Mańǵystaý men Qyzylorda oblysyndaǵy qýańshylyq Atyraýǵa da jetti. Qazir Isataı aýdanyndaǵy birneshe aýylda kanaldaǵy sý tartylyp, sonyń kesirinen jylqylar aram ólip jatyr. Sharýalar keń jazyq dalanyń ár jerinde qulaǵan maldarynyń ólekselerin jınap júr. Bul týraly “Adyrna” ulttyq portaly 31 arnanyń "Informbıýro" jańalyqtar baǵdarlamasyna silteme jasap habarlaıdy.
"Malym janymnyń sadaqasy" dep otyrǵan aýyldaǵylar jaıylymnan jylqy men sıyrdyń óleksesin jınap júrgenderin aıtady. Tipti sý izdep qınalǵan mal kanaldyń túbindegi shalshyq sýdyń batpaǵyna batyp, aram ólip jatyr deıdi. Aıtýlarynsha, kanaldarǵa eki jyldan beri jarytyp sý kelmeı, bıyl múlde qurǵap qalǵan. Tipti qýańshylyqtan jerde shóp te joq. Al kanalǵa jaýapty "QazSýshar" respýblıkalyq memlekettik kásiporny Atyraý oblysy basshylary sý jiberý boıynsha jumystar júrgizip jatyrmyz, birer kúnde jetedi deıdi. Sózderinshe, kanaldyń qurǵap qalýyna aptap ystyq pen egin naýqanynyń bastalýy sebep. Bul aýyldardaǵy kanaldardyń tozyǵy jetkenin jasyrmady. Oǵan tek respýblıkalyq bıýdjetten ǵana qarjy qaralady eken. Al Isataı aýdany ákimi sý tapshylyǵynan maldyń ólip jatqanyn jasyrǵysy keldi me, áıteýir aqparatty jalǵan dedi.
"Sý bolmaǵandyqtan maldar dalada ólip jatyr degen jalǵan aqparat. Janbaı aýylyna aýdan basshylary keshe ǵana baryp ketti. Atalǵan aýylda sý deńgeıi sál tómendeý. Biraq malǵa jetkilikti sý bar", – deıdi Isataı aýdan ákiminiń orynbasary Erkebulan Ábilhasımov.
Eske salsa,q buǵan deıin aımaqtaǵy qýańshylyqqa baılanysty Qyzylorda oblysynda tótenshe jaǵdaı jarııalaǵany aıtylǵan edi.
