شىمكەنتتە جىل سوڭىنا دەيىن 10 222 ورىنعا ارنالعان 20 مەكتەپ پايدالانۋعا بەرىلگەلى وتىر. ولاردىڭ ىشىندە 4-ءۋى – مەملەكەتتىك، قالعان 16-سى - جەكەمەنشىك مەكتەپتەر. وسىعان سايكەس، قالا اكىمىنىڭ ءبىرىنشى ورىنباسارى شىڭعىس مۇقان جانە ءبىلىم باسقارماسىنىڭ باسشىسى جانات تاجيەۆا باستاعان سالاعا جاۋاپتىلار قۇرىلىس الاڭدارىن ارالاپ، ءبىلىم نىساندارىنىڭ جاڭا وقۋ جىلىنا دايىندىعىمەن تانىستى.
ەڭ الدىمەن توعىس تۇرعىن الابىندا ورنالاسقان No120 جالپى ورتا مەكتەپكە بارىپ، 300 ورىندىق قوسىمشا وقۋ كورپۋسىنىڭ قۇرىلىسىن كوردى.
ايتا كەتەيىك، مۇندا بۇگىندە قۇرىلىس جۇمىستارى 80 پايىزعا اياقتالعان، شىلدە ايىنان باستاپ اباتتاندىرۋ جۇمىستارى اتقارىلا باستايدى. ءبىلىم عيماراتىن دەر كەزىندە قولدانىسقا بەرۋدى ەسكەرتكەن شىڭعىس جۇمابەكۇلى قۇرىلىسشىلارعا ەڭبەك قاۋىپسىزدىگىن ساقتاۋعا دا ەرەكشە ءمان بەرۋدى تاپسىردى.
سايرام تۇرعىن ءۇي الابى اۋماعىندا ورنالاسقان جالپى الاڭى 3,5 گا الىپ جاتقان 120 ورىندىق ءبىلىم نىسانىنىڭ قوسىمشا قۇرىلىسى دا قارقىندى جۇرگىزىلۋدە. قۇرىلىستى ارالاپ كورگەن قالا باسشىسىنىڭ ءبىرىنشى ورىنباسارى ەڭ الدىمەن ماتەريالداردىڭ توزىمدىلىگى مەن ساپاسىنا دەن قويۋدى جۇكتەدى. سونداي-اق مەردىگەرلەرگە عيماراتتى ارلەۋ جۇمىستارى كەزىندە ديزاينەر ماماندارىمەن دە بايلانىسىپ، جۇمىس جۇرگىزۋدى تاپسىردى.
سالاعا جاۋاپتىلار سايرام شاعىناۋدانىنداعى 300 ورىندىق مەكتەپتىڭ قۇرىلىسىن دا كوزبەن كوردى. قۇرىلىسشىلارعا وندىرىستىك كەستەدەن كەشىكپەي، ءبىلىم عيماراتىن 1-تامىزعا دەيىن تاپسىرۋ قاجەتتىگىن ەسكەرتتى. سونداي-اق، سايرام تۇرعىن الابىنداعى «ياسساۋي» جەكەمەنشىك مەكتەبىنىڭ عيماراتىن دا ارالادى. بۇل اۋماقتاعى مەملەكەتتىك ەكى ءبىلىم وشاعىندا دا بالا سانى شامادان ارتىپ كەتكەن. ءۇش اۋىسىمدى وقىتۋ قاۋپىن الدىن الۋ ءۇشىن زاماناۋي تالاپقا ساي بوي كوتەرگەن وسىناۋ 475 ورىندىق جەكەمەنشىك مەكتەپتى جاڭا وقۋ جىلىنا ىسكە قوسۋ جوسپارى تۇر.
-بۇگىندە ءبىزدىڭ الدىمىزدا ەكى بىردەي مىندەت تۇر. ءبىرى – ءبىلىم ساپاسىن كوتەرۋ بولسا، ەكىنشىسى – مۇعالىمدەردىڭ بىلىكتىگىن ارتتىرۋ. بۇل رەتتە ينفراقۇرىلىمنىڭ دا ماڭىزى ايرىقشا. قالا اكىمى م.ايتەنوۆ بەكىتكەن جوسپارعا سايكەس 2025 جىلعا دەيىن قالادا72 مەكتەپ بوي كوتەرەدى. بيىلدىڭ وزىندە 32 مەكتەپ قۇرىلىسى جۇرگىزىلىپ، جىل سوڭىندا 10 222 ورىنعا ارنالعان 20 مەكتەپ پايدالانۋعا بەرىلگەلى وتىر»، - دەدى ش. مۇقان.
جالپى، شىمكەنت قالاسىندا جىلدان-جىلعا حالىقتىڭ دەموگرافيالىق ءوسىمى بايقالۋدا. سايكەسىنشە ءبىلىم نىساندارىنا دەگەن سۇرانىس ارتىپ كەلەدى. وسى رەتتە، ەلىمىزدەگى جەكە ينۆەستورلاردىڭ ەسەبىنەن سالىنىپ جاتقان مەكتەپتەر سانى بويىنشا بۇگىندە شىمكەنت كوش باستاپ تۇر.
-قازىرگى تاڭدا، قالامىزدا ءۇش اۋىسىمدا 14 مەكتەپ بار جانە 21 مەكتەپتىڭ بالا تولىمدىلىعى شامادان ارتىپ، ءۇش اۋىسىمدىق وقۋعا اۋىسۋ قاۋپى تۋىنداپ وتىر. بيىلعى ەل يگىلىگىنە بەرىلەتىن مەكتەپ قۇرىلىستارىنىڭ ناتيجەسىندە، اپاتتى مەكتەپ ماسەلەسى تولىعىمەن جويىلىپ، ءۇش اۋىسىمدى مەكتەپتەر سانى 14-تەن 9-عا ازايادى. جالپى ءۇش اۋىسىمداعى مەكتەپتەر ماسەلەسىن شەشۋ 2023 جىلعا جوسپارلانۋدا»، - دەدى باسقارما باسشىسى جانات تاجيەۆا.
شىمكەنت قالاسى اكىمدىگىنىڭ ءباسپاسوز قىزمەتى
