شىمكەنت قالاسى تۋريزم جانە سىرتقى بايلانىستار باسقارماسىنا قاراستى «Visit Shymkent» تۋريستىك-اقپاراتتىق ورتالىعى» كمم-ءى جىل باسىنان بەرى 5 476 ادامعا انىقتامالىق-كونسۋلتاتسيالىق قىزمەت كورسەتتى.
بۇل تۋرالى باسقارما باسشىسىنىڭ مىندەتىن اتقارۋشى ارمان سارسەنوۆ @akimat_shymkent ينستاگرام پاراقشاسىندا وتكەن تىكەلەي ەفيردە 5 ايدا اتقارىلعان جۇمىستارى تۋرالى بايانداماسىندا مالىمدەدى.
شىمكەنت قالاسى تۋريزم جانە سىرتقى بايلانىستار باسقارماسىنىڭ نەگىزگى ماقساتى – ىشكى ءتۋريزمدى دامىتۋ جانە تۋريستىك سالادان تۇسەتىن تابىستى ارتتىرۋ. بۇل رەتتە، ءتۋريزمدى دامىتۋدىڭ 5 باعىتى ايقىندالىپ وتىر. ولار: جۇيەلىك ءىس-شارالار، تۋريستىك ينفراقۇرىلىمدى جاقسارتۋ، ماركەتينگتىك ىلگەرىلەتۋ، سىرتقى بايلانىستاردى جانە مەديتسينالىق ءتۋريزمدى دامىتۋ.
«Visit Shymkent» تۋريستىك-اقپاراتتىق ورتالىعىنىڭ نەگىزگى ماقساتى – تۋريستەر مەن قالا قوناقتارىنا «ءبىر تەرەزە» قاعيداسى بويىنشا اقپاراتتىق-كونسۋلتاتيۆتىك كومەك كورسەتۋ. قالا اۋماعىندا تۋريستەر كوپ شوعىرلاناتىن ورىنداردا (اۋەجاي، تەمىر جول ۆوكزالى، ساياباقتار مەن اربات) 7 اقپاراتتىق دۇڭگىرشەك قىزمەت اتقارادى.
قالادا ورنالاسقان اقپاراتتىق كيوسكىلەر تاراپىنان جىل باسىنان انىقتامالىق-كونسۋلتاتسيالىق قىزمەت كورسەتىلىپ كەلەدى (اقش، ۇلىبريتانيا، ءۇندىستان، ماجارستان، رەسەي، كورەيا، وزبەكستان جانە ت.ب.). قوناقتارعا قالا تۋرالى بۇكتەمەلەر، كىتاپشالار جانە كارتالار تاراتىلىپ، 55 ەكسكۋرسيا وتكىزىلدى.
قالاداعى تۋريزم سالاسىنا قاجەتتى نىسانداردىڭ جاعدايىن انىقتاۋ ءۇشىن تۇگەندەۋ جۇمىستارى جۇرگىزىلدى. تۋريستىك نىسانداردىڭ دەرەك قورى جاساقتالىپ، ساۋالناما ءتۇزىلدى. شىمكەنتتىڭ تۋريستىك الەۋەتىن ىلگەرىلەتۋ ماقساتىندا جىل باسىنان بەرى بىرقاتار مەكەمەلەرمەن 13 مەموراندۋمعا قول قويىلدى.
شىمكەنت قالاسى اكىمدىگىنىڭ ءباسپاسوز قىزمەتى
