Shymkentte jyl sońyna deıin 10 222 orynǵa arnalǵan 20 mektep paıdalanýǵa berilgeli otyr. Olardyń ishinde 4-ýi – memlekettik, qalǵan 16-sy - jekemenshik mektepter. Osyǵan sáıkes, qala ákiminiń birinshi orynbasary Shyńǵys Muqan jáne bilim basqarmasynyń basshysy Janat Tájıeva bastaǵan salaǵa jaýaptylar qurylys alańdaryn aralap, bilim nysandarynyń jańa oqý jylyna daıyndyǵymen tanysty.
Eń aldymen Toǵys turǵyn alabynda ornalasqan No120 jalpy orta mektepke baryp, 300 oryndyq qosymsha oqý korpýsynyń qurylysyn kórdi.
Aıta keteıik, munda búginde qurylys jumystary 80 paıyzǵa aıaqtalǵan, shilde aıynan bastap abattandyrý jumystary atqaryla bastaıdy. Bilim ǵımaratyn der kezinde qoldanysqa berýdi eskertken Shyńǵys Jumabekuly qurylysshylarǵa eńbek qaýipsizdigin saqtaýǵa da erekshe mán berýdi tapsyrdy.
Saıram turǵyn úı alaby aýmaǵynda ornalasqan jalpy alańy 3,5 ga alyp jatqan 120 oryndyq bilim nysanynyń qosymsha qurylysy da qarqyndy júrgizilýde. Qurylysty aralap kórgen qala basshysynyń birinshi orynbasary eń aldymen materıaldardyń tózimdiligi men sapasyna den qoıýdy júktedi. Sondaı-aq merdigerlerge ǵımaratty árleý jumystary kezinde dızaıner mamandarymen de baılanysyp, jumys júrgizýdi tapsyrdy.
Salaǵa jaýaptylar Saıram shaǵynaýdanyndaǵy 300 oryndyq mekteptiń qurylysyn da kózben kórdi. Qurylysshylarǵa óndiristik kesteden keshikpeı, bilim ǵımaratyn 1-tamyzǵa deıin tapsyrý qajettigin eskertti. Sondaı-aq, Saıram turǵyn alabyndaǵy «Iassaýı» jekemenshik mektebiniń ǵımaratyn da aralady. Bul aýmaqtaǵy memlekettik eki bilim oshaǵynda da bala sany shamadan artyp ketken. Úsh aýysymdy oqytý qaýpin aldyn alý úshin zamanaýı talapqa saı boı kótergen osynaý 475 oryndyq jekemenshik mektepti jańa oqý jylyna iske qosý jospary tur.
-Búginde bizdiń aldymyzda eki birdeı mindet tur. Biri – bilim sapasyn kóterý bolsa, ekinshisi – muǵalimderdiń biliktigin arttyrý. Bul rette ınfraqurylymnyń da mańyzy aıryqsha. Qala ákimi M.Áıtenov bekitken josparǵa sáıkes 2025 jylǵa deıin qalada72 mektep boı kóteredi. Bıyldyń ózinde 32 mektep qurylysy júrgizilip, jyl sońynda 10 222 orynǵa arnalǵan 20 mektep paıdalanýǵa berilgeli otyr», - dedi Sh. Muqan.
Jalpy, Shymkent qalasynda jyldan-jylǵa halyqtyń demografııalyq ósimi baıqalýda. Sáıkesinshe bilim nysandaryna degen suranys artyp keledi. Osy rette, elimizdegi jeke ınvestorlardyń esebinen salynyp jatqan mektepter sany boıynsha búginde Shymkent kósh bastap tur.
-Qazirgi tańda, qalamyzda úsh aýysymda 14 mektep bar jáne 21 mekteptiń bala tolymdylyǵy shamadan artyp, úsh aýysymdyq oqýǵa aýysý qaýpi týyndap otyr. Bıylǵy el ıgiligine beriletin mektep qurylystarynyń nátıjesinde, apatty mektep máselesi tolyǵymen joıylyp, úsh aýysymdy mektepter sany 14-ten 9-ǵa azaıady. Jalpy úsh aýysymdaǵy mektepter máselesin sheshý 2023 jylǵa josparlanýda», - dedi basqarma basshysy Janat Tájıeva.
Shymkent qalasy ákimdiginiń baspasóz qyzmeti
