ىلە اۋدانى اۋماعىندا «ECOBUS QK» جشس، «Gold Terra Expedition» جشس، سونداي-اق جەكەلەگەن جەكە تۇلعالاردىڭ مەنشىگىندەگى بىرقاتار جەر تەلىمدەرىندە ۇزاق ۋاقىت بويى قۇرىلىس جانە تۇرمىستىق قالدىقتاردى زاڭسىز تاستاۋ فاكتىلەرى تىركەلىپ كەلەدى.
اتالعان ماسەلەگە بايلانىستى جاقىن ماڭداعى ەلدى مەكەن تۇرعىندارى جەرگىلىكتى اتقارۋشى ورگاندارعا بىرنەشە رەت جۇگىنگەن. تۇرعىندار اۋماقتىڭ سانيتارلىق جاعدايىنا جانە ستيحيالىق قوقىس ورىندارىنىڭ قورشاعان ورتاعا كەرى اسەرىنە الاڭداۋشىلىق بىلدىرۋدە.
جەر تەلىمدەرىن ءتيىستى سانيتارلىق جاعدايدا ۇستاۋ – مەنشىك يەلەرى مەن جەر پايدالانۋشىلارىنىڭ مىندەتى بولعانىنا قاراماستان، وتەگەن باتىر اۋىلدىق وكرۋگى اكىمدىگى تاراپىنان سالدارىن جويۋ بويىنشا بىرنەشە رەت شارالار قابىلداندى. سوڭعى ۋاقىتتا ارنايى تەحنيكانىڭ كومەگىمەن اۋماقتى تازالاۋ جانە قوقىستى شىعارۋ جۇمىستارى كەمىندە ءۇش مارتە ۇيىمداستىرىلدى.
سونىمەن قاتار، جەر تەلىمدەرىنىڭ مەنشىك يەلەرىنە ستيحيالىق قوقىس ورىندارىن جويۋ جانە اۋماقتاردى جەر، ەكولوگيالىق جانە سانيتارلىق زاڭناما تالاپتارىنا سايكەستەندىرۋ قاجەتتىگى تۋرالى رەسمي حابارلامالار جولداندى. بۇدان بولەك، ءتيىستى ماتەريالدار الماتى وبلىسىنىڭ ەكولوگيا دەپارتامەنتىنە، الماتى وبلىسىنىڭ جەر رەسۋرستارىن باسقارۋ دەپارتامەنتىنە، پروكۋراتۋرا جانە پوليتسيا ورگاندارىنا تەكسەرۋ جۇرگىزۋ جانە ءوز قۇزىرەتى شەگىندە شارالار قابىلداۋ ءۇشىن جولداندى.
قازىرگى ۋاقىتتا ۋاكىلەتتى مەملەكەتتىك ورگاندارمەن بىرلەسىپ قوسىمشا باقىلاۋ تەتىكتەرى پىسىقتالۋدا. اتاپ ايتقاندا، ستيحيالىق قوقىس ورىندارى ءجيى پايدا بولاتىن اۋماقتار مەن كىرەبەرىس جولدارعا بەينەباقىلاۋ قۇرالدارىن ورناتۋ ماسەلەسى قاراستىرىلىپ جاتىر.
الماتى وبلىسى تۇرعىن ءۇي-كوممۋنالدىق شارۋاشىلىق جانە اباتتاندىرۋ باسقارماسىنىڭ باسشىسى ديماش قوجابەكوۆتىڭ ايتۋىنشا، نەگىزگى ماقسات – تەك سالدارىن جويۋ ەمەس، ءوز جەر تەلىمدەرىن كۇتىپ-ۇستاۋ بويىنشا شارا قابىلدامايتىن مەنشىك يەلەرىنىڭ، سونداي-اق قالدىقتاردى زاڭسىز توگەتىن تۇلعالاردىڭ جاۋاپكەرشىلىگىن قامتاماسىز ەتۋ.
ء«بىز بارلىق قاجەتتى ماتەريالداردى قۇزىرلى ورگاندارعا جولدادىق. جەر تەلىمدەرىنىڭ قوقىسقا تولۋىنا جول بەرگەن تۇلعالاردى جاۋاپكەرشىلىككە تارتۋعا كۇش سالامىز. ءار ادام قورشاعان ورتاعا جاناشىرلىقپەن قاراپ، ەڭ الدىمەن وزىنەن باستاۋى كەرەك. بۇل تۇرعىندارعا دا، جەكە ۇيىمدارعا دا قاتىستى. ءبىز وسى ماسەلەنى «تازا قازاقستان» باعدارلاماسى اياسىندا تۇراقتى تۇردە كوتەرىپ كەلەمىز»، – دەدى ديماش قوجابەكوۆ.
ءاربىر انىقتالعان قۇقىق بۇزۋشىلىق فاكتىسىنە قۇقىقتىق باعا بەرىلەدى. تەكسەرۋ قورىتىندىسى بويىنشا كىنالى تۇلعالارعا زاڭنامادا كوزدەلگەن جاۋاپكەرشىلىك شارالارى قولدانىلادى.
