وزبەكستان بالالارعا جاپپاي ۆاكتسيناتسيا سالدىرماق

3344
Adyrna.kz Telegram

وزبەكستاننىڭ ۇلتتىق تەحنيكالىق يممۋنولوگيالىق ساراپتاماسى مەن باس مەملەكەتتىك سانيتارلىق دارىگەرى 12 جاستان اسقان بالالارعا Covid-19-عا قارسى Pfizer ۆاكتسيناسىن ماقۇلدادى، دەپ مالىمدەدى ەلدىڭ دەنساۋلىق ساقتاۋ مينيسترلىگىنىڭ ءباسپاسوز قىزمەتى. بۇل تۋرالى "ادىرنا" ۇلتتىق پورتالى حابارلايدى.

12 جاستان اسقان كامەلەتكە تولماعان بالالاردى تەك اتا-اناسىنىڭ نەمەسە قامقورشىلارىنىڭ رۇقساتىمەن عانا ۆاكتسيناتسيالاۋعا بولادى. سونىمەن قاتار بالالار ءتيىستى مەديتسينالىق تەكسەرۋدەن ءوتۋى كەرەك. 12 جاستان 15 جاسقا دەيىنگى بالالار قاتىسقان شەتەلدە جۇرگىزىلگەن Pfizer ۆاكتسيناسىنىڭ كلينيكالىق زەرتتەۋلەرىنىڭ ناتيجەلەرى ونىڭ جوعارى تيىمدىلىگى مەن قاۋىپسىزدىگىن كورسەتكەنى ايتىلادى.

ايتا كەتەيىك، قىركۇيەك ايىنىڭ ورتاسىندا وزبەكستانعا كوروناۆيرۋسقا قارسى Pfizer جانە BioNTech ۆاكتسينالارىنىڭ 1,2 ميلليوننان استام دوزاسى جەتكىزىلگەن بولاتىن. 27 قىركۇيەكتە وتكەن ءباسپاسوز كونفەرەنتسياسىندا قر دەنساۋلىق ساقتاۋ مينيسترلىگىنىڭ باسشىسى الەكسەي تسوي Pfizer ۆاكتسيناسىن جەتكىزۋ وسى جىلدىڭ ءتورتىنشى توقسانىندا جوسپارلانعانىن ەسكە سالعان ەدى. قازىرشە بالالاردى ۆاكتسيناتسيالاۋدىڭ زاڭدى جاسى 12 جانە ودان جوعارى.

"ادىرنا" ۇلتتىق پورتالى

پىكىرلەر