Osy aptada "Syrqat júrekti saýyqtyratyn jyrlar" (I.Isaev) jazyp ketken belgili aqyn Jumataı Jaqypbaevtyń syrly da jaýhar jyrlaryna arqaý bolǵan, aqynnyń Mýzasy atanǵan Láılá Dosmuhambetova dúnıeden ozdy.
Kópshilik Láılá Beıisbekqyzynyń shynaıy bolmysy qandaı ekenin bilmese de, Jumataı aqynnyń jyrlarynan bul kisiniń sondaı sulý, názik te bııazy adam ekenin jaqsy biledi.
Shyn ómirde bul kisilerdiń qosylýyna taǵdyr jazbaǵan, degenmen aqyn Láılá Beıisbekqyzynyń beınesin, jan dúnıesin, sulýlyǵyn óz jyrynda keremet sýrettep shyqqan. Tipti aqyn óz Mýzasyna arnap 1981 jyly «Láılá» atty jyr jınaǵyn da shyǵarǵan eken.
"Aıamaıtyn kún bolyp kel – báribir,
Aıalaıtyn tún bolyp kel – báribir.
Seni, Láılá, qara kózdi kıelim,
Qaıyspastan qara jershe súıemin, - dep jyrlaǵan aqyn Láıláǵa essiz ǵashyq bolypty.
Aqyn óz Mýzasyn qalaı keziktirdi degen saýalǵa kelsek, Jumataı aqyn alǵash Láıláni bı keshinde kórip qalǵan. Esikten kirip kelgen sulýǵa birden kózi túsken. Láılá da kelbetti aqynǵa ket ári emes ekenin bildirip, ony bıge shaqyrǵan. Bıge shyqpaı qoıǵan aqynǵa Láılá oramalyn usynyp, shyǵyp ketken. Bul Jumataıdyń Láıláni alǵash kórýi edi.
"Oılamaı júrip jan bar dep jalǵanda kerim,
Álemnen mynaý kóńilim qalǵanda meniń.
Ózińdi kórip óspirim, kózińdi kórip,
"Aqyn bolsam, - dep - ataqty", armandap edim", — dep, sodan bastap aqyn ǵashyqtyq jyrlaryn burqyratyp jaza bastaǵan eken.
Budan keıin óleńdegi Mýzasyn tapqan aqyn súıiktisin ekinshi ret QazMÝ qalashyǵynan syrttaı kórip qalǵan. Ol kezde Láılániń janynda bóten jigit turǵan soń, aqyn jaqyndaýǵa bata almaǵan. Úshinshi ret aýylda kórgen. Máskeýge oqýǵa ketken Láılá elge oralǵanda syrtynan ǵana kórip, kóz qýanyshyna syrttaı tánti bolǵan. Bul týraly óz áńgimelerinde Jumataıdyń jary Zaıda Elǵondınova aıtyp bergen eken.
Osylaısha aqynnyń alyp jyrlaryna arqaý bolǵan Láılá sulý qazaq poezııasynda talaı jandy tánti qylǵan, jumbaq ta bolmysy bólek keıipker boldy.
Endi Láılá Beıisbekqyzy týraly aıtsaq, ol 1946 jyly 4 qazanda dúnıege kelgen. Basynda QazMÝ-ǵa oqýǵa túsken arý keıin úzdik oqyp, kózge túsken soń Máskeý ýnıversıtetine aýysqan. Bul oqý ornynyń tarıh-arhıvtaný fakýltetin bitirgen. Odan soń praktıkada bolyp, keıin sol qalada birjola qalyp qoıǵan. Máskeýde ózge ult ókiline turmysqa shyǵyp, balaly-shaǵaly bolǵan. Osydan biraz jyl buryn zeınetke shyqqan. Osydan birer kún buryn Láılá Beıisbekqyzy ómirden ótti.
"Adyrna" ulttyq portalynyń ujymy Láılá Beıisbekqyzynyń otbasyna, jaqyn-jýyqtaryna qaıǵylaryna ortaqtasyp, kóńil aıtady.
"Adyrna" ulttyq portaly.
