پرەزيدەنت قاسىم-جومارت توقاەۆ تۇركى مەملەكەتتەرى ۇيىمىنىڭ بەيرەسمي سامميتىندە بىرنەشە ماسەلەگە توقتالدى، دەپ حابارلايدى "ادىرنا" ۇلتتىق پورتالى.
پرەزيدەنت ءسامميتتىڭ قاسيەتتى تۇركىستان قالاسىندا ءوتۋىنىڭ تاريحي مانىنە نازار اۋدارىپ، شاھاردى تۇركى جۇرتىنىڭ رۋحاني ورتالىعى رەتىندە سيپاتتادى. سونداي-اق قوجا احمەت ياساۋي مۇراسىنىڭ تۇركى حالىقتارىنىڭ دۇنيەتانىمىنداعى ماڭىزىن اتاپ ءوتتى.
مەملەكەت باسشىسى بيىل «Qoja Ahmet Yasaui» وردەنى تاعايىندالعانىن ەسكە سالىپ، العاشقى ماراپاتتىڭ رەجەپ تايىپ ەردوعانعا تابىستالعانىن ايتتى. ونىڭ سوزىنشە، بۇل قادام تۇركى حالىقتارىنىڭ رۋحاني بايلانىسىن نىعايتۋعا باعىتتالعان.
سامميت بارىسىندا توقاەۆ تۇركى ەلدەرىنىڭ تەحنولوگيالىق ىنتىماقتاستىعىن كۇشەيتۋ قاجەتتىگىن ايتتى. پرەزيدەنت قازاقستاندا «تسيفرلاندىرۋ جانە جاساندى ينتەللەكت جىلى» جاريالانعانىن، استانا قالاسىندا Alem.ai جاساندى ينتەللەكت ورتالىعى اشىلعانىن جانە ەكى سۋپەركومپيۋتەر ىسكە قوسىلعانىن مالىمدەدى. سونىمەن قاتار «Digital Qazaqstan» ستراتەگياسى ازىرلەنىپ جاتقانىن جەتكىزدى.
پرەزيدەنت تۇركى مەملەكەتتەرى ۇيىمى اياسىندا تسيفرلىق يننوۆاتسيالار ورتالىعىن، كيبەرقاۋىپسىزدىك كەڭەسىن جانە تۇركى ەلدەرىنىڭ جاساندى ينتەللەكت ورتالىقتارىنىڭ جەلىسىن قۇرۋدى ۇسىندى. بۇدان بولەك، ورتاق IT-حاب اشىپ، وعان «Turkic ai» اتاۋىن بەرۋ باستاماسىن كوتەردى.
مەملەكەت باسشىسى مادەني-گۋمانيتارلىق باعىتتاعى ۇسىنىستارعا دا توقتالدى. ونىڭ ايتۋىنشا، تۇركى وركەنيەتىنىڭ مۇراسىن ساقتاۋ جونىندەگى كونۆەنتسيا قابىلداۋ، سونداي-اق تۇركى حالىقتارىنىڭ تاريحى مەن مادەنيەتىن قامتيتىن كوپتىلدى تسيفرلىق پلاتفورما ازىرلەۋ ماڭىزدى.
توقاەۆ تۇركىستان قالاسىندا تۇركى وركەنيەتى ورتالىعىن قۇرۋ تۋرالى شەشىم قابىلدانعانىن ايتتى. پرەزيدەنتتىڭ سوزىنشە، ورتالىق عىلىمي زەرتتەۋلەر جۇرگىزىپ، مادەني جانە ءبىلىم بەرۋ جوبالارىن جۇزەگە اسىرادى.
سونداي-اق مەملەكەت باسشىسى تۇركى مەملەكەتتەرى ۇيىمىن اسكەري اليانس رەتىندە سيپاتتايتىن پىكىرلەرگە جاۋاپ بەردى.
«تۇركى مەملەكەتتەرى ۇيىمى – گەوساياسي جوبا ەمەس، اسكەري ۇيىم دا ەمەس. بۇل – باۋىرلاس ەلدەردىڭ ساۋدا-ەكونوميكالىق، جوعارى تەحنولوگيالىق، تسيفرلىق جانە مادەني-گۋمانيتارلىق ىنتىماقتاستىعىن نىعايتاتىن بىرەگەي الاڭ»، – دەدى توقاەۆ.
