ماڭعىستاۋ مەن قىزىلوردا وبلىسىنداعى قۋاڭشىلىق اتىراۋعا دا جەتتى. قازىر يساتاي اۋدانىنداعى بىرنەشە اۋىلدا كانالداعى سۋ تارتىلىپ، سونىڭ كەسىرىنەن جىلقىلار ارام ءولىپ جاتىر. شارۋالار كەڭ جازىق دالانىڭ ءار جەرىندە قۇلاعان مالدارىنىڭ ولەكسەلەرىن جيناپ ءجۇر. بۇل تۋرالى “ادىرنا” ۇلتتىق پورتالى 31 ارنانىڭ "ينفورمبيۋرو" جاڭالىقتار باعدارلاماسىنا سىلتەمە جاساپ حابارلايدى.
"مالىم جانىمنىڭ ساداقاسى" دەپ وتىرعان اۋىلداعىلار جايىلىمنان جىلقى مەن سيىردىڭ ولەكسەسىن جيناپ جۇرگەندەرىن ايتادى. ءتىپتى سۋ ىزدەپ قينالعان مال كانالدىڭ تۇبىندەگى شالشىق سۋدىڭ باتپاعىنا باتىپ، ارام ءولىپ جاتىر دەيدى. ايتۋلارىنشا، كانالدارعا ەكى جىلدان بەرى جارىتىپ سۋ كەلمەي، بيىل مۇلدە قۇرعاپ قالعان. ءتىپتى قۋاڭشىلىقتان جەردە ءشوپ تە جوق. ال كانالعا جاۋاپتى "قازسۋشار" رەسپۋبليكالىق مەملەكەتتىك كاسىپورنى اتىراۋ وبلىسى باسشىلارى سۋ جىبەرۋ بويىنشا جۇمىستار جۇرگىزىپ جاتىرمىز، بىرەر كۇندە جەتەدى دەيدى. سوزدەرىنشە، كانالدىڭ قۇرعاپ قالۋىنا اپتاپ ىستىق پەن ەگىن ناۋقانىنىڭ باستالۋى سەبەپ. بۇل اۋىلدارداعى كانالداردىڭ توزىعى جەتكەنىن جاسىرمادى. وعان تەك رەسپۋبليكالىق بيۋدجەتتەن عانا قارجى قارالادى ەكەن. ال يساتاي اۋدانى اكىمى سۋ تاپشىلىعىنان مالدىڭ ءولىپ جاتقانىن جاسىرعىسى كەلدى مە، ايتەۋىر اقپاراتتى جالعان دەدى.
"سۋ بولماعاندىقتان مالدار دالادا ءولىپ جاتىر دەگەن جالعان اقپارات. جانباي اۋىلىنا اۋدان باسشىلارى كەشە عانا بارىپ كەتتى. اتالعان اۋىلدا سۋ دەڭگەيى ءسال تومەندەۋ. بىراق مالعا جەتكىلىكتى سۋ بار", – دەيدى يساتاي اۋدان اكىمىنىڭ ورىنباسارى ەركەبۇلان ءابىلحاسيموۆ.
ەسكە سالسا،ق بۇعان دەيىن ايماقتاعى قۋاڭشىلىققا بايلانىستى قىزىلوردا وبلىسىندا توتەنشە جاعداي جاريالاعانى ايتىلعان ەدى.
