شىمكەنتتە قازاقستان رەسپۋبليكاسىنىڭ مەملەكەتتىك رامىزدەر كۇنى مەرەكەسىنە وراي ەستافەتا تۇرىندە اۆتوكولىكتەر شەرۋى باستالدى.
ءىس-شارانىڭ ماقساتى - مەملەكەتتىك رامىزدەردىڭ ەلىمىزدىڭ دەربەستىگى مەن تاۋەلسىزدىگىن بۇكىل الەمگە تانىتۋشى ءارى مەملەكەتىمىزدىڭ وتكەنى مەن بۇگىنى جانە بولاشاعى اراسىنداعى ساباقتاستىقتىڭ جارقىن كورىنىسى ەكەنىن، سونداي-اق حالقىمىزدىڭ مۇقالماس رۋحىن، قاھارماندىعى مەن دانالىعىن، اسقاق ارمان-تىلەگىن جەتكىزەتىن قۇندى بەلگى رەتىندە تانىتۋ.
ەستافەتانى العاش بولىپ شىمكەنت قالالىق مادەنيەت ءۇيىنىڭ باسشىسى ساكەن مايعازيەۆ باستادى. قولىنا كوك تۋدى الىپ، 12 ونەرپازبەن بىرگە كولىكپەن قالا كوشەلەرى ارقىلى «اربات» دەمالىس ايماعىنا جول تارتتى. ول جەردە «قر ەڭبەگى سىڭگەن سپورت شەبەرى»، بوكستان الەم چەمپيونى، وليمپيادا ويىندارىنىڭ قاتىسۋشىسى ءبىرجان جاقىپوۆقا ەستافەتانى جولدايدى.
ءاربىر بەلگىلەنگەن ورىندا تۇرعىندارعا رامىزدەرگە بايلانىستى سۇراقتار قويىلىپ، جەڭىمپازدارعا «QAZAQSTAN» شوكولادى تابىستالادى.
كەڭ بابا ساياباعىندا سپورتشى ەستافەتانى №1 قالالىق كلينيكالىق اۋرۋحانانىڭ باس دارىگەرى ابىلاي دونبايعا ۇسىنادى.
كەيىننەن شەرۋ اسار شاعىن اۋدانىندا «ۇزدىك پەداگوگ-2020» جادىرا شابدەنگە، ودان ارى "شىمكەنت ءسيتيدى" اينالىپ ءوتىپ، اكىمشىلىك ىسكەرلىك الاڭىنا قاراي جول تارتادى. ول جەردە بۇگىنگى كۇننىڭ باتىرى №1 مامانداندىرىلعان ءورت ءسوندىرۋ ءبولىمىنىڭ ءورت ءسوندىرۋشى-قۇتقارۋشىسى، ازاماتتىق قورعاۋ كىشى سەرجانتى ۆاحيدجان كازاكباەۆقا تابىستالادى.
شىمكەنت قالاسى اكىمدىگىنىڭ ءباسپاسوز قىزمەتى
