جەتىسۋلىق 60 پوليتسيا قىزمەتكەرى كاسىبي مەرەكەسىندە جاڭا پاتەرلى بولدى

1792
Adyrna.kz Telegram

تالدىقورعان قالاسىندا الماتى وبلىسى پوليتسيا قىزمەتكەرلەرىنە جاڭا پاتەر كىلتتەرى تابىس ەتىلدى. كاسىبي مەرەكەلەرى قارساڭىندا قۇقىق قورعاۋشىلارعا بەرىلگەن 60 پاتەرلىك تۇرعىن ءۇي «نۇرلى جەر» باعدارلاماسىمەن سالىنعان. پاتەر كىلتتەرىن قونىستوي يەلەرىنە وبلىس اكىمىنىڭ ءبىرىنشى ورىنباسارى لاززات تۇرلاشوۆ تاپسىردى.

- ازاماتتاردىڭ تىنىشتىعىن، زاڭدىلىق پەن ءتارتىپتى قامتاماسىز ەتۋدەگى قىزمەتتەرىڭىز جەمىستى بولسىن. مەرەكەگە وراي قۇقىق قورعاۋ ورگاندارى قىزمەتكەرلەرىنە "بولاشاق" شاعىن اۋدانىندا وسى 60 پاتەرلىك ءۇي سالىنىپ، قولدانىسقا بەرىلگەلى وتىر. تالدىقورعاندا بيىل 6, 7, 8 شاعىن اۋدانداردا جانە كوتتەدج قالاشىعىندا مەملەكەتتىك بيۋدجەت جانە جەكە ينۆەستيتسيا ەسەبىنەن جالپى اۋدانى 120 مىڭ شارشى مەتردەن اساتىن 35 كوپقاباتتى تۇرعىن ءۇي جانە 204 كوتتەدجدىڭ قۇرىلىسىن اياقتالادى دەپ جوسپارلانعان. وسىلايشا مەملەكەتتىك باعدارلامالار ناتيجەسىندە حالىقتى تۇرعىن ۇيمەن قامتۋ جۇمىستارى جىلدان جىلعا قارقىنداي تۇسەتىن بولادى. جاڭا شاڭىراق مولشىلىق پەن بىرلىككە تولى بولسىن! ەلىمىز امان، جۇرتىمىز تىنىش بولىپ، جەتىسۋ جەرى، تالدىقورعان قالاسى گۇلدەنە بەرسىن! - دەدى   ل. تۇرلاشوۆ ءوز سوزىندە.

جالپى الماتى وبلىسىندا بيىل 1 ملن. شارشى مەتردەي تۇرعىن ءۇي پايدالانۋعا بەرىلەدى. ال تالدىقورعاننىڭ وزىندە 120 مىڭ شارشى مەتر ءۇي حالىق يگىلىگىنە بەرىلمەك. بيىل باسپانامەن قامتۋ ماسەلەسىن شەشۋ ءۇشىن رەسپۋبليكالىق بيۋدجەتتەن 5,6 ملرد. تەڭگە بولىنگەن. وعان قوسا جەرگىلىكتى بيۋدجەتتەن 204 كوتتەدجدى سالۋعا 1,5 ملرد. تەڭگە قاراستىرىلدى.

پىكىرلەر