«جۇيرىكتىڭ دە جۇيرىگى بار، قازاناتى ءبىر بولەك، جىگىتتىڭ دە جىگىتى بار، ازاماتى ءبىر بولەك»، دەمەۋشى مە ەدى دانا حالقىمىز؟ مىنە، ءدال سول ايتقانداي، اقش سىندى الپاۋىت ەلدىڭ بۇگىنگى تاڭداعى ەڭ قالتالى مۋلتيميللياردەرى ءارى ىسكەرلىك شەبەرلىگى مەن شەكسىز تاۋەكەلگە بەل بايلاعان ارمانشىلدىعى جاعىنان الدىنا جان سالماي كەلە جاتقان تارلاندار شوعىرىنىڭ سىرتتانى يلون ماسك (Elon Musk) تۋرالى قالام تارتپاۋ مۇمكىن ەمەس. ويتكەنى ولاي دەۋگە تولىق نەگىز بار. ماسەلەن، قارشادايىنان ءوز قاتارىنىڭ اراسىنان سۋىرىلىپ شىعىپ، جۇزدەن جۇيرىك قانا ەمەس، مىڭنان تۇلپار اتانعان يلون ماسك جونىندە جارىق كورگەن دۇنيەلەردىڭ ىشىندە، اسىرەسە، سونى عىلىمي يننوۆاتسيالار مەن زاماناۋي تەحنولوگيالار تۋرالى اقپارات تاراتۋدى ءوز نىساناسىنا اينالدىرعان جانە وسى باعىتتا ۇنەمى قالام تارتىپ جۇرگەن امەريكالىق جازۋشى ەشلي ۆەنستىڭ (Ashlee Vance): Elon Musk: Tesla, SpaceX, and the Quest for a Fantastic Future (يلون ماسك: «Tesla, SpaceX جانە تاڭعاجايىپ بولاشاققا بارلاۋ») تۋىندىسىن ەرەكشە اتاۋدىڭ ءجونى بار. سەبەبى بۇل كىتاپ العاش رەت 2015 جىلى جارىق كورگەن ساتتە-اق ەڭ تاڭداۋلى تۋىندىلاردىڭ ساناتىنا قوسىلىپ، ءوزىنىڭ ورەلى وزەكتىلىگى مەن تەرەڭ تارتىمدىلىعىنىڭ ارقاسىندا الەم وقىرماندارىنىڭ نازارىنا بىردەن ىلىككەن بولاتىن.
اتالعان كىتاپتىڭ اۆتورى، تەحنولوگيا سالاسىنىڭ كاسىبي ءجۋرناليسى ەشلي ۆەنستىڭ ايتۋىنا قاراعاندا، بۇل تۋىندىنى جازۋعا سالقىنقاندى يلون ماسك باستاپقى كەزدە ىڭعايسىز جايعا تاپ بولىپ قالام با دەگەن ويمەن بىردەن كەلىسىم بەرە قويماعان. الايدا، ەشلي ۆەنس العان بەتىنەن قايتپاي، قايسارلىق تانىتىپ، ماسكپەن قىزمەتتەس ەكى جۇزگە تارتا اداممەن جان-جاقتى سۇحبات جۇرگىزىپ، قوماقتى اقپارات جيناپ العانىن بىلگەن سوڭ جازۋشىعا بارىنشا ىقىلاس تانىتا باستاعان.
«بولار بالا...» دەمەكشى، 12 جاسار ماسكتىڭ تانىمالدىلىعى العاش رەت ءوزى دۇنيەگە كەلگەن وڭتۇستىك افريكادا تۇراقتى شىعىپ تۇراتىن «دەربەس كومپيۋتەر جانە كەڭسە تەحنولوگيالارى» جۋرنالىندا ءوزى قۇراستىرعان بالالارعا ارنالعان كومپيۋتەرلىك ويىنى جاريالانعان ءساتىنەن باستالعانى بايقالادى. ال ماسكتىڭ كومپيۋتەرلىك ويىندارمەن اۋەستەنۋىنە بريتاندىق قالامگەر دۋگلاس ادامستىڭ The Hitshhiker’s Guide to the Galaxy («اۆتوستوپپەن گالاكتيكاعا ساپار») فانتاستيكالىق شىعارماسى تۇرتكى بولعان سىڭايلى. الگى ويىنعا قاتىستى قىسقاشا اننوتاتسياسىندا ماسك بىلاي دەيدى: «بۇل ويىندا ءسىز وزگە پلانەتالاردان كەلگەن عارىش كەمەلەرىن سۋتەگى بومباسىمەن نەمەسە سوعىس جاعدايىندا قولدانىلاتىن جويقىن ساۋلەلەردىڭ كۇشىمەن قۇرتۋىڭىز كەرەك».
كورىپ وتىرعانىمىزداي، اتالعان ويىننىڭ وزىنەن-اق قيالشىل ماسكتىڭ كوسموسقا دەگەن اسقاق ارمانىنىڭ قۇلاعى قىلتيىپ تۇرعانىن بايقاماۋ ءمۇمكىن ەمەس. ايتپاقشى، ماسكتىڭ بۇل تىرناقالدى تۋىندىسى وعان 500 دوللار گونورار اكەلىپ، عارىش الەمىنە دەگەن ونىڭ قۇلشىنىسىن بۇرىنعىدان بەتەر ۇدەتىپ جىبەرگەن. الايدا ول زاماندا وڭتۇستىك افريكادا قالىپتاسقان اپارتەيدتىك جۇيە ەل ىشىندەگى ساياسي احۋالدى مۇلدە شيەلەنىستىرىپ، اق ناسىلدىلەر مەن قارا ناسىلدىلەردىڭ اراسىنداعى قاقتىعىستاردى جيىلەتىپ جىبەرگەن-ءدى. بۇل ءدۇربەلەڭ يلون ماسكتى قاتتى الاڭداتىپ، ءوز ارمانىنىڭ وڭتۇستىك افريكادا ورىندالا قويمايتىندىعىنا كوزىن ءبىرجولاتا جەتكىزەدى. ونىڭ ۇستىنە، وزگە ەلدەر تاراپىنان وڭتۇستىك افريكا مەملەكەتىنە دەگەن تەرىس كوزقاراس قالىپتاسىپ، ءارتۇرلى سانكتسيا جيىلەپ كەتكەن-ءدى. سوندىقتان دا ەندىگى جەردە يلون ماسك امەريكا قۇراما شتاتتارىنا قونىس اۋدارۋعا تۇبەگەيلى شەشىم قابىلدايدى. بىراق ول كەزدە وڭتۇستىك افريكالىقتارعا اقش-قا ۆيزا الۋ وتە قيىن بولاتىن، ەسەسىنە كاناداعا بارۋ ايتارلىقتاي جەڭىل ەدى. وسى مۇمكىندىكتى پايدالانىپ، يلون ماسك ەڭ الدىمەن، كاناداعا جەتۋ ءۇشىن قۇجاتتارىن دايىنداي باستايدى، ويتكەنى كانادادان اقش-قا ءوتۋ مۇمكىندىگى ۇلكەن بولاتىن.
Cونىمەن 17 جاسىندا يلون ماسك الدىمەن كاناداعا، سوسىن امەريكا قۇراما شتاتتارىنا قونىس اۋدارادى. پەنسيلۆانيا ۋنيۆەرسيتەتىنە ءتۇسىپ، فيزيكا جانە ەكونوميكا سالاسى بويىنشا باكالاۆريات باعدارلامالارىن ءتامامداپ، 1995 جىلى ستەنفورد ۋنيۆەرسيتەتىنە ءتۇسىپ، جوعارى ەنەرگيا سالاسى بويىنشا دوكتورلىق ديپلوم قورعاماق بولادى. بىراق ەكى جىل وتكەن سوڭ قاراجاتتان قىسىلىپ، وقۋىن تاستاپ، كاسىپكەرلىك جولعا ءتۇسىپ، كىشىگىرىم ينتەرنەت-بيزنەسىن قولعا الادى.
يلون ماسك اشقان Zip2 كومپانياسى، نەگىزىنەن، كەز كەلگەن قاعاز قۇجاتتىڭ ەلەكتروندى نۇسقاسىن جاساۋمەن اينالىساتىن. بۇل قىزمەتتىڭ ءتۇرى كەيىنىرەك پايدا بولعان گۋگل نەمەسە ياندەكس سەكىلدى الىپ اقپارات ىزدەۋ ءجۇيەلەرىنىڭ العاشقى نۇسقاسى دەسە دە ابدەن بولادى. باستاپقى كەزدە بۇل قىزمەتتىڭ ءتۇرى بيزنەسارالىق قارىم-قاتىناستاردى جەڭىلدەتۋ ماقساتىندا كەز كەلگەن كاسىپكەردىڭ كەڭسەسىنىڭ قاي جەردە ورنالاسقانىن عانا ەمەس، سول كەڭسەلەرگە الىپ باراتىن وڭتايلى مارشرۋتتاردىڭ كارتاسىن دا قوسا ۇسىناتىن. كوپ ۇزاماي بۇل جوبا ماسك پەن ونىڭ ارىپتەستەرىنە وتە ۇلكەن تابىس اكەلە باستايدى. وڭتايلى جاعدايدى پايدالانىپ، ماسك بۇل بيزنەسىن 307 ملن دوللارعا ساتىپ جىبەرەدى. ال وزىنە تيەسىلى 22 ملن دوللار قاراجاتتىڭ ءبىر بولىگىنە جەكە ۇشاق پەن ليۋكس سپورت ءاۆتوموبيلىن ساتىپ الادى دا، قالعان بولىگىن جاڭادان تامىر الىپ كەلە جاتقان PayPal دەپ اتالاتىن بيزنەس جوباعا سالىپ، ونىڭ قۇرىلتايشىلارىنىڭ ءبىرى رەتىندە ينتەرنەت-بانكينگپەن بەلسەنە اينالىسا باستايدى.
PayPal كومپانياسى بولسا، تەز ارادا ينتەرنەت-بيزنەستىڭ ەڭ ءتيىمدى تۇرىنە اينالىپ، تۇتىنۋشىلارعا اقشالاي ءتولەمدەرىن ەلەكتروندى پوشتا جۇيەسىمەن جىبەرۋگە مۇمكىندىك بەرەتىندىكتەن، ەڭ ايتۋلى بيزنەسكە اينالىپ شىعا كەلەدى. ءسويتىپ، 2002 جىلى بۇل كومپانيانىڭ كاپيتالى 1,2 ملرد دوللاردى قۇرايدى. جارتى جىل وتكەندە بۇل بيزنەستى ايتۋلى «eBay» كومپانياسى 4 ملرد دوللارعا ساتىپ الادى. ءوز كەزەگىندە بۇل ءۇردىس ينتەرنەت-بيزنەستىڭ قوعامدا وتە ۇلكەن سۇرانىسقا يە بولىپ، قىسقا مەرزىم ىشىندە كاسىپكەرلىكتىڭ مۇنداي ءتۇرىمەن اينالىساتىنداردىڭ سانى ءجۇزدەگەن مىڭ ادامعا جەتەدى. ال ءوز كاپيتالىن ەسەلەگەن يلون ماسك بولسا، وسى جەتىستىگىمەن توقتاپ قالعان جوق، كەرىسىنشە، كاسىپكەرلىكتىڭ وزگە تۇرلەرىن دامىتۋعا كۇش سالادى.
2002 جىلى يلون ماسك ءوزىنىڭ ومىرلىك ارمانى بولىپ تابىلاتىن عارىش ساپارلارىن جەتىلدىرۋگە باعىتتالعان SpaceX دەپ اتالاتىن جەكە باعدارلاماسىن جاريالايدى. ەندىگى جەردە ونىڭ الدىندا كوسموس كەڭىستىگىنە تەك عارىش زىمىراندارى مەن پايدالى جۇكتەردى عانا ەمەس، ەكيپاجداردى دا قوسا الىپ شىعارا الاتىن عارىش قۇرىلعىلارىن جاساپ شىعارۋ مىندەتى تۇردى. سوندىقتان دا SpaceX جوباسىنا يلون ماسك جۇزدەگەن ملن دوللار جۇمسادى. الايدا 2002 جىلى ول بانكروت بولۋدىڭ از-اق الدىندا تۇرعان بولاتىن. ويتكەنى ونىڭ كومپانياسى عارىشقا ۇشىرعان «فالكون» زىمىراندارى قاتارىنان ءۇش رەت ساتسىزدىككە ۇشىراپ، تەك ءتورتىنشىسى عانا وربيتاعا ءساتتى كوتەرىلەدى. كوپ ۇزاماي يلون ماسك اقش-تىڭ مەملەكەتتىك عارىش اگەنتتىگىنىڭ (NASA) نازارىنا ىلىگىپ، الگى الپاۋىت كومپانيادان ينۆەستيتسيا تارتۋعا قول جەتكىزەدى. سونداي-اق حالىقارالىق كوسموس ستانساسىمەن (مكس/ISS) دە ءتيىمدى بايلانىس ورناتىپ، عارىشقا اۋىر جۇكتەر جەتكىزۋگە ءمۇمكىندىك بەرەتىن وتە ءتيىمدى كەلىسىمشارتقا قول قويادى.
2012 جىلى يلون ماسك ءوزىنىڭ و باستاعى اسقاق ارمانى بولىپ تابىلاتىن مارسقا ادام قوندىرۋ ميسسياسىن ورىنداۋعا باعىتتالعان اۋقىمدى جوسپارىنىڭ بۇگە-شىگەسىن جاريالاي باستايدى. ول ماقساتقا قول جەتكىزۋ ءۇشىن SpaceX ەڭ الدىمەن عارىش ايلاعىنان تىك ۇشىپ، تىك قونا الاتىن، ءارى بورتىنا 100-گە جۋىق ادام مەن قوماقتى جۇكتى دە قوسا الىپ كەتە الاتىن كولىك زىمىراندارىنىڭ تەحنولوگياسىن شەگىنە جەتكىزە جەتىلدىرۋدى ەڭ ءبىرىنشى كەزەككە قويادى. سونىمەن قاتار بۇدان بىلايعى جەردە ەشكىمگە تاۋەلدى بولماس ءۇشىن، ءوز كومپانياسىنىڭ جەكەمەنشىك كوسمودرومىن سالىپ ءبىتىرۋدى، ءارى ونى كوممەرتسيالىق جولعا قويىپ، وزگەلەرگە جالعا بەرىپ، پايدا تابۋ جاعىن دا نازارىندا ۇستايدى. ويتكەنى بۇعان دەيىن SpaceX ءوزىنىڭ عارىش زىمىراندارىن وتە قىمباتقا ءتۇسسە دە، فلوريدا شتاتىندا ورنالاسقان اقش-تىڭ اسكەري اۋە كۇشتەرىنىڭ كوسمودرومىنان ۇشىرىپ كەلگەن بولاتىن.
يلون ماسك قولعا العان زاماناۋي كاسىپكەرلىكتىڭ ەندى ءبىرى – Tesla Motors جوباسى. بۇل جوبانىڭ تۇپكى ماقساتى – بۇگىنگى تاڭداعى ادامزاتتى قورشاعان ەكولوگيالىق ورتانى شەكسىز لاستاپ قانا قويماي، سول ورتادا ءومىر ءسۇرىپ جاتقان وزگە تىرشىلىك يەلەرىنە دە، ءتىپتى فلوراعا دا الاپات قاتەر ءتوندىرىپ تۇرعان تاجالدىڭ الدىن الۋ. بۇل تاجالدىڭ اتى – جەر شارىندا مىڭداپ سانالاتىن كومىر جانە مۇناي ونىمدەرىن پايدالاناتىن جىلۋ ەلەكتر ستانسالارى مەن ميلليونداعان اۆتوموبيلدەردەن نەمەسە سونداي وتىندى پايدالاناتىن ءىرىلى-ۇساقتى سانسىز ءوندىرىس ورىندارى مەن قالالاردىڭ جىلۋ جۇيەلەرىنەن، كادىمگى ۇيلەردىڭ پەشتەرىنەن بولىنەتىن اسا ۋلى كومىرقىشقىل گازى. سوندىقتان دا يلون ماسكتىڭ Tesla Motors جوباسىنىڭ ماقساتى – كۇللى الەمدەگى اۋىر جانە جەڭىل اۆتوموبيلدەردىڭ بارلىعىن ەلەكتر ەنەرگياسىنىڭ قۋاتىمەن ءجۇرگىزۋگە بەيىمدەۋ.
ونىڭ ۇستىنە، عىلىمي نەگىزگە سۇيەنەر بولساق، كۇللى الەمدەگى جىلۋ ەلەكتر ستانسالارىندا كومىر مەن مۇناي جانە گاز ارقىلى وندىرىلەتىن ەلەكتر ەنەرگياسىن ەگەر ەلەكتروموبيلدەر تۇتىناتىن بولسا، ول قۋات كوزدەرىنىڭ پايدالى كوەففيتسيەنتىنىڭ مولشەرى 60 پايىزعا تەڭەلەدى ەكەن. ال اۆتوموبيلدەر كەرىسىنشە، تەك بەنزين نەمەسە گاز قۋاتىمەن جۇرەتىن بولسا، ءالگىلەردىڭ پايدالى كوەففيتسيەنتىنىڭ مولشەرى نەبارى 20 پايىزدى عانا قۇرايدى ەكەن. دەمەك، قالعان 80 پايىزى، ىشتەن جاناتىن قوزعالتقىشتاردان بولىنەتىن ۋلى گازدارعا اينالىپ، كۇللى ەكولوگيانى لاستايدى.
[caption id="attachment_44834" align="aligncenter" width="1050"]
epa07058203 (FILE) - Tesla CEO Elon Musk delivers a presentation at the International Astronautical Congress (IAC) in Adelaide, South Australia, Australia, 29 September 2017 (reissued 30 September 2018). Tesla CEO Elon Musk, 47, agreed on 29 September 2018, to step down as chairman of Tesla after reaching a settlement with the US Securities and Exchange Commission (SEC), which fined Musk and Tesla 20 million US dollar each, in a lawsuit against Musk for allegedly lying to investors when posting on Twitter last August, about taking the firm private. Musk will remain as CEO at Tesla, but will have to step down as chairman for three years, media reported. EPA-EFE/MORGAN SETTE AUSTRALIA AND NEW ZEALAND OUT[/caption]
بۇگىنگى تاڭدا Tesla Motors كومپانياسىنان مىڭداپ شىعىپ جاتقان Tesla Model S ءاۆتوموبيلى جانارمايمەن ءجۇرەتىن اۆتوموبيلدەن ارتىق بولماسا، ەشبىر كەم تۇسپەيتىنى دالەلدەنىپ وتىر. ءماسەلەن، تەسلا مودەلى 100 شاقىرىم جىلدامدىقتى نەبارى ءتورت-اق سەكۋندتا الادى جانە بۇل ۇلگىدەگى ەلەكتروموبيلدەر ەرگونوميكا تۇرعىسىنان عانا ەمەس، ديزاين جانە قاۋىپسىزدىك جاعىنان دا قازبا وتىن تۇرلەرىمەن جۇرەتىن اۆتوموبيلدەردەن الدەقايدا ۇتىمدى ەكەنى كوزگە ۇرىپ تۇر. ونىڭ ۇستىنە قاتارداعى تەسلا اۆتوموبيلدەرى 2006 جىلدان باستاپ نارىققا شىقسا، بيزنەس كلاستاعى ۇلگىسى 2012 جىلدان ساتىلىمعا شىعا باستادى. ەندى، مىنە، بيۋدجەتتىك ۇلگىسى دە قولجەتىمدى بولىپ وتىر.
ەلەكتروموبيلدەردىڭ وسال جەرى – ەلەكتر قۋاتىمەن جابدىقتايتىن ستانسالاردىڭ ازدىعى. سوندىقتان، يلون ماسكتىڭ الدىندا تۇرعان بۇگىنگى نەگىزگى مىندەتتەردىڭ ءبىرى – ونداي ستانسالاردى تەك اقش-تا عانا ەمەس، وزگە مەملەكەتتەردە كوپتەپ سالۋ. سونىمەن بىرگە ول 2006 جىلى وزىمەن اعايىنداس پيتەر جانە ليندون ريۆ دەيتىن اعالى-ءىنىلى جىگىتتەرگە كۇن پانەلدەرىن شىعارۋمەن قاتار، ونى تاراتاتىن جانە ەلەكتروموبيلدەردى توقپەن قامتاماسىز ەتەتىن SolarCity («كۇن قالاسى») كومپانياسىنىڭ نەگىزىن قالاۋ جونىندە كەڭەس بەرىپ، سول بيزنەستى ۇيىمداستىرۋعا كومەك كورسەتىپ، ءارى ءوزى سول كومپانيانىڭ ديرەكتورلار كەڭەسىنىڭ قۇرامىنا كىرەدى.
2008 جىلى SolarCity كومپانياسى تۇتىنۋشىلارعا: «ءبىز ءسىزدەردىڭ ۇيلەرىڭىزدىڭ شاتىرىنا تەگىن كۇن» باتارەيالارىن قويىپ بەرەمىز، ەسەسىنە بۇدان سوڭ ەلەكتر ەنەرگياسىنا جۇمسايتىن تولەمدەرىڭىزدىڭ مولشەرى بىردەن ازايادى. مۇنى ءبىز باقىلاپ وتىرامىز»، دەگەن ۇندەۋ جاريالايدى. وسى ۇندەۋدەن كەيىن كۇللى امەريكالىقتاردىڭ شاتىرلارى كۇن باتارەيالارىمەن جابدىقتالا باستايدى جانە ولار 2012 جىلى ەڭ ءوتىمدى تاۋارعا اينالىپ شىعا كەلەدى. يلون ماسكتىڭ بولجامىنشا، 20 جىل ىشىندە الەمدە قولدانىلاتىن ەلەكتر ەنەرگياسىنىڭ باسىم بولىگى كۇننىڭ قۋاتىنان الىناتىن بولادى.
ءيا، يلون ماسكپەن كەلىسۋگە دە، كەلىسپەۋگە دە بولاتىن شىعار. الايدا ءبىر ءنارسەنى مويىنداۋعا تۋرا كەلەدى. ەلەكتروموبيلدەر حح عاسىردىڭ باسىندا پايدا بولدى، ال كۇن باتارەيالارى سول عاسىردىڭ ەلۋىنشى جىلدارى شىعارىلا باستادى. ال كوسموسقا العاشقى ادام 1961 جىلى كوتەرىلدى. سولاي بولا تۇرعانمەن، ادامدار جاپپاي عارىشقا اتتانعان جوق. ەلەكتروموبيلدى دە جاپپاي ساتىپ الىپ جاتقان جوق. كۇللى ۇيلەر دە جاپپاي كۇن قۋاتىنىڭ ەسەبىنەن جىلىتىلمايدى. الايدا كۇللى ادامزاتتىڭ مەنتاليتەتى ءوزگەرە باستاعانى داۋسىز. ال بۇل ءوزگەرىستىڭ لوكوموتيۆى يلون ماسك ەكەندىگىندە ەشبىر كۇمان جوق.
وسى تۇستا يلون ماسك وسىنشاما تابىسقا قالاي جەتتى دەگەن سۇراق تۋىندايتىنى زاڭدى. ال مۇنىڭ سەبەبىن ىزدەر بولساق، ونى دا يلون ماسكتىڭ وزىنەن تابارىمىز انىق. ويتكەنى دانا حالقىمىزدىڭ ءبىر كەرەمەت ناقىلى بىلاي دەمەۋشى مە ەدى:
«تاۋەكەل ءتۇبى – جەل قايىق، وتەسىڭ دە كەتەسىڭ،
قايعى ءتۇبى – تۇڭعيىق، باتاسىڭ دا كەتەسىڭ».
سول ايتپاقشى، بىرىنشىدەن، يلون ماسك – وتە تاۋەكەلشىل تۇلعا. ەكىنشىدەن، وتە شىدامدى. ۇشىنشىدەن، وتە سابىرلى. ءتورتىنشىدەن، وتە ءبىلىمدى ءارى قارا جۇمىستان قاشپايتىن، قانداي قيىن جۇمىس بولسىن ءوزى كىرىسىپ كەتەتىن ەڭبەكقور ادام. بەسىنشىدەن، ونىڭ تەگى جاقسى، وتە ءتاربيەلى ءارى ءبىلىمدى ورتادان شىققان. بەسىنشىدەن، ول وتە بالاجان. وزىنەن تاراعان التى بالانى الاقانىنا سالىپ ءوسىردى. التىنشىدان، ونىڭ 28 جاسىندا ميللياردەر بولۋى كوپ نارسەدەن حابار بەرەدى. ويتكەنى ەڭ الدىمەن، ول وتە ءىسكەر ءارى كەز كەلگەن يدەيادان بيزنەس جاساي الاتىن ۆيزيونەر. جەتىنشىدەن، ءوزى باستاعان كاسىپتى دوڭگەلەتىپ الىپ كەتۋ ءۇشىن توڭىرەگىنە تەك قانا بىلىكتى، ءبىلىمدى ءارى وتە تاجىريبەلى مامانداردى عانا تارتادى. سەگىزىنشىدەن، يلون ماسك وتىرىكتەن ادا، ادىلەتتى. توعىزىنشىدان، ول بوس ءسوز ايتپايتىن ءارى ۋادەسىنە وتە بەرىك تۇلعا. ونىنشىدان، ول – اقپاراتتىق تەحنولوگيالارمەن جەتە قارۋلانعان عاجاپ باعدارلاماشى. ەڭ باستىسى، ول – ءوزىنىڭ قارا باسىنىڭ عانا قامىن ويلايتىن ميزانتروپ ەمەس، كەرىسىنشە، ءوز ەلىنىڭ ءمۇددەسىمەن قاتار، كۇللى ادامزاتتىڭ قامىن ويلايتىن فيلانتروپ تۇلعا. سوندىقتان دا ونىڭ جولى بولعىش، ويتكەنى ول ءوز بايلىعىن ادامزاتتىڭ بولاشاعىن جاقسارتۋ، ەكولوگيانى تازارتۋ جانە ادام ساناسىن ءوزگەرتۋ ءۇشىن ايانباي جۇمسايدى.
وسىندايدا ءبىزدىڭ جاستار جاقسىدان ۇيرەنىپ، جاماننان جيرەنىپ، كەزىندە وتىز جىل ەل تىزگىنىن ۇستاعان ديمەكەڭ – دىنمۇحاممەد قوناەۆ ايتپاقشى، اسپاي-ساسپاي، لاس جەردى باسپاي ءومىر ءسۇرەتىن، يلون ماسك سەكىلدى پاتريوت، ىسكەر، تاۋەكەلشىل جانە حالقىمىزدىڭ قامىن ويلايتىن ۇلتجاندى بولىپ وسسە عوي، ءشىركىن، دەگەن اسىل ارمان ويىمىزعا ورالا بەرەتىنىن جاسىرمايمىز.
ءادىل احمەتوۆ،
قازاقستاننىڭ ەڭبەك سىڭىرگەن قايراتكەرى،
حالىقارالىق جوعارى مەكتەپ عىلىم اكادەمياسىنىڭ اكادەميگى
