Qazaqstannyŋ Batys Qazaqstan, Aqtöbe, Soltüstık Qazaqstan jäne Türkıstan oblystarynda studentterge jataqhanalarda paidalanuǧa berılgen oryndar sany jetkılıksız bolyp otyr dep habarlaidy "Adyrna" ūlttyq portaly.
Būl turaly QR Bılım jäne ǧylym ministrlıgı «Qarjy ortalyǧy» AQ prezidentı Asqar İbraimov aityp berdı.
— Elımızde studenttık jataqhanalarda jaŋa oryndardy beru elımızdıŋ barlyq öŋırınde jüzege asyrylyp jatyr. Berılgen jataqhanalar boiynşa köşbasşylar qatarynda Nūr-Sūltan qalasy (4 060 orynǧa şaqtalǧan 6 jataqhana), Şyǧys Qazaqstan oblysy (10 jataqhana -2 926 oryn), Almaty qalasy (11 jataqhana-2 698 oryn) jäne Şymkent qalasy (9 jataqhana 2 434 oryn) tūr. Al Batys Qazaqstan, Aqtöbe, Soltüstık Qazaqstan jäne Türkıstan oblystaryndaǧy jataqhanalarda paidalanuǧa berılgen oryn sany eŋ az bolyp otyr, – dedı ol.
Soŋǧy üş jylda elımızdegı joǧary oqu oryndary jataqhanalarynda 20 myŋnan astam jaŋa oryn berılgen. Sondai-aq studentterdıŋ jataqhanalarda tūru jaǧdailary da jaqsarǧan. 17 joǧary oqu orny studentterdıŋ tūrǧyn üige degen qajettılıgın tolyǧymen şeştı.
Studenttık jataqhanalar memlekettık-jekemenşık ärıptestık qaǧidaty boiynşa salynyp, olardyŋ qūrylysyna investorlar belsendı tartylyp jatyr.
Sonymen qatar jeke investorlardy qosymşa yntalandyru üşın jataqhanalarǧa asa qajettılık baiqalatyn Nūr-Sūltan jäne Almaty qalalarynda memlekettık tapsyrys kölemın 47 AEK-ten 92 AEK-ke deiın ūlǧaitu ūsynylady. Būl baǧytta Ministrlık tarapynan ǧimarattardy qaita qūru turaly 14-ten astam memorandum jasaldy.
2021-2022 jyldary bekıtılgen josparǧa säikes joǧary oqu oyrnadarynyŋ jataqhanalarynda taǧy 55 myŋ jaŋa oryn paidalanuǧa berılmek.
Elbasy N.Nazarbaev «Prezidenttıŋ bes äleumettık bastamasy» atty halyqqa Ündeuınde studentterdıŋ ömır süru jaǧdaiyn jaqsartudy jäne 2022 jyldyŋ soŋyna deiın kemınde 75 myŋ orynǧa şaqtalǧan jaŋa studenttık jataqhanalar saludy qamtamasyz etudı tapsyrǧanyn aita ketken jön. Būl studentterdı tūrǧyn üimen qamtamasyz etu mäselesın tolyq şeşuge mümkındık beredı.
"Adyrna" ūlttyq portaly.
