الماتى قالاسى ءدىن ىستەرى جونىندەگى باسقارماسى ۇلتتىق قۇندىلىقتاردى ناسيحاتتاۋ ماقساتىندا جۇيەلى جۇمىستار جۇرگىزىپ كەلەدى. سونىڭ ءبىر جارقىن ۇلگىسى - بۇگىنگى "ەل-شەجىرە" قورى ۇيىمداستىرعان باس ءمۇفتي ەرجان مالعاجىۇلىنىڭ ء"دىن مەن ءداستۇر 2" كىتابىنىڭ تۇساۋكەسەرى مەن "حالىق مۇراسى" اتتى ءداستۇرلى مۋزىكالىق كونتسەرتى.
دوڭگەلەك ۇستەلدە ادەبيەتتانۋشى داڭداي ىسقاق، اقىن امانحان ءالىمۇلى، مادەنيەتتانۋشى قالي سالسەنباي، ءدىنتانۋشى الاۋ ادىلباەۆ ءتارىزدى زيالى قاۋىم وكىلدەرى جاقسى پىكىرلەرىن ورتاعا سالدى. الاۋ ادىلباەۆ "ۋاھابيزمنەن ارابيانىڭ ءوزى باس تارتا باستادى. بىزگە ۇلتتىق قۇندىلىقتارعا قاراي بۇرىلۋ كەرەك" دەسە، ءمۇفتياتتان كەلگەن الدەبىر مولا "قازىر تەلەديدارلارىن تولى زيناقورلىق، مۇنىڭ اقىرى جامان، ەرتەڭ ۋاھابيزممەن جىلاپ كورىسەتىن بولاسىزدار" دەپ ءوزىنىڭ ءۋاھابيزمدى جاقتايتىنىن ءبىلدىرىپ الدى.
تۇساۋكەسەردەن كەيىن بولعان "حالىق مۇراسى" كونتسەرتى وتە جوعارى دەڭگەيدە ءوتتى. امانگەلدى كۇزەۋباي باستاعان قۇرمانعازى اتىنداعى قازاق ۇلتتىق كونسەرۆاتوريانىڭ حالىق ءانى كافەدراسى مەن رامازان ستامعازيەۆ باستاعان ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ ءداستۇرلى مۋزىكالىق ونەر كافەدراسىنىڭ ۇستازدارى مەن شاكىرتتەرى بىرىنەن ءبىرى اسىپ ءتۇسىپ ونەر كورسەتتى.
شاراعا ارنايى شاقىرىلعان ءدىن وقۋىن وقىپ جۇرگەن جاستار ءان تىڭداماق تۇگىل، ءوزارا ەمىن-ەركىن اڭگىمەلەسىپ، ەرسىلى-قارسىلى كىرىپ-شىعىپ، ءتىپتى ساحناعا شىققان ءداستۇرلى انشىلەردى مازاقتاپ، سىقىلىقتاپ كۇلىپ وزگە تىڭدارمانداردىڭ ابدەن مازاسىن الدى. ولارعا قوي دەيتىن وزدەرىنەن دە ءبىر ۇستاز تابىلمادى. ونەرتانۋشى، قازاق مۋزىكالىق ونەرىنىڭ شىن جاناشىرى جۇمابەك تابىن اعامىز شىداي الماي ورنىنان تۇرىپ: "قازاقتىڭ ءتول ونەرىن نەگە قۇرمەتتەمەيسىڭدەر؟ ەلگە رۋحاني تاربيە بەرەتىن بولاشاق مولدالار ەمەسسىڭدەر مە؟ ەگەر قازاق ءداستۇرىن سىيلماساڭدار، ماقازاقتاپ، ىرجاقتاپ وتىرماي شىعىپ كەتىڭدەر" دەدى. ارادا ءبىر-ەكى ءان ايتىلعان جوق، ۇستازى بار، شاكىرتى بار، بۇكىل ءدىن ادامدارى ورىندارىنان ءدۇر ەتىپ كوتەرىلىپ سىرتقا قاراي كەتىپ بارا جاتتى. "كونتسەرت ءجۇرىپ جاتقاندا بۇلاي توپىرلاپ شىققانىمىز مادەنيەتسىزدىك بولدى-اۋ" دەپ ءبىرى دە قىمسىنبادى. كونتسەرتتەن اسىعىپ شىققاندا ءبىر ۇلكەن مەملەكەتتىك شارۋانى بىتىرەتىندەي ءتۇر جاساپ الىپتى. قر ۇلتتىق كىتاپحانا وقىرماندارى مەن شاقىرۋسىز-اق كونتسەرتتى ىزدەپ كەلگەن تىڭدارماندار شارانىڭ سوڭىنا دەيىن وتىرىپ ءان مەن كۇيگە جان سارايلارىنىڭ شولدەرىن جاقسىلاپ قاندىرىپ قايتتى.
ارمان اۋباكىر
