Reseıde An-26 jolaýshylar ushaǵy apatqa ushyrady, dep habarlaıdy «Adyrna» ulttyq portaly Sputnik Qazaqstan saıtyna silteme jasap.
Resmı málimetke sáıkes, jolaýshylar ushaǵy Petropavlovsk-Kamchatskıı qalasynan Palana kentine adam tasymaldaǵan. Osy joly týra jerge qonardyń aldynda baılanysqa shyqpaı qaldy.
Aldyn ala boljam boıynsha áýe kemesi teńizge qulaǵan. Sebebi Palana kentine deıin 9 shaqyrymdaı qalǵanda baılanys úzilip ketti. Bortta ekıpajdyń 6 múshesi jáne 22 jolaýshy, olardyń arasynda 6 jáne 17 jastaǵy balalar da bolǵan.
Jergilikti bılik ushaqta bolǵan jolaýshylardyń tizimin jarııalady. Onda Palana kenti ákimshiliginiń tórt qyzmetkeri de bar. Olar – kent basshysy Olga Mohıreva, jumyldyrý bóliminiń basshysy Aleksandr Andreıkın, qarjy basqarmasynyń basshysy Olga Andreıkına, bilim berý, áleýmettik qorǵaý, mádenıet jáne sport bólimi basshysynyń orynbasary Iýlııa Sýroveva.
Qazirgi kezde qutqarýshylar ushaq qulaǵan aımaqty anyqtady. Ol jerge teńiz kemeleri jiberilip otyr. Sondaı-aq, Palana kentine qutqarýshylar, dárigerler men psıhologtar mingen tikushaq attandy. Arnaıy komıssııa quryldy. Quqyq qorǵaý organdary qylmystyq is qozǵady. Jergilikti úkimet ushaqtyń tıisti kýáligi bar ekenin, al ekıpaj reıske deıingi tekseristen ótkenin habarlady.
Apatqa ushyraǵan áýe kemesinde 35 jastaǵy Ivan Sıvak ta boldy. Ol áýejaıda jáne salonnyń ishinde túsken fotosyn jarııalaǵan bolatyn.
«Palana, kút, men ushyp kelemin», - delingen fotonyń astyndaǵy jazýda.
"Adyrna" ulttyq portaly
