Soltústik Qazaqstanda jaıylym tapshylyǵyna baılanysty aýyl turǵyndary maldy jappaı qyrýǵa májbúr. Másele jerdi kásiporyndarǵa egin egýge bergennen keıin paıda boldy, - dep habarlaıdy “Adyrna” ulttyq portaly "Astana" telearnasyna silteme jasap.
Telearna málimeti boıynsha, Berezovka aýylynda eki jyl buryn jas maldy eseptemegende 200-ge jýyq sıyr bolǵan. Qazir shamamen 30 bas sıyr qalǵan. Turǵyndar maldy qaıda jaıaryn bilmeıdi.
"Mende 10 bas jylqy bar, ony 300 shaqyrymdaǵy qudama aparyp tastadym. Mal jaıatyn jer joq. Aýylda turamyz, jaıylym joq, shabyndyq joq, aınalanyń bárin jyrtyp tastady. Qysta beretin jem-shóp joq. Eshkimde shabyndyq joq. Meniń oıymsha, aýylda qalǵan 30 bas maldan da eshteńe qalmaıdy. Soıady nemese basqa jaqqa aparady", - deıdi aýyl turǵyny Sharnııas Rústenov.
Maksım Iýk aýylǵa Petropavldan sharýashylyq júrgizý úshin kóship kelgen eken. Biraq jaıylym tapshylyǵy jospardy buzǵan. Turǵyndar tipti jeke qajeti úshin de mal baǵa almaıtyn jaǵdaıǵa jetken. Olardyń aıtýynsha jerdiń bári egin egýge berilgen, deıdi telearna tilshisi.
"Jerdiń bárine egin egilgen. Sıyrdy jaıatyn jer joq. Qoılardy Mamlıýt aýdanyna aparýǵa týra keldi, óıtkeni basqa amal joq. Sıyrlar sút bermeıdi, buzaýlar da salmaǵyn joǵaltty. Aýyl sharýashylyǵyn damytý úshin nesıe alǵym kelgen. Endi qaıdaǵy nesıe?" - dep shaǵymdanady er adam.
Sheneýnikter jaıylym tapshylyǵy fermerlerdiń jappaı egin egýine baılanysty týyndaǵanyn moıyndaıdy.
"JShS, sharýa qojalyqtary baıqaý arqyly jeńip aldy. Sóıtip jerlerin jyrta bastady. Buryn ol jerler paıdalanylmaǵan. Osyǵan baılanysty jaıylym jetispeýshiligi týyndady", - deıdi Qyzyljar aýdany Roın aýyldyq okrýgi ákimi apparatynyń bas mamany Bıbigúl Mýsına.
Aýyl sharýashylyǵy basqarmasynda óńirdiń jartysynda jaıylym tapshylyǵy baıqalatynyn túsindirdi. Mysaly, Berezovkada 500 gektarǵa jýyq jer jetispeıdi.
Bıyl sheneýnikter 77 myń gektar jerdi alyp, olardy jaıylym mártebesine qaıtarǵan. Berezovkaǵa keletin bolsaq, aýyl sharýashylyǵy basqarmasy maldy áskerı polıgon arqyly aıdap ótý múmkindigi týraly kelissóz júrgizýge ýáde berdi.
