جامبىل وبلىسىندا كوپبالالى اكەلەر مەملەكەتتىك ورگانداردى الداپ، زاڭسىز جاردەماقى الىپ كەلگەن دەپ حابارلايدى "ادىرنا" ۇلتتىق پورتالى «ەۋرازيا» ءبىرىنشى ارناسىنا سىلتەمە جاساپ.
مۇنى «انتيكور» ورتالىعىنىڭ وكىلدەرى انىقتاعان. پىساقايلار جەرداماقىعا ءوتىنىم بەرۋ كەزىندە جالعان دەرەكتەر كورسەتىپ، 14 ميلليون تەڭگەدەن استام قارجىنى قالتالارىنا باسقان. باس-اياعى وڭاي جولمەن ولجالى بولعان 30-عا جۋىق ازاماتتىڭ وسىنداي ارەكەتى اشكەرەلەنىپتى.
جەمقورلىقپەن كۇرەسۋشىلەر مەملەكەتتەن ارناۋلى كومەك الاتىن 124 تۇرعىننىڭ قۇجاتىن تەكسەرىپتى. سويتسە، ولاردىڭ جارتىسىنىڭ عانا وتىنىمدەرى تالاپقا ساي شىققان. ال قالعاندارى جاردەماقىعا ءوتىنىش بەرگەن كەزدە جالعان دەرەكتەردى كورسەتىپ كەلگەن.
اتاپ ايتساق، وزىمەن بىرگە تۇرمايتىن نەمەسە زاڭدى تۇردە اجىراسقان ايەلدەرىنىڭ قولىنداعى بالالاردى باعىپ وتىرمىن دەپ الداعان. زاڭسىز جاردەماقى العان اكەلەر مەملەكەت قارجىسىن قايتارادى.
— ۋاكىلەتتى ورگان تاراپىنان قازىرگى كەزدە وسىنداي 27 ءوتىنىم بويىنشا توقتاتۋ شەشىمى قابىلداعان. ولارعا وسى ۋاقىتقا دەيىن تولەنىپ كەلگەن 14 ميلليونعا جۋىق قاراجاتتى كەرى قايتارۋ بويىنشا شارالار قابىلدانىپ جاتىر. ءوتىنىم بەرگەن ازاماتتاردىڭ ءىس-ارەكەتىندە وسىنداي الاياقتىق بەلگىلەر بايقالۋىنا بايلانىستى ءبىز قازىرگى تاڭدا ونى پروتسەسسۋالدى شەشىم قابىلداۋ ءۇشىن پوليتسيا دەپارتامەنتىنە جولداعان بولاتىنبىز، — دەيدى قر سىبايلاس جەمقورلىققا قارسى ءىس-قيتمىل اگەنتتىگىنىڭ جامبىل وبلىسى بويىنشا دەپارتامەنتىنىڭ باسشىسى داۋرەن وماروۆ.
ايتا كەتۋ كەرەك، قازىرگى تاڭدا جالپى شىعىننىڭ 150 مىڭ تەڭگەسى عانا قازىناعا قايتارىلعان.
"ادىرنا" ۇلتتىق پورتالى.
