مايىتتەر اۋىسىپ كەتكەن: ءوز اكەسىنىڭ ورنىنا باسقانى جەرلەي جازدادى

3124
Adyrna.kz Telegram

ەلوردادا كوپسالالى مەديتسينا ورتالىعىنداعى قاتەلىكتىڭ كەسىرىنەن قايعىدا جۇرگەن بالالارى ءوز اكەسىنىڭ ورنىنا باسقا بىرەۋدىڭ دەنەسىن جەرلەي جازدادى. مەديتسينا مەكەمەسىنىڭ قىزمەتكەرلەرى مارقۇمنىڭ ءمايىتىن باسقا بىرەۋمەن شاتاستىرىپ، تارازعا ۇشاقپەن سالىپ جىبەرگەن، دەپ حابارلادى "كتك" تەلەارناسى.

"اشساق، باسقا ءبىر ادام. ءىنىسى بولعان، سول كوردى. ەكى بالاسى كوردى. مەن كوردىم، ول ەمەس بوپ شىقتى. بەينەسى ءبىراز ۇقسايدى. ال ەندى قالعانى قايدا دەسەك، ولار ايتپايدى. "جوق، وسى" دەيدى. وزىنە اكەپ بۇرىنعى سۋرەتپەن سالىستىردىق، مىنە، مىنا ادام، مىنانداي بولاتىن دەدىك. انادا مەڭ بار، مىنادا مەڭ جوق دەگەننەن كەيىن بۇلار قيپىلىقتاي باستادى. تارازعا كەتىپ قالدى دەدى", - دەدى مارقۇمنىڭ تۋىسى كاكەن جانتايۇلى.

بۇگىن تاڭەرتەڭ تارازعا كەتىپ قالعان مارقۇمنىڭ دەنەسى ءتۇس اۋا ۇشاقپەن ەلورداعا قايتا جەتكىزىلدى. اكەلگەن بويى بالالارى مەن تۋىستارى اۋەجايدان كولىككە سالىپ جەرلەۋگە الىپ كەتتى. ايتۋلارىنشا، جەتپىس جاستاعى كىسى ەكى اپتا بويى كوروناۆيرۋسپەن اۋىرىپ، اقىرى بەتى بەرى قاراماي و دۇنيەگە اتتانعان. دارىگەرلەر جاعدايدى بىلاي باياندايدى: ەكى ءمايىت كەشە ينفەكتسيالىق اۋرۋحانادان جەتكىزىلگەن.

كەشە كەشكە ەكى ءمايىتتىڭ ءبىرىنىڭ بالاسى كەلىپ، 63 جاستاعى اكەسىن تانىپ، تارازعا اكەتەتىن بولعان. سول تارتىپپەن بۇگىن تاڭەرتەڭ سول ءمايىت تارازعا جىبەرىلگەن. الايدا تارازدا جەرلەنۋى ءتيىس بولعان كىسىنىڭ بالاسى جاعدايدى باسقاشا ءتۇسىندىردى. ايتۋىنشا، كەشە ءوزى كەلىپ اكەسىنىڭ دەنەسى قايسى ەكەنىن كورسەتىپ كەتكەن. وسى بىلىقتىڭ كەسىرىنەن ءوز اكەسىنىڭ دەنەسى تارازعا بۇگىن كەشكە جەتكىزىلەيىن دەپ تۇر. سوندىقتان دارىگەرلەردى سالعىرتتىعى ءۇشىن سوتقا بەرۋگە بەكىنگەن. اق حالاتتىلار كىناسىن مويىنداپ، مارقۇمداردىڭ تۋىستارىنان كەشىرىم سۇرادى. سونداي-اق شاتاسقان ءمايىتتى تارازدان قايتارىپ اكەلۋ شىعىنىن دا ءوز قالتاسىنان تولەگەن.

"زەرتحاناشى ءمايىتتىڭ بەتىن اشىپ كورسەتىپ سۇراعان بالاسىنان: ء"سىزدىڭ اكەڭىز بە؟" دەپ سۇراعان. ول: ء"يا، مەنىڭ اكەم" دەگەن. ودان كەيىن ءراسىم قىزمەتىمەن بىرگە كەلدى دەيدى. مىرىش تابىتقا سالىپ الىپ كەتتى دەيدى. ودان كەيىن ەكىنشى مايىتكە بالاسى تاڭەرتەڭ كەلگەن. تۋىستارىمەن. ولار اشىپ قاراعان كەزدە ءمايىت بوتەن بولىپ شىققان. سول ەكەۋىنىڭ ورنى اۋىسىپ كەتكەن", - دەدى نۇر-سۇلتان قالاسى كوپسالالى مەديتسينا ورتالىعى ديرەكتورىنىڭ ەمدەۋ جۇمىسى جونىندەگى ورىنباسارى باقتىباي ورازبەكوۆ.

«ادىرنا» ۇلتتىق پورتالى

پىكىرلەر