قۇرامىندا تۇرىك استروناۆتى الپەر گەزەراۆجى بار Axiom-3 ەكيپاجىمەن Dragon عارىش كەمەسى جەرگە ورالۋ كۇنى فلوريدا جاعالاۋىنداعى قولايسىز اۋا رايىنا بايلانىستى 5 اقپانعا شەگەرىلدى، دەپ حابارلايدى “ادىرنا” ۇلتتىق پورتالى انادولۋ سايتىنا سىلتەمە تاستاپ.
بۇل تۋرالى X الەۋمەتتىك جەلىسىندە جاريالانعان SpaceX حابارلاماسىندا ايتىلعان.
“Dragon عارىش كەمەسى مەن Ax-3 ەكيپاجى فلوريدا جاعالاۋىنداعى قولايسىز اۋا رايى جاعدايىنا بايلانىستى 5 اقپانعا دەيىن حالىقارالىق عارىش ستانتسياسىنان (حعس) كەتپەيدى”، - دەلىنگەن حابارلامادا.
ساراپشىلار ەكيپاجدىڭ حعس-تان كەتۋ جوسپارىنا بايلانىستى اۋا رايى جاعدايىن باقىلاۋدى جالعاستىرادى.
ايتا كەتەيىك، وتكەن ايداعى جوسپار بويىنشا لاينەر عارىشقا 18 قاڭتارعا قاراعان ءتۇنى ۇشىرىلۋى كەرەك ەدى. كەيىنىرەك ۇشۋ ۋاقىتى وزگەرىپ، عارىش كەمەسى 19 قاڭتاردا ۇشىرىلدى. SpaceX كومپانياسىنىڭ ايتۋىنشا، كەمەدەگى تەكسەرۋلەر مەن دەرەكتەردى قوسىمشا تالداۋ ءۇشىن قوسىمشا ۋاقىت قاجەت بولعان.
“ادىرنا” ۇلتتىق پورتالى
