Shymkent qalasynda jyl basynan beri 36 969 otbasy ıaǵnı, 179 209 azamatqa ataýly áleýmettik kómek taǵaıyndaldy. Kómek alýshylardyń ishinde 1-6 jasqa deıingi balalary bar otbasylarǵa aı saıyn kepildendirilgen áleýmettik toptamalar taratylady.
Bul týraly qalalyq jumyspen qamtý jáne áleýmettik qorǵaý basqarmasy basshysynyń mindetin atqarýshy Erman Bekmuratov qala ákimdiginiń «Instagram» jáne Facebook paraqshasynda ótken tikeleı efırde málimdedi.
Ataýly áleýmettik kómek – tabysy tómen azamattarǵa tólenetin memlekettik qarjylaı qoldaý. Ótinishke qujat tapsyrǵannan keıin arnaıy qurylǵan komıssııa ótinish tapsyrýshynyń turmystyq jaǵdaıyn tekserip sheshim qabyldaıdy. AÁK alýshylardyń otbasylyq tabysy jan basyna shaqqandaǵy kedeılik shegi 22 535 teńgeden tómen bolǵan jaǵdaıda taǵaıyndalady. Al jumyssyz júrgen azamattarǵa qalalyq jumyspen qamtý ortalyǵy tarapynan «Jumyspen qamtýdyń» belsendi sharalaryna qatysý usynylýda.
Basqarma basshysy bir saǵatqa sozylǵan tikeleı efır barysynda áleýmettik sala boıynsha atqarylyp jatqan jumystar barysyn baıandap, sońynan turǵyndar tarapynan qoıylǵan suraqtarǵa egjeı-tegjeıli jaýap berdi. Efırge jalpy 1200-ge jýyq adam qosylyp, qajetti aqparat aldy.
Erman Bekmuratovtyń aıtýynsha, basqarma tarapynan ardagerler men halyqtyń osal toptaryna áleýmettik qoldaý kórsetý baǵytynda birqatar jumystar atqarylýda. Onyń ishine zeınetkerler, UOS ardagerleri, tyl eńbekkerleri men kóp balaly analar jáne ata-anasynyń qamqorlyǵynsyz qalǵan, múgedektigi bar balalar kiredi. Olardy qoldaýǵa mereke men ataýly kúnderge arnalǵan bir rettik tólem jáne aı saıynǵy 13 túrli kómek kórsetilýde.
Sondaı-aq, bıyl 2 toqsannan bastap AÁK-ke ótinishter Egov.kz portaly arqyly onlaın qabyldanýda. Ótinishterin qashyqtan tapsyrýlary úshin azamattardyń elektrondy ıfrlyq qoltańbalary (EQ) bolýy kerek. Halyqqa sapaly qyzmet kórsetý maqsatynda jyl basynan beri «Halyqty jumyspen qamtý ortalyǵy» 4 aýdanǵa bólingen. Barlyǵynda «Ózine-ózi qyzmet kórsetý» aımaqtary qarastyrylǵan.
Shymkent qalasy ákimdiginiń baspasóz qyzmeti
