قازاقستاننىڭ سىرتقى ىستەر مينيسترلىگى USAID قارجىلاندىرعان جوبالاردىڭ «مالىمدەلگەن ماقساتتارعا سايكەستىگىن» تەكسەرۋ ءۇشىن جۇمىس توبىن قۇردى. بۇل تۋرالى ۆيتسە-پرەمەر سەرىك جۇمانعارين دەپۋتاتتاردىڭ ساۋالىنا جاۋاپ بەرۋ بارىسىندا مالىمدەدى، دەپ حابارلايدى "ادىرنا" ۇلتتىق پورتالى.
AMANAT پارتياسىنىڭ مۇشەلەرى ۆيتسە-پرەمەرگە وسى ماسەلە بويىنشا ساۋال جولداعان. جاۋاپ رەتىندە جۇمانعارين ۇيىمنىڭ قىزمەتىن «جان-جاقتى تالداۋ» جۇرگىزىلەتىنىن ايتتى.
«اتاپ ايتقاندا، USAID-تىڭ ەلدىك ستراتەگيالارى زەرتتەلەدى، سونداي-اق USAID-تىڭ باسقا ۇيىمدارمەن، ونىڭ ىشىندە ۇكىمەتتىك جانە ۇكىمەتتىك ەمەس قۇرىلىمدارمەن بايلانىسى قاراستىرىلادى. بۇل بايلانىستاردىڭ اگەنتتىك ماقساتتارىنا ىقتيمال اسەرىن باعالاۋ ماڭىزدى. سونىمەن قاتار قارجىلىق اعىنداردى تالداۋ قاجەت، وسىلايشا قاراجاتتى پايدالانۋ كەزىندەگى سايكەسسىزدىكتەر، مۇددەلەر قايشىلىعى جانە ىقتيمال جاسىرىن سحەمالار انىقتالادى»، – دەدى ۆيتسە-پرەمەر.
دەپۋتاتتاردىڭ «كامەلەتكە تولماعانداردى بوتەن يدەولوگيادان قورعاۋ تۋرالى زاڭ جوباسىن ازىرلەۋ» ۇسىنىسىنا قاتىستى جۇمانعارين ادىلەت مينيسترلىگى بۇل ماسەلەنى مەملەكەتتىك ورگاندارمەن تالقىلاۋعا جىبەرگەنىن مالىمدەدى.
ۆيتسە-ءمينيستردىڭ ايتۋىنشا، 2024 جىلى USAID-پەن ەكىجاقتى كەلىسىمدەر اياسىندا 28 ۇزاقمەرزىمدى باعدارلاما جۇزەگە اسىرىلعان. جالپى، 2023–2024 جىلدارى اقش-تىڭ حالىقارالىق دامۋ جونىندەگى اگەنتتىگى قازاقستانداعى باعدارلامالارعا 26,5 ملن دوللار بولگەن. بۇل قاراجات ەكونوميكا، ەنەرگەتيكا، دەنساۋلىق ساقتاۋ، ازاماتتىق قوعام، مەديا جانە باسقا دا سالالارعا باعىتتالعان.
USAID قازاقستانداعى كەدەندىك ينفراقۇرىلىمدى جاڭعىرتۋ جوبالارىنا قاتىسقان. ورتالىق ازياداعى ساۋدا باعدارلاماسى اياسىندا مەملەكەتتىك كىرىستەر كوميتەتىنە جالپى قۇنى 385,8 ملن تەڭگە (774 مىڭ دوللار) بولاتىن 12 سەرۆەرلىك جابدىق بىرلىگى بەرىلگەن. سونداي-اق «ءۇزىلىسسىز ترانزيت» جانە ءوڭىر ەلدەرى اراسىندا الدىن الا اقپارات الماسۋ جوبالارى جۇزەگە اسىرىلعان.
ايتا كەتەيىك، 20 قاڭتاردا اق ۇيگە قايتا ورالعان دونالد ترامپ باسقا مەملەكەتتەرگە بولىنەتىن اقش كومەگىن 90 كۇنگە توقتاتتى. بۇل جارلىق ەڭ الدىمەن USAID قىزمەتىنە اسەر ەتتى. اقش پرەزيدەنتىنىڭ اكىمشىلىگى اگەنتتىكتى «ىسىراپشىلدىق پەن زاڭبۇزۋشىلىققا جول بەردى» دەپ ايىپتاعان.
