Aqtóbe oblysynda 2021-2022 oqý jylynda joǵary jáne joǵary oqý ornynan keıingi bilimi bar mamandardy suranysqa ıe kásipke daıarlaý úshin 80 grant bólinetin boldy dep habarlaıdy "Adyrna" ulttyq portalynyń tilshisi.
Osylaısha bıyl grant matematıka, fızıka, hımııa jáne bastaýysh synyp muǵalimderin, naqty salaǵa mamandanǵan dárigerlerdi, agronomdar men aqparattyq tehnologııa mamandaryn daıyndaýǵa bólinetin bolady dep sheshim qabyldandy. Grant ıegerleriniń tizimi osy jyldyń 15-27 tamyzy aralyǵynda jarııalanady.
Bul máselege qatysty Aqtóbe oblysynyń ákimi O.Orazalın: "Grant alatyn árbir úmitkermen aldyn ala túsindirý jumysy júrgizilýi kerek. Ol týǵan ólkesiniń onyń oqýyn ne sebepti qarjylandyryp otyrǵanyn bilýge tıis. Keleshekte ol bul grantty óziniń týǵan jerine qyzmetimen óteıdi», — dedi.
Aıta ketý kerek, Aqtóbe oblysy ákiminiń granty talapkerlerge 2018 jyldan beri berilip keledi. Árbir grant ıesi oqýdy aıaqtaǵan soń mamandyǵy boıynsha belgili bir ýaqyt oblys aýmaǵynda eńbek etýge mindetti.
"Adyrna" ulttyq portaly.
