ۋكراينادا ون جاستاعى جەتكىنشەك ەرتە قارتايۋ سالدارىنان كوز جۇمدى. يرا ءحيميچتىڭ قايتىس بولعانى تۋرالى ونىڭ اناسى Facebook-تەگى پاراقشاسىندا جازدى، دەپ حابارلايدى «ادىرنا» ۇلتتىق پورتالى Sputnik قازاقستان سايتىنا سىلتەمە جاساپ.
«يرا كوز جۇمدى. كەشە ونىڭ جۇرەگى توقتادى. سەنى وسى جولى قۇتقارا الماعانىمىز ءۇشىن ءبىزدى كەشىر»، - دەپ جازدى دينا حيميچ.
قىز بالا پروگەريا اتتى ەمدەلمەيتىن سيرەك كەزدەسەتىن گەنەتيكالىق اۋرۋعا شالدىققان، ونى حاتچينسون-گيلفورد سيندرومى دەپ تە اتايدى.
يرانىڭ اناسى الەۋمەتتىك جەلىدە قىزىنىڭ سۋرەتتەرىن جاريالاپ، ونىڭ وقۋداعى جەتىستىكتەرى مەن قايىرىمدىلىق اكتسيالارىنا قاتىسقانى تۋرالى تۇراقتى جازىپ كەلگەن.
پروگەريا – بالالاردا كەزدەسەتىن كلينيكالىق تۇرعىدا مەرزىمىنەن بۇرىن قارتايۋ بەلگىلەرى بار گەنەتيكالىق اۋرۋ.
بۇل دەرت تەرى جانە ىشكى ورگانداردىڭ وزگەرۋىن تۋدىرادى. ادەتتە ءسابي بىرنەشە اي قالىپتى دامىپ، ودان كەيىن كەرى قايتارىلمايتىن وزگەرىستەر پايدا بولادى دا، قارتايۋ پروتسەسى ۇدەي تۇسەدى.
بۇگىندە بالالارداعى پروگەريا كەزىندە ءومىر ءسۇرۋ ۇزاقتىعى 13 جاستى قۇرايدى. بۇل اۋرۋ كوپ جاعدايدا بالانىڭ ەكى-ءۇش جاسىندا انىقتالادى. يرينا حيميچكە بۇل دياگنوز بەس جاسىندا قويىلدى.
"ادىرنا" ۇلتتىق پورتالى
