اراب ۇيلەستىرۋ توبى قازاقستاندىق جوبالارعا 7 ميلليارد دوللار ينۆەستيتسيالاۋدى جوسپارلاپ وتىر، دەپ حابارلايدى "ادىرنا" ۇلتتىق پورتالى قر پرەمەر-ءمينيسترىنىڭ ءباسپاسوز قىزمەتىنە سىلتەپ.
استانادا يسلام دامۋ بانكى، ساۋد ارابياسىنىڭ دامۋ قورى، وپەك حالىقارالىق دامۋ قورى، كۋۆەيت ەكونوميكالىق دامۋ قورى جانە ابۋ-دابي دامۋ قورى سەكىلدى ۇيىمداردى بىرىكتىرەتىن اراب ۇيلەستىرۋ توبىنىڭ وتىرىسى ءوتتى.
كەزدەسۋگە ۇلتتىق ەكونوميكا ءمينيسترى نۇرلان بايبازاروۆ، يسلام دامۋ بانكى توبىنىڭ پرەزيدەنتى مۇحاممەد سۋلەيمان ءال-دجاسسەر، اراب ينۆەستيتسيالىق قورلارى مەن ەلىمىزدىڭ مەملەكەتتىك ورگاندارى، كۆازيمەملەكەتتىك كومپانيالاردىڭ باسشىلارى قاتىسقان.
كەزدەسۋدە اراب ۇيلەستىرۋ توبىنىڭ قازاقستانداعى ينفراقۇرىلىمدىق جانە الەۋمەتتىك جوبالاردى قارجىلاندىرۋىنا قاتىستى ماسەلەلەر تالقىلاندى. سونداي-اق كەزدەسۋدە كولىك، ەنەرگەتيكا، سۋ رەسۋرستارى، دەنساۋلىق ساقتاۋ سالالارىنداعى جوبالار تانىستىرىلدى.
كەزدەسۋ قورتىندىسى بويىنشا اراب ۇيلەستىرۋ توبىنىڭ قازاقستان ەكونوميكاسىنا ۇزاق مەرزىمدى تىكەلەي ينۆەستيتسيالاردىڭ سوماسى باستاپقى كەزەڭدە 7 ملرد دوللاردى قۇرايتىنى ايتىلعان. بولاشاقتا قارجىلاندىرۋ كولەمىن ۇلعايتۋ جوسپارلانۋدا. سونىمەن قاتار سۋ رەسۋرستارى جانە يرريگاتسيا مينيسترلىگى مەن يسلام دامۋ بانكى اراسىندا كەلىسسوزدەرگە قول قويىلدى.
