Qazaqstan Prezıdenti Qasym-Jomart Toqaevtyń tapsyrmasy boıynsha Elorda kúnine oraı Nur-Sultan qalasynda halyq kompozıtory, dáýlesker kúıshi Dına Nurpeıisovanyń eskertkishi ashyldy dep habarlaıdy "Adyrna" ulttyq portaly "akorda.kz-ke" silteme jasap.
Saltanatty sharaǵa QR Memlekettik hatshysy Qyrymbek Kósherbaev qatysty.
– Biz búgin qazaq úshin qadirli, Alash úshin aıaýly Dına Nurpeıisovanyń eskertkishin saltanatty túrde ashyp otyrmyz. Jobany iske asyrǵan Nur-Sultan qalasynyń ákimdigine, qoldaý kórsetken Atyraý oblysynyń jurtshylyǵyna, músinshi Baýyrhan Jalynǵa rızashylyǵymyzdy bildiremiz. Bul – ulttyq ónerge, asyl muraǵa, babalar únine, atalar dástúrine qoıylǵan eskertkish. Ótkenge salaýat, bolashaqqa amanat aıta otyryp, qazaqtyń qara dombyrasynan kıe qashpasyn, qara shańyraǵynan bereke ketpesin dep tileımiz, – dedi Qyrymbek Kósherbaev.
Is-sharaǵa Premer-Mınıstrdiń orynbasary Eraly Toǵjanov, QR Prezıdentiniń Ákimshiligi Basshysynyń birinshi orynbasary Dáýren Abaev, Mádenıet jáne sport mınıstri Aqtoty Raıymqulova, Nur-Sultan qalasynyń ákimi Altaı Kólginov, Atyraý oblysynyń ákimi Mahambet Dosmuhambetov, kúıshi Aıgúl Úlkenbaeva jáne basqa da qoǵam ókilderi qatysty.
Sondaı-aq Memleket basshysy Qasym-Jomart Toqaevtyń tapsyrmasy boıynsha Nur-Sultan qalasynda áıgili ǵalym Qanysh Sátbaevqa eskertkish ornatyldy.
Jobany Pavlodar oblysynyń ákimdigi men ǵalymnyń jerlesteri – Baıanaýyl jurtshylyǵy jáne músinshi Asqar Nartov júzege asyrǵan.
"Adyrna" ulttyq portaly.
