سولتۇستىك قازاقستاندا جايىلىم تاپشىلىعىنا بايلانىستى اۋىل تۇرعىندارى مالدى جاپپاي قىرۋعا ءماجبۇر. ماسەلە جەردى كاسىپورىندارعا ەگىن ەگۋگە بەرگەننەن كەيىن پايدا بولدى، - دەپ حابارلايدى “ادىرنا” ۇلتتىق پورتالى "استانا" تەلەارناسىنا سىلتەمە جاساپ.
تەلەارنا مالىمەتى بويىنشا، بەرەزوۆكا اۋىلىندا ەكى جىل بۇرىن جاس مالدى ەسەپتەمەگەندە 200-گە جۋىق سيىر بولعان. قازىر شامامەن 30 باس سيىر قالعان. تۇرعىندار مالدى قايدا جايارىن بىلمەيدى.
"مەندە 10 باس جىلقى بار، ونى 300 شاقىرىمداعى قۇداما اپارىپ تاستادىم. مال جاياتىن جەر جوق. اۋىلدا تۇرامىز، جايىلىم جوق، شابىندىق جوق، اينالانىڭ ءبارىن جىرتىپ تاستادى. قىستا بەرەتىن جەم-ءشوپ جوق. ەشكىمدە شابىندىق جوق. مەنىڭ ويىمشا، اۋىلدا قالعان 30 باس مالدان دا ەشتەڭە قالمايدى. سويادى نەمەسە باسقا جاققا اپارادى", - دەيدى اۋىل تۇرعىنى شارنياس رۇستەنوۆ.
ماكسيم يششۋك اۋىلعا پەتروپاۆلدان شارۋاشىلىق جۇرگىزۋ ءۇشىن كوشىپ كەلگەن ەكەن. بىراق جايىلىم تاپشىلىعى جوسپاردى بۇزعان. تۇرعىندار ءتىپتى جەكە قاجەتى ءۇشىن دە مال باعا المايتىن جاعدايعا جەتكەن. ولاردىڭ ايتۋىنشا جەردىڭ ءبارى ەگىن ەگۋگە بەرىلگەن، دەيدى تەلەارنا ءتىلشىسى.
"جەردىڭ بارىنە ەگىن ەگىلگەن. سيىردى جاياتىن جەر جوق. قويلاردى مامليۋت اۋدانىنا اپارۋعا تۋرا كەلدى، ويتكەنى باسقا امال جوق. سيىرلار ءسۇت بەرمەيدى، بۇزاۋلار دا سالماعىن جوعالتتى. اۋىل شارۋاشىلىعىن دامىتۋ ءۇشىن نەسيە العىم كەلگەن. ەندى قايداعى نەسيە؟" - دەپ شاعىمدانادى ەر ادام.
شەنەۋنىكتەر جايىلىم تاپشىلىعى فەرمەرلەردىڭ جاپپاي ەگىن ەگۋىنە بايلانىستى تۋىنداعانىن مويىندايدى.
"جشس، شارۋا قوجالىقتارى بايقاۋ ارقىلى جەڭىپ الدى. ءسويتىپ جەرلەرىن جىرتا باستادى. بۇرىن ول جەرلەر پايدالانىلماعان. وسىعان بايلانىستى جايىلىم جەتىسپەۋشىلىگى تۋىندادى", - دەيدى قىزىلجار اۋدانى روششين اۋىلدىق وكرۋگى اكىمى اپپاراتىنىڭ باس مامانى بيبىگۇل مۋسينا.
اۋىل شارۋاشىلىعى باسقارماسىندا ءوڭىردىڭ جارتىسىندا جايىلىم تاپشىلىعى بايقالاتىنىن ءتۇسىندىردى. مىسالى، بەرەزوۆكادا 500 گەكتارعا جۋىق جەر جەتىسپەيدى.
بيىل شەنەۋنىكتەر 77 مىڭ گەكتار جەردى الىپ، ولاردى جايىلىم مارتەبەسىنە قايتارعان. بەرەزوۆكاعا كەلەتىن بولساق، اۋىل شارۋاشىلىعى باسقارماسى مالدى اسكەري پوليگون ارقىلى ايداپ ءوتۋ مۇمكىندىگى تۋرالى كەلىسسوز جۇرگىزۋگە ۋادە بەردى.
