ۇجىمدىق قاۋىپسىزدىك تۋرالى شارت ۇيىمىنا (ۇقشۇ) مۇشە مەملەكەتتەر ارمەنيانىڭ مۇشەلىك جارنالاردى تولەمەۋىنە بايلانىستى وعان سانكتسيا قولدانۋ ماسەلەسىن قاراستىرۋعا كەلىستى. بۇل تۋرالى 10 ماۋسىمدا ۇقشۇ سىرتقى ىستەر مينيسترلەرى كەڭەسىنىڭ وتىرىسىنان كەيىن وتكەن ءباسپاسوز ءماسليحاتىندا رەسەيدىڭ سىرتقى ىستەر ءمينيسترى سەرگەي لاۆروۆ مالىمدەدى، دەپ حابارلايدى «ادىرنا» ءتىلشىسى.
لاۆروۆتىڭ ايتۋىنشا، ارمەنياعا ۇقشۇ جارعىسىنىڭ ءتيىستى بابى قولدانىلۋى مۇمكىن، ويتكەنى ەل ەكى جىلدان بەرى مۇشەلىك جارنالارىن تولەمەگەن.
اڭگىمە ۇقشۇ جارعىسىنىڭ 25-بابى تۋرالى بولىپ وتىر. بۇل باپقا سايكەس، ەگەر مۇشە مەملەكەت ۇيىم بيۋدجەتى الدىنداعى قارىزىن ەكى جىل بويى وتەمەسە، كەڭەس ونىڭ ازاماتتارىن ۇقشۇ قۇرىلىمدارىنداعى كۆوتالىق لاۋازىمدارعا ۇسىنۋ قۇقىعىن توقتاتا الادى. سونداي-اق قارىزى تولىق وتەلگەنگە دەيىن مۇنداي مەملەكەت ۇيىم ورگاندارىندا داۋىس بەرۋ قۇقىعىنان ايىرىلۋى مۇمكىن.
الايدا مۇشەلىك جارنالاردى تولەمەۋ ۇيىمنان اۆتوماتتى تۇردە شىعارىلۋدى بىلدىرمەيدى. مەملەكەتتىڭ ۇقشۇ قىزمەتىنە قاتىسۋىن توقتاتۋ نەمەسە ۇيىمنان شىعارۋ ماسەلەسى جارعىنىڭ 20-بابىمەن رەتتەلەدى. وندا ەل جارعى تالاپتارىن، كەڭەس شەشىمدەرىن جانە ۇقشۇ ورگاندارى قابىلداعان وزگە دە شەشىمدەردى ورىنداماسا، ونىڭ ۇيىم قىزمەتىنە قاتىسۋى توقتاتىلۋى مۇمكىن ەكەنى كورسەتىلگەن. مىندەتتەمەلەردىڭ ورىندالماۋى جالعاسقان جاعدايدا، كەڭەس مەملەكەتتى ۇيىمنان شىعارۋ تۋرالى شەشىم قابىلداي الادى.
ارمەنيا ۇقشۇ-عا مۇشەلىك جارنا تولەۋدەن 2024 جىلى اشىق تۇردە باس تارتقان جانە وسى ۇستانىمىن ءالى كۇنگە دەيىن وزگەرتكەن جوق. ەرەۆان مۇنى ۇيىم جۇمىسىنا ءىس جۇزىندە قاتىسپايتىنىمەن تۇسىندىرەدى.
ارمەنيا مەن ۇقشۇ اراسىنداعى قاتىناستار ەرەۆان ۇيىمدى ەل قاۋىپسىزدىگىنە قاتىستى داعدارىستار كەزىندە ارەكەتسىزدىك تانىتتى دەپ ايىپتاعاننان كەيىن ناشارلاي ءتۇستى.
ۇقشۇ – 1992 جىلعى ۇجىمدىق قاۋىپسىزدىك تۋرالى شارت نەگىزىندە قۇرىلعان اسكەري-ساياسي ۇيىم. قازىرگى تاڭدا وعان قازاقستان، ارمەنيا, بەلارۋس, قىرعىزستان, رەسەي جانە تاجىكستان مۇشە.
