ساپالى ارناۋلى الەۋمەتتىك قىزمەت كورسەتۋ - مەملەكەتتىك ساياساتتىڭ نەگىزگى باعىتى. ستاتسيونار جاعدايىندا قىزمەت الۋشىلاردىڭ جەكە باسىنا قول سۇعىلماۋشىلىعى مەن قاۋىپسىزدىگىن قامتاماسىز ەتۋ، سونىمەن قاتار قوعامدا ءوزارا ارەكەتتەسۋ كەزىندە بارلىق جاعىنان قولداۋ ساقتالۋى كەرەك. ءدال وسى مىندەتتەردىڭ ءمىنسىز اتقارىلۋىن باقىلاۋ ماقساتىندا مونيتورينگتىك توپ قۇرىلدى.
اتالعان تەكسەرۋ شارالارى، قازاقستان رەسپۋبليكاسىنىڭ ەڭبەك جانە حالىقتى الەۋمەتتىك قورعاۋ مينيسترلىگىمەن اعىمداعى جىلدىڭ 26 اقپانىندا «وزگەرىستەر جولى: ءار ازاماتقا لايىقتى ءومىر!» اتتى NurOtan پارتياسىنىڭ سايلاۋالدى باعدارلاماسىنىڭ جول كارتاسىن جۇزەگە اسىرۋدا «ارداگەرلەردى ارداقتايىق» پارتيالىق جوباسىنىڭ شەڭبەرىندە جۇزەگە اسىرىلدى. سايكەسىنشە، مەديتسينالىق-الەۋمەتتىك مەكەمەلەردە تۇراتىن قارت ادامداردىڭ جاعدايىنا مونيتورينگ جۇرگىزىلدى.
اعىمداعى جىلدىڭ 17-21 مامىر ارالىعىندا تەكەلى قالاسىنداعى «شاپاعات» جانە «قاپشاعاي ارناۋلى الەۋمەتتىك قىزمەت كورسەتۋ ورتالىعى» كمم مەملەكەتتىك ورگانداردىڭ ماماندارى مەن قوعامدىق وكىلدەردىڭ قاتىسۋىمەن تەكسەرۋ جۇمىستارى جاسالدى.
مونيتورينگتىك توپ مۇشەلەرى، تەكەلى قالاسىنداعى «شاپاعات» ورتالىعىندا مەرەكەلىك شارالار وتكىزىلەتىن ارنايى ءماجىلىس زالىنىڭ جوقتىعىن العا تارتىپ وتىر. ايتۋلارىنشا، اتالعان الەۋمەتتىك قىزمەت كورسەتۋ مەكەمەسىندە قىزمەت الۋشىلار اراسىندا شىعارماشىلىق جانە تالانتتى ادامدار كوپ، ولار ءار ءىس-شاراعا كونتسەرتتىك باعدارلامالار دايىندايدى. ءماجىلىس زالىنىڭ جوقتىعىنان ولار اسحانادا ءىس-شارالار وتكىزۋگە ءماجبۇر.
ەكىنشى، نىساناعا الىنعان ورتالىق، قاپشاعاي قالاسىندا ورنالاسقان. تەكسەرۋگە قاتىسقان ماماندار، «قاپشاعاي ارناۋلى الەۋمەتتىك قىزمەت كورسەتۋ ورتالىعى» كمم ىشىندەگى جيھازداردى اۋىستىرىپ، قار مەن جاڭبىردان قورعايتىن ارنايى شاتىر ورناتۋ كەرەكتىگىن، جالپى العاندا عيماراتتى جوندەۋدەن وتكىزۋ تۋرالى ۇسىنىمدارىن بەرگەن.
قوس ورتالىقتىڭ جۇمىسىمەن تانىستىق. جالپى العاندا جاعدايلارى جاقسى. مەكەمە قىزمەتكەرلەرىنىڭ قىزمەت الۋشىرمەن ورناتقان قارىم-قاتىناسىنا، كورسەتىلەتىن الەۋمەتتىك كومەكتەردىڭ ساپاسىنا ءمىن تاعا المايمىز، تەك ماتەريالدىق بازالارىن نىعايتىپ، عيمارات جوندەۋدەن وتسە بولعانى،-دەيدى ۇلتتىق الدىن الاۋ تەتىگىنىڭ مۇشەسى گۋلگانا نازىروۆا.
اتالعان ورتالىقتار ءبىرىنشى جانە ەكىنشى توپتاعى مۇگەدەكتەر مەن ەگدە جاسىنا بايلانىستى وزىنە قىزمەت كورسەتۋگە مۇمكىندىگى جوق ادامدارعا، ياعني قارتتاردىڭ تۇرۋىنا ارنالعان ۇيىمدار بولىپ تابىلادى.
ايتا كەتەيىك، وڭىردە 2231 ورىنعا ارنالعان 13 مەديتسينالىق – الەۋمەتتىك مەكەمە جۇمىس ىستەيدى.
