شىمكەنت قالاسى جۇمىسپەن قامتۋ جانە الەۋمەتتىك قورعاۋ باسقارماسىنىڭ «اسىل جۇرەك» ورتالىعىندا زەينەتكەرلەرگە جاقسى جاعداي جاسالعان. قازىرگى تاڭدا وندا 80-گە جۋىق زەينەتكەرگە تەگىن قىزمەت كورسەتىلۋدە.
كۇلايشا بويتانوۆا ورتالىقتا ەم الۋشىلاردىڭ ءبىرى. كۇلايشا تولەگەنقىزىنىڭ زەينەتكە شىققانىنا 7 جىل بولعان. ورتالىقتا جەلتوقسان ايىنان بەرى تەگىن قىزمەت تۇرلەرىن الۋدا. 62 جاستاعى زەينەتكەر ورتالىقتاعى كۇن تارتىبىمەن ءبولىستى. ەم الۋشىلار تاڭەرتەڭ كۇندەلىكتى دارىگەرلىك تەكسەرۋدەن وتەدى. وندا قان قىسىمى، تەمپەراتۋرا جانە سالماق ولشەۋ، بەل شەڭبەرىن ديناميكادا باقىلاۋ سەكىلدى جالپى جاعدايىن تەكسەرەدى.
– فيزيوتەراپيا ەمدەۋ بولىمىندە بەلومىرتقا وستەوحوندروزىنا «پوليماگ» اپپاراتىندا ەم الدىم. ءبىر اپتانىڭ ىشىندە بەلىمنىڭ اۋىرعانى ازايىپ، ەركىن قيمىلداي الاتىن بولدىم. سوندىقتان وسى اپپاراتتىڭ ەم ناتيجەسى جاقسى ەكەنىنە كوزىم جەتتى. ورتالىقتا كومپيۋتەرلىك ساۋاتتىلىق، «Egov» ەلەكتروندى ۇكىمەت پورتالى كۋرسىندا ءبىر جولعى جاسىرىن ءسوز، ەلەكتروندىق تسيفرلىق قولتاڭبا الۋ، QR كودپەن كىرۋ جولدارىن ۇيرەندىم. سونداي-اق، يوگا جاتتىعۋلارىنىڭ دا ماعان كوپ كومەگى ءتيدى، – دەيدى ول.
ورتالىق شىمكەنت قالاسى اكىمدىگىنىڭ قاۋلىسىمەن 2019 جىلى 7-ءشى ماۋسىمدا سالتاناتتى تۇردە اشىلدى. مۇندا كارديولوگ، تەراپەۆت، نەۆروپاتولوگ، فيزيو-تەراپەۆت دارىگەر ماماندارى قىزمەت كورسەتەدى.
عيمارات مەديتسينالىق تەكسەرۋدەن ءوتۋ ايماعى، ينتەرنەت - كافە (egov.kz «ەلەكتروندى ۇكىمەت» پورتالى), ەمدىك-ۋقالاۋ جانە كينوزال، كىتاپحانا، ترەناجەرلىق جانە سپورتپەن شۇعىلدانۋ (يوگا، بي، ۇستەل تەننيسى، بيليارد), سەنسورلىق كابينەت، تىلدەر كۋرسى (قازاق ءتىلى، اعىلشىن ءتىلى، لاتىن ءالىپبيى), قولونەرمەن جۇمىس جاساۋ ايماقتارىمەن جابدىقتالعان.
ايتا كەتەيىك، «اسىل جۇرەك» بەلسەندى ۇزاق ءومىر ءسۇرۋ ورتالىعى جارتىلاي ستاتسيونارلىق جاعدايدا ارناۋلى الەۋمەتتىك قىزمەت كورسەتۋ فۋنكتسيالارىن جۇزەگە اسىرۋ ماقساتىندا قۇرىلعان.
شىمكەنت قالاسى اكىمدىگىنىڭ ءباسپاسوز قىزمەتى
