«الاش-جولى» عىلىمي-زەرتتەۋ ەكسپەديتسياسىنىڭ مۇشەلەرى قارمتۋ ستۋدەنتتەرىمەن كەزدەستى

3231
Adyrna.kz Telegram

2017 جىلدىڭ 6 قاراشاسى كۇنى قارمتۋ-دىڭ ءبىرىنشى كورپۋسىنداعى  № 207 اۋديتورياسىندا  الاش قوزعالىسىنىڭ 100-جىلدىعىنا وراي ۇيىمداستىرىلعان رەسپۋبليكالىق «الاش-جولى» عىلىمي-زەرتتەۋ  ەكسپەديتسياسىنا قاتىسۋشى عالىمدار ءبىلىم  وردامىزدىڭ ستۋدەنتتەرىمەن كەزدەستى.

ەكسپەديتسيا مارشرۋتى الاش قوزعالىسىنىڭ قايراتكەرلەرى تۋىپ-وسكەن، قىزمەت ەتكەن سەمەي، استانا جانە قاراعاندى وڭىرلەرىنەن وتۋدە. سەمەي قالاسىندا  ەكسپەديتسيا مۇشەلەرى ساپاردىڭ «الاش قالا» دەپ اتالاتىن ءبولىمىن ءجۇرىپ ءوتىپ، وندا الاشوردانىڭ نەگىزىن قالاۋشى قايراتكەرلەردىڭ  ۇرپاقتارىمەن كەزدەىسىپ، بىرقاتار مالىمەتتەر جيناعان. ال استانا جانە قاراعاندى قالالارىنداعى ساپارلارىندا «الجير»  جانە قارلاگ لاگەرلەرىنىڭ ورنىندا بولىپ، ساياسي قۋعىن-سۇرگىن قۇرباندارىنىڭ باسىنان وتكەرگەن قيىندىقتارى جايلى جاڭا دەرەكتەر جيناعان. ەكسپەديتسيانىڭ ەندىگى نىسانى جەزقازعان جانە باياناۋىل ايماعىندا جالعاسىن تابادى.

جالپى ەكسپەديتسيا الاش قوزعالىسى جانە ونىڭ يدەيالارىن العا  تارتقان قايراتكەرلەردىڭ ءومىرى، قىزمەتى جايلى دەرەكتى فيلم ءتۇسىرۋدى ماقسات ەتىپ، جولعا شىققان.

كەزدەسۋدە ءوز زەرتتەۋلەرى جايىندا ستۋدەنتتەرگە «ادىرنا» ۇلتتىق-ەتنوگرافيالىق ۇيىمنىڭ ديرەكتورى،  ەتنوگراف، جۋرناليست، ر.ب. سۋلەيمەنوۆ اتىنداعى شىعىستانۋ ينستيتۋتىنىڭ PhD دوكتورانتى – ارمان اۋباكىر،  حالىقارالىق «كوشپەندىلەر تسيۆيليزاتسياسى مۇراسى»   قوعامدىق قورىنىڭ پرەزيدەنتى، ەتنوگراف، تۇركولوگ، نوماديست، «ۇلى دالا كوشپەندىلەرى» جۋرنالىنىڭ رەداكتورى – باتىرجان سەيدومار، جوبا كوورديناتورى دايىر قىدىرعاليۇلى اڭگىمەلەپ بەردى. ءىس-شارانى ۋنيۆەرسيتەتىمىزدىڭ قازاقستان تاريحى كافەدراسىنىڭ وقىتۋشىسى ايدار وتاربەكۇلى جەتپىسباەۆ جۇرگىزدى.

ءجۇرىپ وتكەن جولداردا جيناعان قۇندى تاريحي دەرەكتەر، العان سۇقباتتارى جونىندە بايانداي كەلىپ، ەكسپەديتسيا مۇشەلەرى قارمتۋ باسشىلىعى جانە وقىتۋشىلار قۇرامىنا  ستۋدەنت جاستارمەن وسىنداي ءماندى كەزدەسۋلەردى ۇيىمداستىرىپ،  مەملەكەت باسشىسىنىڭ «بولاشاققا باعدار: رۋحاني جاڭعىرۋ» باعدارلاماسى اياسىندا «ادىرنا» ۇلتتىق-ەتنوگرافيالىق ۇيىمىنىڭ  الاش قوزعالىسىنىڭ 100-جىلدىعىنا وراي ۇيىمداستىرىلعان «الاش-جولى» عىلىمي-زەرتتەۋ  ەكسپەديتسياسىنىڭ زەرتتەۋلەرىن ناسيحاتتاۋعا قولداۋ كورسەتىپ، ەل تاريحىنا، تاريحقا دەگەن قۇرمەتتەرىن كورسەتىپ وتىرعاندىعى ءۇشىن  العىستارىن ءبىلدىردى. جوبا كوورديناتورى دايىر قىدىرعاليۇلى ءۇش جىل بويى قارمتۋ  قابىرعاسىندا «تۇرىك جازۋى كۇنىن» وتكىزىلەتىندىگىن دە ريزاشىلىقپەن اتاپ ءوتتى. «بۇنىڭ ءبارى تەحنيكالىق باعىتتا ءبىلىم بەرەتىن جوو ورنى بولسا دا، قارمتۋ-دىڭ ءوز ءبىلىم الۋشىلارىن، بولاشاق قازاقستان ازاماتتارىن يدەيالىق-رۋحاني جانە پاتريوتتىق تۇرعىدان تاربيەلەۋ ىسىنە اسا ۇلكەن كوڭىل بولەتىن بىردەن-ءبىر ءبىلىم ورداسى ەكەندىگىنىڭ دالەلى»،- دەدى زەرتتەۋشى.  

پىكىرلەر