رەسەيدە ان-26 جولاۋشىلار ۇشاعى اپاتقا ۇشىرادى، دەپ حابارلايدى «ادىرنا» ۇلتتىق پورتالى Sputnik قازاقستان سايتىنا سىلتەمە جاساپ.
رەسمي مالىمەتكە سايكەس، جولاۋشىلار ۇشاعى پەتروپاۆلوۆسك-كامچاتسكي قالاسىنان پالانا كەنتىنە ادام تاسىمالداعان. وسى جولى تۋرا جەرگە قوناردىڭ الدىندا بايلانىسقا شىقپاي قالدى.
الدىن الا بولجام بويىنشا اۋە كەمەسى تەڭىزگە قۇلاعان. سەبەبى پالانا كەنتىنە دەيىن 9 شاقىرىمداي قالعاندا بايلانىس ءۇزىلىپ كەتتى. بورتتا ەكيپاجدىڭ 6 مۇشەسى جانە 22 جولاۋشى، ولاردىڭ اراسىندا 6 جانە 17 جاستاعى بالالار دا بولعان.
جەرگىلىكتى بيلىك ۇشاقتا بولعان جولاۋشىلاردىڭ ءتىزىمىن جاريالادى. وندا پالانا كەنتى اكىمشىلىگىنىڭ ءتورت قىزمەتكەرى دە بار. ولار – كەنت باسشىسى ولگا موحيرەۆا، جۇمىلدىرۋ ءبولىمىنىڭ باسشىسى الەكساندر اندرەيكين، قارجى باسقارماسىنىڭ باسشىسى ولگا اندرەيكينا، ءبىلىم بەرۋ، الەۋمەتتىك قورعاۋ، مادەنيەت جانە سپورت ءبولىمى باسشىسىنىڭ ورىنباسارى يۋليا سۋروۆتسەۆا.
قازىرگى كەزدە قۇتقارۋشىلار ۇشاق قۇلاعان ايماقتى انىقتادى. ول جەرگە تەڭىز كەمەلەرى جىبەرىلىپ وتىر. سونداي-اق، پالانا كەنتىنە قۇتقارۋشىلار، دارىگەرلەر مەن پسيحولوگتار مىنگەن تىكۇشاق اتتاندى. ارنايى كوميسسيا قۇرىلدى. قۇقىق قورعاۋ ورگاندارى قىلمىستىق ءىس قوزعادى. جەرگىلىكتى ۇكىمەت ۇشاقتىڭ ءتيىستى كۋالىگى بار ەكەنىن، ال ەكيپاج رەيسكە دەيىنگى تەكسەرىستەن وتكەنىن حابارلادى.
اپاتقا ۇشىراعان اۋە كەمەسىندە 35 جاستاعى يۆان سيۆاك تا بولدى. ول اۋەجايدا جانە سالوننىڭ ىشىندە تۇسكەن فوتوسىن جاريالاعان بولاتىن.
«پالانا، كۇت، مەن ۇشىپ كەلەمىن»، - دەلىنگەن فوتونىڭ استىنداعى جازۋدا.
"ادىرنا" ۇلتتىق پورتالى
