قازاقستان پرەزيدەنتى قاسىم-جومارت توقاەۆتىڭ تاپسىرماسى بويىنشا ەلوردا كۇنىنە وراي نۇر-سۇلتان قالاسىندا حالىق كومپوزيتورى، داۋلەسكەر كۇيشى دينا نۇرپەيىسوۆانىڭ ەسكەرتكىشى اشىلدى دەپ حابارلايدى "ادىرنا" ۇلتتىق پورتالى "akorda.kz-كە" سىلتەمە جاساپ.
سالتاناتتى شاراعا قر مەملەكەتتىك حاتشىسى قىرىمبەك كوشەرباەۆ قاتىستى.
– ءبىز بۇگىن قازاق ءۇشىن قادىرلى، الاش ءۇشىن اياۋلى دينا نۇرپەيىسوۆانىڭ ەسكەرتكىشىن سالتاناتتى تۇردە اشىپ وتىرمىز. جوبانى ىسكە اسىرعان نۇر-سۇلتان قالاسىنىڭ اكىمدىگىنە، قولداۋ كورسەتكەن اتىراۋ وبلىسىنىڭ جۇرتشىلىعىنا، ءمۇسىنشى باۋىرحان جالىنعا ريزاشىلىعىمىزدى بىلدىرەمىز. بۇل – ۇلتتىق ونەرگە، اسىل مۇراعا، بابالار ۇنىنە، اتالار داستۇرىنە قويىلعان ەسكەرتكىش. وتكەنگە سالاۋات، بولاشاققا امانات ايتا وتىرىپ، قازاقتىڭ قارا دومبىراسىنان كيە قاشپاسىن، قارا شاڭىراعىنان بەرەكە كەتپەسىن دەپ تىلەيمىز، – دەدى قىرىمبەك كوشەرباەۆ.
ءىس-شاراعا پرەمەر-ءمينيستردىڭ ورىنباسارى ەرالى توعجانوۆ، قر پرەزيدەنتىنىڭ اكىمشىلىگى باسشىسىنىڭ ءبىرىنشى ورىنباسارى داۋرەن اباەۆ، مادەنيەت جانە سپورت ءمينيسترى اقتوتى رايىمقۇلوۆا، نۇر-سۇلتان قالاسىنىڭ اكىمى التاي كولگىنوۆ، اتىراۋ وبلىسىنىڭ اكىمى ماحامبەت دوسمۇحامبەتوۆ، كۇيشى ايگۇل ۇلكەنباەۆا جانە باسقا دا قوعام وكىلدەرى قاتىستى.
سونداي-اق مەملەكەت باسشىسى قاسىم-جومارت توقاەۆتىڭ تاپسىرماسى بويىنشا نۇر-سۇلتان قالاسىندا ايگىلى عالىم قانىش ساتباەۆقا ەسكەرتكىش ورناتىلدى.
جوبانى پاۆلودار وبلىسىنىڭ اكىمدىگى مەن عالىمنىڭ جەرلەستەرى – باياناۋىل جۇرتشىلىعى جانە ءمۇسىنشى اسقار نارتوۆ جۇزەگە اسىرعان.
"ادىرنا" ۇلتتىق پورتالى.
