قولداۋ كورسەتتى.
ولاردىڭ قاتارىندا كلاسسيكالىق جانە زاماناۋي قازاق ادەبيەتى، قازاق پوەزياسى، الەم ادەبيەتىنىڭ تاڭداۋلى تۋىندىلارى، تانىمدىق ادەبيەت، ءومىربايان، پسيحولوگيا، تۇلعالىق دامۋ، قارجىلاي ساۋاتتىلىق، دەنساۋلىق پەن سالاۋاتتى ءومىر سالتى، عىلىمي-تانىمدىق جانە قوعامدىق-ساياسي باعىتتاعى باسىلىمدار بار.
بالالار مەن جاسوسپىرىمدەر ادەبيەتىنە دە ايرىقشا ءمان بەرىلدى. Halyk قورى «شىتىرمان ەرتەگىلەر»، «ول كىم؟» سەريالارىن، تانىمال ەرتەگىلەردىڭ ونەگەسىن تۇسىندىرەتىن، بالالاردى ادەپتىلىككە، ىزگىلىككە جانە جاۋاپكەرشىلىككە تاربيەلەيتىن كىتاپتاردىڭ جارىق كورۋىنە قولداۋ كورسەتتى.
بۇل كىتاپتار مەن جيناقتاردى Halyk قورىنىڭ قولداۋىمەن سالىنعان قوستاناي قالاسىنداعى بالاباقشاعا، بەينەۋ اۋدانىنداعى ءۇش مەكتەپكە، سونداي-اق، «ميراس» حالىقارالىق مەكتەپتەرى مەن بالاباقشالارىنا بەرۋ جوسپارلانىپ وتىر. وسىلايشا، بالالار ساپالى ءارى مازمۇندى ادەبيەتتى كۇندەلىكتى وقۋ جانە تاربيە ۇدەرىسىندە پايدالانا الادى. Halyk قورى اتالعان ءبىلىم بەرۋ ۇيىمدارىنا بۇعان دەيىن دە قولداۋ كورسەتكەن. بۇل باستاما – ءبىلىم ساپاسىن ارتتىرۋعا باعىتتالعان ۇزاقمەرزىمدى سەرىكتەستىكتىڭ زاڭدى جالعاسى.
بۇل – ءبىلىم بەرۋ ۇيىمدارىنىڭ ناقتى سۇرانىسىنا بەرىلگەن جاۋاپ. باستاما انا تىلىندەگى ساپالى ادەبيەتتى بالالارعا قولجەتىمدى ەتۋگە، ولاردىڭ كىتاپقا دەگەن قىزىعۋشىلىعىن ەرتە جاستان قالىپتاستىرۋعا جانە ەلىمىزدىڭ رۋحاني قورىن مولايتۋعا باعىتتالعان.
سونىمەن قاتار، تيمۋر قۇلىباەۆتىڭ Halyk قورى «NNEF» قوعامدىق قورىنا «ۆدوحنوۆەنيە» اتتى عيبراتتى اڭگىمەلەر باسىپ شىعارۋعا قايىرىمدىلىق كومەك كورسەتتى. باسىلىم ء«بىلىم بەرۋدەگى رۋحاني-ادامگەرشىلىك قۇندىلىقتار: وقىتۋ مەن تاربيەلەۋدىڭ تەورياسى جانە تاجىريبەسى» حالىقارالىق كونفەرەنتسياسى اياسىندا ۇسىنىلادى.
«قازاق حالقى ءسوزدى امانات، كىتاپتى قازىنا دەپ بىلگەن. ءبىز ءۇشىن كىتاپ شىعارۋعا قولداۋ كورسەتۋ – جاي عانا باسپا جوباسىن قارجىلاندىرۋ ەمەس، ۇلتتىڭ رۋحاني ىرگەسىن بەكىتۋ. بىلتىر اباي مۇراسىن جاڭا بۋىنعا جەتكىزۋگە ۇلەس قوسساق، بيىل قازاق جانە الەم ادەبيەتىنىڭ ۇزدىك ۇلگىلەرىن، بالالارعا ارنالعان تاعىلىمدى كىتاپتاردى وقىرمانعا ۇسىنۋعا قولداۋ كورسەتىپ وتىرمىز. ءاربىر جارىق كورگەن كىتاپ – بالا ساناسىنا سەبىلگەن ءبىلىم ءدانى، ەلدىڭ ەرتەڭىنە جاعىلعان شىراق. كىتاپتى قولداۋ – ۇرپاقتى، ال ۇرپاقتى قولداۋ – مەملەكەتتىڭ بولاشاعىن قولداۋ»، – دەدى Halyk قورىنىڭ باس ديرەكتورى ساعىنبەك شۇڭكەەۆ.
ايتا كەتەيىك، Halyk قايىرىمدىلىق قورى 2016 جىلدان بەرى ەلىمىزدە ءبىلىم بەرۋ، سپورت، مادەنيەت، ەكولوگيا جانە ينفراقۇرىلىم باعىتتارىندا 214-تەن استام جوبانى جۇزەگە اسىرىپ، قايىرىمدىلىق ماقساتتارعا 90,4 ملرد تەڭگەدەن استام قارجى ءبولىپ كەلەدى.
