اقتوبە وبلىسىندا 2021-2022 وقۋ جىلىندا جوعارى جانە جوعارى وقۋ ورنىنان كەيىنگى ءبىلىمى بار مامانداردى سۇرانىسقا يە كاسىپكە دايارلاۋ ءۇشىن 80 گرانت بولىنەتىن بولدى دەپ حابارلايدى "ادىرنا" ۇلتتىق پورتالىنىڭ ءتىلشىسى.
وسىلايشا بيىل گرانت ماتەماتيكا، فيزيكا، حيميا جانە باستاۋىش سىنىپ مۇعالىمدەرىن، ناقتى سالاعا ماماندانعان دارىگەرلەردى، اگرونومدار مەن اقپاراتتىق تەحنولوگيا ماماندارىن دايىنداۋعا بولىنەتىن بولادى دەپ شەشىم قابىلداندى. گرانت يەگەرلەرىنىڭ ءتىزىمى وسى جىلدىڭ 15-27 تامىزى ارالىعىندا جاريالانادى.
بۇل ماسەلەگە قاتىستى اقتوبە وبلىسىنىڭ اكىمى و.ورازالين: "گرانت الاتىن ءاربىر ۇمىتكەرمەن الدىن الا ءتۇسىندىرۋ جۇمىسى جۇرگىزىلۋى كەرەك. ول تۋعان ولكەسىنىڭ ونىڭ وقۋىن نە سەبەپتى قارجىلاندىرىپ وتىرعانىن بىلۋگە ءتيىس. كەلەشەكتە ول بۇل گرانتتى ءوزىنىڭ تۋعان جەرىنە قىزمەتىمەن وتەيدى»، — دەدى.
ايتا كەتۋ كەرەك، اقتوبە وبلىسى اكىمىنىڭ گرانتى تالاپكەرلەرگە 2018 جىلدان بەرى بەرىلىپ كەلەدى. ءاربىر گرانت يەسى وقۋدى اياقتاعان سوڭ ماماندىعى بويىنشا بەلگىلى ءبىر ۋاقىت وبلىس اۋماعىندا ەڭبەك ەتۋگە مىندەتتى.
"ادىرنا" ۇلتتىق پورتالى.
