ەلورداداعى نازارباەۆ زياتكەرلىك مەكتەبىنىڭ تۇلەگى قازىبەك توقتاروۆ الەمنىڭ ىرگەلى ۋنيۆەرسيتەتتەرىنەن شاقىرتۋ الدى. اتاپ ايتقاندا، يتاليا، اقش، گونك كونگ، فينليانديا، نيدەرلاند جانە كورەيا ەلدەرىنىڭ جوو-لارى قازاقستاندىق وقۋشىنى ءوز ستۋدەنتتەرىنىڭ قاتارىنان كورگىسى كەلەتىنىن حابارلاعان. «ادىرنا» ءتىلشىسى جاس دارىنمەن تىلدەسىپ، الداعى جوسپارلارى تۋرالى سۇراپ ءبىلدى.
«ماعان اقش-تىڭ Wisconsin-Madison University, Tufts University, Drexel University سىندى جوعارى وقۋ ورىندارى، يتاليانىڭ Padua, Tor Vergata, Messina ۋنيۆەرسيتەتتەرى، گونك كونگتىڭ Hong Kong Baptist ۋنيۆەرسيتەتى، فينليانديانىڭ Lappeenranta University of Technology, نيدەرلاندىنىڭ Maastricht, كورەيانىڭ Gwangju Institute of Science and Technology جانە قازاقستاننىڭ كازگيۋ ۋنيۆەرسيتەتتەرى تولىق ءبىلىم گرانتىن تاعايىندادى. الداعى ۋاقىتتا «سomputer science» باعىتى بويىنشا ءبىلىم الماق نيەتتەمىن. ولارعا ءوتىنىش جىبەرۋ كەزىندە باعدارلامالارىنىڭ تيىمدىلىگى مەن بىرەگەيلىگىن باستى نازارعا الدىم»،— دەدى ول.
ازىرگە قازىبەك قاي وقۋ ورنىن تاڭدايتىنىن ناقتى شەشپەگەن.
«ءالى ويلانۋ ۇستىندەمىن. بالكىم، كورەيا، امەريكا نەمەسە يتالياداعى ۋنيۆەرسيتەتتەردىڭ بىرىندە ءبىلىمىمدى جالعىستىرامىن»،– دەپ جوسپارىمەن ءبولىستى جاس تۇلەك.
NIS وقۋشىسى بىرنەشە ەلدەن شاقىرتۋ كەلەتىنىن الدىن الا سەزگەن.
«گارۆاردقا تۇسكەن دوسىم كەڭەس بەردى. ءوز مۇمكىندىگىمدى ارتتىرۋ ءۇشىن كوپتەگەن ۋنيۆەرسيتەتتەرگە ءوتىنىشىمدى جىبەردىم»،– دەدى ول.
قازىبەك — رەسپۋبليكالىق، حالىقارالىق وليمپيادالار، جوبالىق بايقاۋلار مەن كونفەرەنتسيالاردىڭ جەڭىمپازى.
مۋزىكاعا دەگەن قىزىعۋشىلىعى ەرەكشە.
«مەكتەپتە مۋزىكامەن بەلسەندى اينالىستىم. زياتكەرلىك مەكتەپتىڭ ءانۇرانىن ورىنداپ، مەكتەپتىڭ باس ەر ۆوكاليستى بولدىم. «ەco club»-تىڭ، مەكتەپ وركەسترىنىڭ مۇشەسىمىن، ءتۇرلى مادەني ءىس-شارالاردى ۇيىمداستىرۋعا قاتىستىم»،– دەدى زياتكەر.
اڭگىمە بارىسىندا قازىبەك توقتاروۆ شەتەلدە وقىعىسى كەلەتىن جاندارعا كەڭەس بەردى.
«ۋاقىتىڭىزدى دۇرىس باسقارىپ، ءتيىمدى پايدالانىڭىز. ەڭ الدىمەن جوسپار جاساڭىز جانە ءار قادامدى كەزەڭ-كەزەڭمەن ورىنداڭىز. ءيا، بۇل ومىردەگى قيىن كەزەڭ بولۋى مۇمكىن، بىراق بارلىق جۇمىس ءوز جەمىسىن بەرەدى جانە بولاشاقتا اقتالادى»،– دەپ ءسوزىن قورىتىندىلادى ول.
اڭگىمەلەسكەن ديانا اسان،
«ادىرنا» ۇلتتىق پورتالى
