مۇراعا قالعان مادەنيەتىمىز بەن ءومىرى وشپەس وركەنيەتىمىز بەينەلەنگەن، جۇرەگىمىزدىڭ كوشىرمەسىندەي بولعان ءتول رامىزدەرىمىز- ەگەمەندىكتىڭ جارشىسىنداي. دەربەستىككە قول جەتكىزۋ قانشالىقتى قيىندىقپەن كەلگەنى ەلىم دەگەن ءار پەرزەنتتىڭ جۇرەگىندە ەكەنى حاق.
اڭساپ جەتكەن تاۋەلسىزدىگىمىزدى العان جىلى-اق رامىزدەرىمىز دۇنيەگە كەلگەن ەدى.
ءاربىر ازامات قۇرمەتتەۋگە ءھام ماقتان ەتۋگە ءتيىس مەملەكەتتىك رامىزدەر– تۋ، ەلتاڭبا، ءانۇران 1992 جىلى 4 ماۋسىمدا قابىلداندى.
ۇلتتىق قۇندىلىقتارمەن عانا الەمدىك ارەنادا توپجارا شابا الاتىنىمىزدى ەسكەرسەك، ەڭ اۋەلى ءتول رامىزدەرىمىزدى قاستەرلەپ قانا قويماي، ەلتاڭبامىز بەن تۋىمىزداعى بەينەلەردى تەرەڭىنەن ۇعىنۋ، ءانۇرانىمىزدى جاتقا ءبىلۋ – ازاماتتىق بورىشىمىز.
قۋانىشىمىزعا وراي، قازىرگى تاڭدا ءانۇراندى جاتقا بىلمەيتىن ادامدار كەمدە-كەم. ال، ەلتاڭبا مەن تۋداعى جاندى-جانسىزدار تەگىننەن-تەگىن بەينەلەنبەگەن.
تۋىمىزدىڭ ءتۇسى كوك – اسپاننىڭ ءتۇسى. بۇل حالىقتى بەيبىت ءومىر سۇرۋگە، كوك اسپاننىڭ استىنداعى ىنتىماعى جاراسقان ەل بولۋعا شاقىرسا، قىران قۇس ەركىندىكتى، ەشبىرىنە باس يمەيتىن قانىمىزدا بار تەكتىلىكتى بەينەلەيدى.
ال كۇن - بەرەكە مەن بايلىق بەلگىسى.
ەلتاڭباداعى سيمۆوليكالىق بەلگىلەردىڭ ماعىنالارى دا كەڭ. ەڭ ءبىرىنشى شاڭىراق – كوشپەلى تۇركىلەر ءۇشىن قاستەرلى بولعان كيىز ءۇيدىڭ كۇمبەزى. تۇلپار – سارقىلماس جىگەردىڭ، ەركىندىككە ۇمتىلعان ەرىكسىز قايراتتىڭ بەينەسى بولىپ تابىلادى.
ەلتاڭبا اۆتورلارى: بەلگىلى ساۋلەتشىلەر جانداربەك مالىبەكوۆ، شوتا ءۋاليحانوۆ. تۋ اۆتورى: شاكەن نيازبەكوۆ. ءانۇران اۆتورلار: جۇمەكەن ناجىمەدەنوۆ، نۇرسۇلتان نازارباەۆ، ءشامشى قالداياقوۆ.
الايدا، تورتكۇل دۇنيەگە تاۋەلسىزدىگىمىزدى پاش ەتۋشى – رامىزدەرىمىزدى اياقاستى ەتىپ، قۇرمەتسىزدىك تانىتۋشىلار تابىلىپ، ءبىر كەزدەرى ساي-سۇيەگىمىزدى سىرقىراتقانى بار. حالىق تاراپىنان دابىل قاعىلىپ، ءتيىستى مەكەمەلەرگە بۇل ماسەلەنى بەي-ءجاي قالدىرماۋىن سۇراعاندا، ەلىم دەيتىن ەڭسەلىلەرىمىزدىڭ كوپ ەكەندىگىنە كوزىمىز جەتىپ ەدى. كەشەگى جەر ماسەلەسى كوتەرىلگەندە دە، اردالى ازاماتتارىمىز اتقا قونىپ، كوك تۋىمىزدى قولدارىنا الىپ، جەلبىرەتكەن كۇيى ءجۇرىپ وتكەندە جۇرەگىمىز اتتاي تۋلاپ، رۋحىمىز ءبىر كوتەرىلىپ، سول اتتى ازاماتتارىمىزبەن بىرگە شارىقتاپ ەدى.
بۇل سان عاسىرلار بۇرىن قولدارىنا جالاۋ ۇستاپ جاۋعا شاپقان باتىر بابالارىمىزدى كوز الدىمىزعا اكەلگەندەي.
قورىتا ايتقاندا، قاي ەلدىڭ بولماسىن قادىر تۇتۋى كەرەك مادەنيەتى، ادەت-عۇرپى، سالت-ءداستۇرى بولادى. ولاردى قۇرمەتتەۋ ەڭ اۋەلى رامىزدەرىن قۇرمەتتەۋدەن باستاۋ الماق. قازاق ەلى ءۇشىن دە رامىزدەرىن قادىرلەۋدى جاس ۇرپاقتىڭ بويىنا ءسىڭىرۋ بۇگىنگى كۇننىڭ باستى تالابىنا اينالۋى ءتيىس.
سەبەبى، رامىزدەرىمىزدە تاعىلىمى تەرەڭ تاريحىمىز، اڭعال، اقكوڭىل بولمىسىمىز بەينەلەنگەن. ونى ويىمىزدا، جۇرەگىمىزدە، تىلەگىمىزدە كوتەرىپ ءجۇرۋ اللا الدىنداعى ادامدىق، ەل الدىنداعى پەرزەنتتىك بورىشىمىز!
ءىنجۋ ومىرزاق،
"ادىرنا" ۇلتتىق پورتالى
