قازاقستاننىڭ باتىس قازاقستان، اقتوبە، سولتۇستىك قازاقستان جانە تۇركىستان وبلىستارىندا ستۋدەنتتەرگە جاتاقحانالاردا پايدالانۋعا بەرىلگەن ورىندار سانى جەتكىلىكسىز بولىپ وتىر دەپ حابارلايدى "ادىرنا" ۇلتتىق پورتالى.
بۇل تۋرالى قر ءبىلىم جانە عىلىم مينيسترلىگى «قارجى ورتالىعى» اق پرەزيدەنتى اسقار يبرايموۆ ايتىپ بەردى.
— ەلىمىزدە ستۋدەنتتىك جاتاقحانالاردا جاڭا ورىنداردى بەرۋ ەلىمىزدىڭ بارلىق وڭىرىندە جۇزەگە اسىرىلىپ جاتىر. بەرىلگەن جاتاقحانالار بويىنشا كوشباسشىلار قاتارىندا نۇر-سۇلتان قالاسى (4 060 ورىنعا شاقتالعان 6 جاتاقحانا), شىعىس قازاقستان وبلىسى (10 جاتاقحانا -2 926 ورىن), الماتى قالاسى (11 جاتاقحانا-2 698 ورىن) جانە شىمكەنت قالاسى (9 جاتاقحانا 2 434 ورىن) تۇر. ال باتىس قازاقستان، اقتوبە، سولتۇستىك قازاقستان جانە تۇركىستان وبلىستارىنداعى جاتاقحانالاردا پايدالانۋعا بەرىلگەن ورىن سانى ەڭ از بولىپ وتىر، – دەدى ول.
سوڭعى ءۇش جىلدا ەلىمىزدەگى جوعارى وقۋ ورىندارى جاتاقحانالارىندا 20 مىڭنان استام جاڭا ورىن بەرىلگەن. سونداي-اق ستۋدەنتتەردىڭ جاتاقحانالاردا تۇرۋ جاعدايلارى دا جاقسارعان. 17 جوعارى وقۋ ورنى ستۋدەنتتەردىڭ تۇرعىن ۇيگە دەگەن قاجەتتىلىگىن تولىعىمەن شەشتى.
ستۋدەنتتىك جاتاقحانالار مەملەكەتتىك-جەكەمەنشىك ارىپتەستىك قاعيداتى بويىنشا سالىنىپ، ولاردىڭ قۇرىلىسىنا ينۆەستورلار بەلسەندى تارتىلىپ جاتىر.
سونىمەن قاتار جەكە ينۆەستورلاردى قوسىمشا ىنتالاندىرۋ ءۇشىن جاتاقحانالارعا اسا قاجەتتىلىك بايقالاتىن نۇر-سۇلتان جانە الماتى قالالارىندا مەملەكەتتىك تاپسىرىس كولەمىن 47 اەك-تەن 92 اەك-كە دەيىن ۇلعايتۋ ۇسىنىلادى. بۇل باعىتتا مينيسترلىك تاراپىنان عيماراتتاردى قايتا قۇرۋ تۋرالى 14-تەن استام مەموراندۋم جاسالدى.
2021-2022 جىلدارى بەكىتىلگەن جوسپارعا سايكەس جوعارى وقۋ وىرنادارىنىڭ جاتاقحانالارىندا تاعى 55 مىڭ جاڭا ورىن پايدالانۋعا بەرىلمەك.
ەلباسى ن.نازارباەۆ «پرەزيدەنتتىڭ بەس الەۋمەتتىك باستاماسى» اتتى حالىققا ۇندەۋىندە ستۋدەنتتەردىڭ ءومىر ءسۇرۋ جاعدايىن جاقسارتۋدى جانە 2022 جىلدىڭ سوڭىنا دەيىن كەمىندە 75 مىڭ ورىنعا شاقتالعان جاڭا ستۋدەنتتىك جاتاقحانالار سالۋدى قامتاماسىز ەتۋدى تاپسىرعانىن ايتا كەتكەن ءجون. بۇل ستۋدەنتتەردى تۇرعىن ۇيمەن قامتاماسىز ەتۋ ماسەلەسىن تولىق شەشۋگە مۇمكىندىك بەرەدى.
"ادىرنا" ۇلتتىق پورتالى.
