شىمكەنت قالاسىندا جىل باسىنان بەرى 36 969 وتباسى ياعني، 179 209 ازاماتقا اتاۋلى الەۋمەتتىك كومەك تاعايىندالدى. كومەك الۋشىلاردىڭ ىشىندە 1-6 جاسقا دەيىنگى بالالارى بار وتباسىلارعا اي سايىن كەپىلدەندىرىلگەن الەۋمەتتىك توپتامالار تاراتىلادى.
بۇل تۋرالى قالالىق جۇمىسپەن قامتۋ جانە الەۋمەتتىك قورعاۋ باسقارماسى باسشىسىنىڭ مىندەتىن اتقارۋشى ەرمان بەكمۇراتوۆ قالا اكىمدىگىنىڭ «Instagram» جانە Facebook پاراقشاسىندا وتكەن تىكەلەي ەفيردە مالىمدەدى.
اتاۋلى الەۋمەتتىك كومەك – تابىسى تومەن ازاماتتارعا تولەنەتىن مەملەكەتتىك قارجىلاي قولداۋ. وتىنىشكە قۇجات تاپسىرعاننان كەيىن ارنايى قۇرىلعان كوميسسيا ءوتىنىش تاپسىرۋشىنىڭ تۇرمىستىق جاعدايىن تەكسەرىپ شەشىم قابىلدايدى. ااك الۋشىلاردىڭ وتباسىلىق تابىسى جان باسىنا شاققانداعى كەدەيلىك شەگى 22 535 تەڭگەدەن تومەن بولعان جاعدايدا تاعايىندالادى. ال جۇمىسسىز جۇرگەن ازاماتتارعا قالالىق جۇمىسپەن قامتۋ ورتالىعى تاراپىنان «جۇمىسپەن قامتۋدىڭ» بەلسەندى شارالارىنا قاتىسۋ ۇسىنىلۋدا.
باسقارما باسشىسى ءبىر ساعاتقا سوزىلعان تىكەلەي ەفير بارىسىندا الەۋمەتتىك سالا بويىنشا اتقارىلىپ جاتقان جۇمىستار بارىسىن بايانداپ، سوڭىنان تۇرعىندار تاراپىنان قويىلعان سۇراقتارعا ەگجەي-تەگجەيلى جاۋاپ بەردى. ەفيرگە جالپى 1200-گە جۋىق ادام قوسىلىپ، قاجەتتى اقپارات الدى.
ەرمان بەكمۇراتوۆتىڭ ايتۋىنشا، باسقارما تاراپىنان ارداگەرلەر مەن حالىقتىڭ وسال توپتارىنا الەۋمەتتىك قولداۋ كورسەتۋ باعىتىندا بىرقاتار جۇمىستار اتقارىلۋدا. ونىڭ ىشىنە زەينەتكەرلەر، ۇوس ارداگەرلەرى، تىل ەڭبەككەرلەرى مەن كوپ بالالى انالار جانە اتا-اناسىنىڭ قامقورلىعىنسىز قالعان، مۇگەدەكتىگى بار بالالار كىرەدى. ولاردى قولداۋعا مەرەكە مەن اتاۋلى كۇندەرگە ارنالعان ءبىر رەتتىك تولەم جانە اي سايىنعى 13 ءتۇرلى كومەك كورسەتىلۋدە.
سونداي-اق، بيىل 2 توقساننان باستاپ ااك-كە وتىنىشتەر Egov.kz پورتالى ارقىلى ونلاين قابىلدانۋدا. وتىنىشتەرىن قاشىقتان تاپسىرۋلارى ءۇشىن ازاماتتاردىڭ ەلەكتروندى تسيفرلىق قولتاڭبالارى (ەتسق) بولۋى كەرەك. حالىققا ساپالى قىزمەت كورسەتۋ ماقساتىندا جىل باسىنان بەرى «حالىقتى جۇمىسپەن قامتۋ ورتالىعى» 4 اۋدانعا بولىنگەن. بارلىعىندا «وزىنە-ءوزى قىزمەت كورسەتۋ» ايماقتارى قاراستىرىلعان.
شىمكەنت قالاسى اكىمدىگىنىڭ ءباسپاسوز قىزمەتى
