شىمكەنت قالاسىنىڭ اكىمى عابيت سىزدىقبەكوۆ مەملەكەت باسشىسىنا حات جولداعان 12 جاستاعى سوفيا ەسىمدى ءبۇلدىرشىننىڭ وتباسىنا جانە التى بالانى ورتتەن امان الىپ قالعان مارينا گافاروۆاعا ناۋرىز مەرەكەسىنىڭ قارساڭىندا پاتەر سىيلادى، دەپ حابارلايدى “ادىرنا” ۇلتتىق پورتالى. بۇل تۋرالى ول ءوزىنىڭ الەۋمەتتىك جەلىدەگى پاراقشاسىندا جازدى.
اكەسىمەن بىرگە جالدامالى پاتەردە تۇراتىن 12 جاسار سوفيا ۇركىمباەۆا “تىلەكتەر شىرشاسى” اكتسياسى اياسىندا پرەزيدەنت قاسىم-جومارت توقاەۆتىڭ اتىنا حات جازعان بولاتىن.
ال مارينا گافاروۆا وتكەن جىلدىڭ جەلتوقسان ايىندا كورشى ۇيدەگى ءورتتى بايقاپ، كامەلەتكە تولماعان التى بالانى امان الىپ قالدى.
شىمكەنت اكىمى عابيت سىزدىقبەكوۆ جاڭا پاتەر يەلەرىنىڭ قۋانىشىندا شەك جوق ەكەنىن جازدى:
“ناۋرىز مەرەكەسى قارساڭىندا مەملەكەت باسشىسىنا حات جازعان 12 جاسار سوفيا ۇركىمباەۆاعا جانە مارينا گافاروۆاعا پاتەر كىلتتەرىن تابىس ەتتىم. كىلتتەردى تاپسىرۋ راسىمىندە جاڭا قونىستانۋشىلار پرەزيدەنتكە ريزاشىلىقتارىن ءبىلدىردى” دەپ جازدى ول.
وسىعان دەيىن قالا اكىمى كوپبالالى انانىڭ ەرلىگىنە العىسىن ءبىلدىرىپ، ءتورت بولمەلى پاتەردىڭ كىلتىن تابىستاۋعا ۋادە بەرگەن بولاتىن.
كىلت تاپسىرۋ راسىمىندە سوفيانىڭ اكەسى رۇستەنبەك ۇركىمباەۆ پەن مارينا گافاروۆا مەملەكەت باسشىسىنا ەرەكشە العىسىن ءبىلدىردى. سوفيا دا ءوزىنىڭ قۋانىشىن جاسىرماي، ولەڭ وقىپ، ونى ەل پرەزيدەنتىنە جولدادى.
