Almaty qalasy Din isteri jónindegi basqarmasy ulttyq qundylyqtardy nasıhattaý maqsatynda júıeli jumystar júrgizip keledi. Sonyń bir jarqyn úlgisi - búgingi "El-shejire" qory uıymdastyrǵan bas múftı Erjan Malǵajyulynyń "Din men dástúr 2" kitabynyń tusaýkeseri men "Halyq murasy" atty dástúrli mýzykalyq konerti.
Dóńgelek ústelde ádebıettanýshy Dańdaı Ysqaq, aqyn Amanhan Álimuly, mádenıettanýshy Qalı Sálsenbaı, dintanýshy Alaý Ádilbaev tárizdi zııaly qaýym ókilderi jaqsy pikirlerin ortaǵa saldy. Alaý Ádilbaev "Ýahabızmnen Arabııanyń ózi bas tarta bastady. Bizge ulttyq qundylyqtarǵa qaraı burylý kerek" dese, Múftııattan kelgen áldebir mola "Qazir teledıdarlaryn toly zınaqorlyq, munyń aqyry jaman, erteń ýahabızmmen jylap kórisetin bolasyzdar" dep óziniń ýahabızmdi jaqtaıtynyn bildirip aldy.
Tusaýkeserden keıin bolǵan "Halyq murasy" konerti óte joǵary deńgeıde ótti. Amangeldi Kúzeýbaı bastaǵan Qurmanǵazy atyndaǵy Qazaq ulttyq konservatorııanyń Halyq áni kafedrasy men Ramazan Stamǵazıev bastaǵan T.Júrgenov atyndaǵy Qazaq ulttyq óner akademııasynyń Dástúrli mýzykalyq óner kafedrasynyń ustazdary men shákirtteri birinen biri asyp túsip óner kórsetti.
Sharaǵa arnaıy shaqyrylǵan din oqýyn oqyp júrgen jastar án tyńdamaq túgil, ózara emin-erkin áńgimelesip, ersili-qarsyly kirip-shyǵyp, tipti sahnaǵa shyqqan dástúrli ánshilerdi mazaqtap, syqylyqtap kúlip ózge tyńdarmandardyń ábden mazasyn aldy. Olarǵa qoı deıtin ózderinen de bir ustaz tabylmady. Ónertanýshy, qazaq mýzykalyq óneriniń shyn janashyry Jumabek Tabyn aǵamyz shydaı almaı ornynan turyp: "Qazaqtyń tól ónerin nege qurmettemeısińder? Elge rýhanı tárbıe beretin bolashaq moldalar emessińder me? Eger qazaq dástúrin syılmasańdar, maqazaqtap, yrjaqtap otyrmaı shyǵyp ketińder" dedi. Arada bir-eki án aıtylǵan joq, ustazy bar, shákirti bar, búkil din adamdary oryndarynan dúr etip kóterilip syrtqa qaraı ketip bara jatty. "Konert júrip jatqanda bulaı topyrlap shyqqanymyz mádenıetsizdik boldy-aý" dep biri de qymsynbady. Konertten asyǵyp shyqqanda bir úlken memlekettik sharýany bitiretindeı túr jasap alypty. QR Ulttyq kitaphana oqyrmandary men shaqyrýsyz-aq konertti izdep kelgen tyńdarmandar sharanyń sońyna deıin otyryp án men kúıge jan saraılarynyń shólderin jaqsylap qandyryp qaıtty.
Arman ÁÝBÁKIR
