قازاقستانعا رەسمي ساپارمەن قاتار سىرتقى ىستەر مينيسترلىگىنىڭ باسشىسى، شەيح مۋحاممەد بەن ابدۋلراحمان ءال ءتاني كەلدى. بۇل تۋرالى قازاقستان رەسپۋبليكاسى سىرتقى ىستەر مينيسترلىگىنىڭ ءباسپاسوز ورتالعى حابارلادى. قازاقستاننىڭ سىرتقى ىستەر ءمينيسترى مۇحتار تىلەۋبەردى ەكەۋى كەلىسسوزدەر جۇرگىزىپ، ەكى جاقتى قارىم-قاتىناستىڭ ماسەلەلەرى مەن دامۋ بارىسىن تالقىلادى. كەزدەسۋ بارىسىندا ساۋدا-ەكونوميكا جانە ينۆەستيتسيا سالالارىنداعى ىنتىماقتاستىققا ەرەكشە كوڭىل ءبولىندى.
كەلىسسوزدەر كەزىندە قاتار دامۋ قورىنىڭ (Qatar Development Fund) قاراجاتىنا الماتى وبلىسىنىڭ ىلە اۋدانىنداعى وتەگەن باتىر كەنتىندە پەريناتالدىق ورتالىعىنىڭ قۇرىلىسى تۋرالى مەموراندۋمعا قول قويىلدى. بۇل ورتالىق جۇكتى ايەلدەرگە بوسانۋ جانە بوسانعاننان كەيىن جوعارى ساپالى مەديتسينالىق قىزمەت كورسەتۋگە ارنالعان. الماتى وبلىسى تاراپىنان مەموراندۋمعا الماتى وبلىسى اكىمىنىڭ ورىنباسارى باتىرجان بايجۇمانوۆ قول قويدى.
ايتا كەتەرلىك جايت، قاتار سىرتقى ساياسي ۆەدومستۆوسى باسشىسى قازاقستانعا العاش رەت كەلدى. كەلىسسوزدەر بارىسىندا، ساۋدا-ەكونوميكالىق جانە ينۆەستيتسيالىق سالالارداعى قازاقستان-قاتار قاتىناستارىنىڭ اعىمداعى جاي-كۇيى مەن دامۋ پەرسپەكتيۆالارى قارالدى. سونىمەن قاتار الداعى ۋاقىتتا اۋىل شارۋاشىلىعى، تاۋ-كەن ونەركاسىبى جانە بانك ىسىندە بىرلەسكەن جوبالار قولعا الىنادى.
تاراپتار حالىقارالىق جانە وڭىرلىك كۇن تارتىبىندەگى وزەكتى ماسەلەلەر جونىندە پىكىر الماستى. قازاقستان اۋماعىندا اۋىل شارۋاشىلىعى، گەولوگيالىق بارلاۋ جانە تاۋ-كەن ونەركاسىبى، كولىك جانە لوگيستيكا، سونداي-اق قارجى جانە بانك قىزمەتى سالاسىنداعى بىرلەسكەن جوبالاردى ىسكە اسىرۋعا مۇددەلىلىك راستالدى. تاراپتار سونداي-اق ەكى ەلدىڭ حالىقارالىق جانە وڭىرلىك ۇيىمدار، سونىڭ ىشىندە بۇۇ، اوسشك، يىۇ جانە ت.ب. شەڭبەرىندەگى ءوزارا ءىس-قيمىلىنىڭ جوعارى دەڭگەيىن اتاپ ءوتتى.
